PHILIPI 1 - BAIBEL KANGTHIR (BSI)

¹ Jisu Khristo aban atum, atheke Timothi pen pen neli Polsi nanglitum aphan, atheke mondoli keja atum lapen kerapdun atum aphan pen pen Philipi arongsopi kedo Jisu Khristo pen kechelangpet akangthir atum an aphan labangso aloh tok-lo.

² Epo Arnam lapen e-Hemphu Jisu Khristo nanglitum aphan kangjinso lapen ningkangsam nangpapinang.

Pol Philipi Amondoli Mate Kekroi-Asong Aphan Arnam Kardompi

³ Neli nanglitum aphan nangkeche-matha abataitinta nanglitum pen apot Arnam aphan roverlo,

⁴ lapen neli nanglitum kadokave aphan Arnam nang kardompi abataitinta neli ning arong pensi Arnam ardomlo,

⁵ pima kecheng arni pen nonputa nanglitum neli long Birta Keme kepachethang akam keklem nangcherapdunlo.

⁶ Lapen nanglitum along kam keme keklem kepangcheng abang, Arnam labangso akam klemponbomsi mo Jisu Khristo a-Arni ahut patang pameji pu neli kroi pamelo.

⁷ Neli nanglitum kadokave aphan lapuson nang kematha ke kechokpame akamlo, pima nanglitum kaiketa neli ning arlo doverlo, atheke lahelo, non neliphan ingchin ani pen kekok ahut tame, mate neli kejokvan pen Birta Keme kerai lapen kepathir ahut settame, nanglitum kadokaveta Arnam neliphan nekepi akangjinso apharman nanglong-dunhurlo.

⁸ Jisu Khristo akechinghon asonsi neli nanglitum kadokave aphan ko-an chinghon loma, lake Arnam neli hakilo.

⁹ Kopi alam meneima, la kangvai pame thekji aphan nanglitum akechini lapen akangvai pamethek ajakong pen pen nanglitum akanghon patheponbomnang pusi neli Arnam ardomverlo.

¹⁰ Anke mo Khristo a-Arni ahut nanglitum akechokche lapen adai avedetpo,

¹¹ lapen Arnam aphan kero—karcho lapen adak atur kepatheji aphan Khristo pen ajoksi kelong unchot adhoromipet a-ot athe pen nanglitum plengsetpo.

Kerengbom Ke Khristo Akam Aphan

¹² Neliphan keplangtang ason an pen Birta keme chan-ilo, la nangli-tum kechinijisi neli ning hang-lo, kortemarli atum,

¹³ Pima labangso pen ajok, neli Khristo akam keklempi apotsi neliphan ingchin ani pen ne-kok-lo pu alam recho ahem kehon aron-aso atum an lapen ladak kedo akaprek atum anta chini pamelo.

¹⁴ Neliphan kekok pen apot Khristian akorte atum angbong ongmuchot atum ke Hemphu aphan ansose chikithu-muchot-lo. Lasi halatum aphrang apar pherere-muchotbom pen Arnam alam pachethang hailo.

¹⁵ Ahok-lo, manene atum ke kelang un-e lapen kechebohong aning pensi Khristo alamjir than-pachethang-lo, bonta manene atum ke aning keme pensi than-pachethang-lo.

¹⁶ La aphi atum ke kanghon pensi klemlo, pima Arnam neliphan Birta Keme kerai akam nepek-lo pu alanglitum chinilo.

¹⁷ Hala aphrang atum ke ahok aning penle Khristo alamjir kethan kali, bonta amethang methang ale kelongji aphansi thanlo; pima labangso pen ajok non neliphan ingchin ani pen kekok ahut neliphan pasung dunthu muchot longpo pusi halatum mathalo.

¹⁸ Tangte kopilo? Ajat ason pen settame, atheke ahok-he aning pen tame, mate ahokpet aning pen settame, Khristo alamjir ke than-pachethangdet-lo anhelo. Lapen labangso pen apot neli ning arong-lo. Lapen chenamsi neli ning arongbomji.

¹⁹ Pima nanglitum Arnam kardom lapen Jisu Khristo akarjong akerap pen ajok lake neli kejok-i ason plangpo pu neli chinilo.

²⁰ Neli ning kehang-o lapen neli ning kethe lahelo, son suri alam settame, neli therak-redetji, bonta kai atengsi non ahutta, neli rengbom tame, mate thi settame, neli phereredetsi nelibang arpum pen Khristo anong patheji.

²¹ Pima neliphan ke, neli kereng-bom ke Khristo aphanlo, lapen neli kethi ke neliphan alelo.

²² Bonta neli kerengbom pen ajok jongsi neli ale kedo akam klem unpo tangte neli kolobangso abangsi ingvai apot-loma, lake neli puthekthe.

²³ La, sonni alam angbong neli pa-ing-ang-lok-lo. Neli labangso apirthe pen che-osi Khristo along kedodunji ninghangpik-lo; pima neli methang aphan ke la memulo,

²⁴ bonta nanglitum pen apot neli kerengbom helo ansose akenangsot-lo.

²⁵ Neli labangso alam chini pamelo; lasi neli rengbomjilang pu neli chinilo. Neli nanglitum akekroi pen keplang aning arong nang kepa-ong muchotji aphan neli nanglitum kadokave angbong dobomjilang.

²⁶ Anke mo neli nanglitum angbong kevangthu ahut nanglitum Khristo Jisu pen chelangpetsi neli pen apot kechepindakji athe do muchotpo.

²⁷ Non kenangsot alam ke lahelo, neli nanglitum angbong vangsi nanglitum aphan nangchehumri un tame, mate vang un-e-detsi neli nanglitum angbong avedet settame, nanglitum ning isipet pen lapen ning kehang isipet pen dothipsi chelangpet pen birta keme pen keplang akekroi aphan ajok ron chedan bomlo pu neli karjulongji aphan Khristo alamjir a-Birta Keme atengle nanglitum a-ot-adur chepadonon.

²⁸ Nanglitum ahotur atum aphan phereri. Kaiketa phererepin-non, anke labangso pen ajok halatum remji lapen nanglitum haiji pu halatum chiniji; thangbakma Arnamsi nanglitum aphan pahaiji.

²⁹ Pima Khristo aphan kekroichot pen kali, bonta alangliphan ajok keduk-kesung kechechak pen setta nanglitum keklemji aphansi Arnam amethang akangjinso pen nanglitum aphan Khristo akam paklem long-lo.

³⁰ Aphrang neli ron kechedan nang-litum nangthekdunlong-lo, lapen nonta neli chedanbomlo, lake nanglitum arjulong-lo; labangso aron kechedan akamsi nanglitumta pholo.