PHILIPI 3 - BAIBEL KANGTHIR (BSI)

Kekroi Pen Ajok Dhoromi Keplang Alam

¹ Kejutsi, kortemarli atum, Hemphu amen pen chehoknon. Neli nang-litum aphan nangketoktang alam nangketokthu lethotji momelo, lapen neli lapuson klemlote nanglitum jokvan muchotpo.

² Hala kehingno keklem atum, halabangso amethan atum, hala abang a-ok kecherot akam anat alam kepathevaret atum aphan cherenon.

³ Ahok areng-rot ke-en atum ke ilitum helo, halatum kali, pima ilitumke Arnam a-Karjong pensi Arnam aphan ingduk-ardomlo, lapen Khristo Jisu pen chelangpetsi chehok-lo. La athak keklemphrui aron-atang akam aphan ke ilitum chikikelo.

⁴ Lason akam aphanle kechikijile pute neli ke chiki un. Komane abang jongsi lason ok akam aphan kechikiji athe do pule matha lote, nelisi kechikiji athe ke-ongchot-lang.

⁵ Neli arta ni nerkep kepleng ahut neliphan reng-rot pilo; neli ke mahangkethek penta inut a-Jihudilo; neli kur ke Benjaminlo; neli phusar atum anta Jihudilo. Jihudi atum Aron kekroi anat-le langdam setta neli ke inut a-Pharisilo,

⁶ lapen neli Arnam aning kehang ateng keklemji aphan ning hangpik-lo apotsi neli mondoli aphanta chenek-lo. Aron ahukum kekroi pen ajok-le dhoromi plang un pulote, neli ke kroipamesi neliphan nedin movepinlo.

⁷ Hala hei hei ason neliphan ale do pusi aphrangke neli lakhalo, setta nonke Khristo pen apot lahei hei ason ke neliphan ale ave pusi neli lakhadet-lo.

⁸ Hala hei hei ason anchot kali, ne Hemphu Khristo Jisu aphan kechini pen apot kadokave asonta ale avepin pusi neli lakhadet-lo; pima kadokave ason apar la ne Hemphu Khristo Jisu aphan kechini ale domu pusi neli mathalo. Neli kadokave asonta che-o-et-lo, Khristo pen kechelangpet pen ajok neli ale kelongji lapen alangli pen isipet kecheplangji aphan la kadokave ason ke kevartang alohban asonthak thak-lo pusi neli mathalo.

⁹ Nonke neli methang akam, atheke Aron kekroi pen apotsi neliphan dhoromi pu nelakhaponlo, lapu kali, bonta neli Khristo aphan kroilo apotsi neliphan dhoromi pu nelakhaponlo, lapen lake neli kekroi apot-lo.

¹⁰ Neli Khristo aphan kechiniji lapen alangli kethitang atum angbong pen kethur ajakongta neli kechiniji, alangli keduk-kesung kechechak asonthotsi nelita keduk-kesung kechechakji, lapen alangli kethi asonthot nelita kecheplangjisi neli ning hang-lo.

¹¹ Lasi neliphanta kethitang atum angbong pen pathursi parengthuji pu neli ning thelo.

Anong-e Kelongji Aphan Kekat Kechebaidun

¹² Neli longtang-lo, mate neli chok-limtang-lo pule neli kepudam kali, bonta nong-e kelongji aphan neli bor-i ponbomlo, pima labangso aphansi Khristo Jisu neliphan nechepahemphu tang-lo.

¹³ Kortemarli atum, chenamsi neli longtang-lo pule kemathadam kali, tebonta eson akam klemlo, neli neliphi chelangledetsi neliphrang kedo ason aphan matha-elo.

¹⁴ Lasi anong-e kelongji aphan neli ahot-he anat kat pakengding-lo. Labangso anong-e aphansi Khristo Jisu pen ajok Arnam neliphan angsong anat nehang-lo.

¹⁵ Ilitum Karjong anat kedo pame atum anke lapusonsi mathapet nangji. Bonta nanglitum angbong komanene atum akematha jongsi lapuson ake-matha pen prekdak-lo tangte, Arnam labangso alamta nanglitum aphan paklangdakji.

¹⁶ Tebonta ilitum non an kevangtang asonthot-le ephrang anat dambom lonang.

¹⁷ Kortemarli atum, nanglitum neli long nangcharlidunnon. Nelitum nanglitum aphan nangkepaklang ateng kengkam kechejor atum aphan lang pangthekdunnon.

¹⁸ Aphrangta neli nanglitum aphan abatai batai nangthanlo, lapen nonke neli mekkri-mek-lang pensi nanglitum aphan puthupo: Khristo athengparpan ahotur ason kengkam kechejor atum do-o.

¹⁹ Halatum kepho paduji ke kevir helo, pima halatum a-arnam ke halatum apok helo. Ketherak-meme akam pensi halatum ane chepathe-ilo, lapen halatum ke pirthe alam loksi matha-elo.

²⁰ Bonta ilitum adet ke sining helo, lapen e-Kepajok a-Bang, Hemphu Jisu Khristo hadak sining pen kevangji aphan ilitum tovar cholang-lorlo.

²¹ Alangli kadokave aphan amethang aber kechebi un ajakong pen ilitum akevir undet lapen ajakong kavedet abang arpum aphan larsi amethang abang arpum ason adak-atur kedo abang arpum paplangji.