MIKAH 3 - BAIBEL KANGTHIR (BSI)

Mikah Israel Akeja Abang Pu Kechekrongkre

¹ Lapen Ne pulo; Arjunon Jakob ajalin atum lapen Israel akhei kepangri atum! Nangtum ahok akangsai kechini nangji atum kalima?

² Nangtum akeme kehijim atum lapen kehingno kanghon atum, nangtum nerat aso areng ke-oi atum lapen halatum arrepi pen a-ok kelir atum;

³ Nangtum nerat a-ok cho, lapen arrepi-heihei beng-ilo, lapen phule ephu along karsak a-ok ason, Ok isi aphule thepo along kedo ason.

⁴ Ansi halatum Hemphu aphan hangpo, bonta Alangli halatum aphan thakthelo; halabangso ahut halatum pen amahang chepatupo, pima halatum kehingno akam klemtang-lo.

⁵ Lasonsi Nerat kehingno anat keja amontri atum aphuthak Hemphu pulo, halatum pine ason kecholangding ahut “Ningkangsam” pu hang, bonta angho chephinphe-pinlang atum aphuthak la ron pachini.

⁶ La apotsi thek-longlesi, la nangtum aphan ajo plangpo, lapen ning arjan avepinsi nangtum aphan kangting plangpo. Montri atum aphuthak arni chi po, lapen anerlo halatum aphuthak ake-ik plangpo.

⁷ Sang kelang atum aphan anong pavedetpo, lapen ludep atum aphan patherakpo; halatum kedo-an angbip-heihei chedippo, pima Arnam pen akethak ave.

⁸ Bonta neke Nejakong pensi plengset, Hemphu akarjong pen lapen ahok akangsai pen lapen jakong. Jakob la aron kangdi lapen Israel la apap kepachiniji aphan.

⁹ La arjunon, nangtum Jakob ahem keja atum lapen Israel ahem kepangri atum, ahok-akangsai kehijim atum lapen ahokpet akangsai an pakek-lo.

¹⁰ Zaion vi pen kekim atum lapen Jerusalem kechokche pen.

¹¹ Latum ahemphu atum tangka chosi ingsai latum akurusar atum kethan chongdat, latum amontri atum tangka aphan sanglang tebonta halatum Hemphu aphan charchungsi pu, “Hemphu etum angbong dolo kalima? Thangnat kehingno etum aphuthak vangvelo.”

¹² La apotsi nangtum ajoine Zaion aphan hidi asonsi haibaidetpo, Jerusalem keru-heihei abui plangpo, lapen hem inglong isi thengpi kangtui ason plangpo.