MATHIU 9 - BAIBEL KANGTHIR (BSI)

Thi-klak Abang Aphan Kepame

¹ Jisu telong chethapsi lapen parai nangkapsi amethang arongsopi chevang-lo.

² Lapen chini iktha, penang amonit atum hongplang athak ketirok inut thi-klak abang aphan alangli long vanlo. Jisu latum akekroi thek longsi thi-klak abang aphan pulo, “Ning thirklong penle donon po, nangpap hei hei diyatang-lo.”

³ Lapen chini iktha manene aron thekser atum aning arlo pulo, “Labangso abang Arnam aphan pinremlo.”

⁴ Jisu halatum akematha ason chinisi pulo, “Kopi apotsi nangtum aning arlo akehingno mathahur loma?

⁵ Pima, ‘Nangpap hei hei diyatang-lo’ pu keputong kejoima, mate ‘Thurra nang kengkam chejornon’ pu keputong kejoima?

⁶ Atheke, lake Monit a-Sopo pirthe athak pap hei hei kediyaji ajakong do pu nangtum kechiniji aphanlo.” Ansi alangli thi-klak abang aphan pulo, “Thurra, nang hongplang cheponra nanghem chedamnon.”

⁷ Lapen alangli thursi ahem chedamlo.

⁸ Armu atum la thek-longsi pherehurlo lapen monit atum aphan la-an ajakong kepi a-Arnam aphan anong pathelo.

Mathiu Aphan Kehang

⁹ Jisu hadak pen damsi midu kerung amaro along kangni, Mathiu pu inut amonit aphan thek-long-lo, lapen Jisu alangliphan pulo, “Ne phi phi nangdun non.” Lapen alangli thursi alangli phi phi dunlo.

¹⁰ Jisu, Mathiu ahem an kecho kangni ahut midu kerung lapen papi ake-ongpi atum alangli lapen alangli sangho atum along chingrum dunsi an kecho along ingni dunlo.

¹¹ Pharisi atum langphrongsi alangli sangho atum aphan pulo. “Nangtum athanbang kopi apotsi midu kerung lapen papi atum pen chorap rap loma?”

¹² Bonta alangli la arju longsi pulo, “daktor ke apran kemesen atum aphan kali, bonta kesodet atum aphansi nangji.

¹³ ‘Athok ajir kali, kangjinsosi nening hang-lo’ pu alamthe kopima, lale charli damnon, pima dhoromi atum aphan kali, bonta papi atum aphan kephajisi ne vang-lo.”

An Kehum

¹⁴ Jon asangho atum Jisu along vangsi pulo, “Nelitum lapen Pharisi atum an humbom setta nangli sangho atum ke an humhe, la kopi athema?”

¹⁵ Jisu halatum aphan pulo, “Piso kechepangri apinso abang dotik ke alangli long kedun atum chiru-chernapnelo, kalima? Bonta kechepangri apinso aphan halatum angbong pen pondetji, lason ahut vangji, lapen halatum halabangso ahut an humji.

¹⁶ Lapen badutame kechetutte ape kemi pen choiban athak bangbe, pima la akemi abang ke chetutsi choiban aphan vungji lapen kechingsek adim themuchotji.

¹⁷ Lapen ke monit atum ok-reng abong ban pen drakha ahorlang kemi pangpenpe. Lapu kalite ok-reng abong ingbopdakji lapen drakha ahorlang bu phakji, lapen ok-reng abongta virdetji. Bonta monit atum drakha ahorlang kemi ok-reng abong kemi along pangpenpo, lapen la sonni amarta virvedetpo.”

Kardom Ahem Ahemphu Asopi Lapen Avi Kebu Arloso Aphan Kepame

¹⁸ Jisu halatum aphan la hei hei alam kethanbom ahut rat ahemphu inut alangli long vangsi, alangliphan ardomkhrupsi pulo, “Neli sopi non-hetsi kethilang, bonta nangli vang-ra labangpi aphuthak nangliri bat-lote la rengthuji.”

¹⁹ Jisu thursi asangho atumta alangli phi phi dunlo.

²⁰ Lapen chini iktha, ningkan krehini pen avi kebu arloso alangli nung anat vangsi ape abu nang ot-lo.

²¹ Pima alangli aning arlo pulo, “Achoile ne ot longchot anta, ne medetpo.”

²² Jisu chetevarsi alangliphan thek longsi pulo, “Ning thirklong penle donon, pei! Nang akekroi nangphan pametang-lo.” Lapen labangso arloso halabangso ahut pen mamat methudet-lo.

²³ Lapen Jisu hala rat kepangri abang ahem lut damsi pongsi kebut, lapen armu atum kehurisei thek longsi pulo,

²⁴ “Ingtan damhurtha, pima labangso a-oso thithe, bonta ameksi kejangchot.” Lapen halatum alangliphan ingnekchoilo.

²⁵ Bonta armu atum aphan ingtan padam-etsi, alangli lut damsi labangpi ari ot-lo, lapen la bihek a-osopi thurlo.

²⁶ Lapen labangso abirta halabangso adet adang chethangpet-lo.

Amek Kave Bang Hini Aphan Kepame

²⁷ Lapen Jisu hadak pen kedam ahut hilolo amek kave bang hini atum alangli phi phi dunsi hangjosi pulo, “David a-Sopo, netum aphan ne ingjinsotha.”

²⁸ Jisu hem lut damdet pen la amek kave atum alangli long vang-lo, lapen Jisu latum aphan pulo, “Ne la klem un pusi nangtum kroiloma?” Halatum alangliphan pulo, “Kroilo, Hemphu!”

²⁹ Ansi alangli halatum amek otsi pulo, “Nangtum akekroi asonthot-le nangtum aphan paplangnang.”

³⁰ Lapen halatum amek chingpulo. Jisu halatum aphan papheresi pulo, “Chininon, baduta la pachini longri.”

³¹ Bonta latum damsi alangli nong halabangso adet adang pachethangpet-lo.

Jisu Alam Kave Abang Aphan Kepame

³² Halatum alangli long pen damjui aphi, chini iktha, manene atum alangli long hi-i kepho, alam kavedet abang aphan vanlo.

³³ Bonta hi-i aphan phlungdet pen mamat la alam kave abang kaningjeji pangcheng-lo. Ansi armu atum manghuphrongsi pulo, “Lapuson akam Israel adet kai penta thek longle pinlang.”

³⁴ Bonta Pharisi atum pulo, “Kethenei ahi-i ajakong pensi alangli hi-i atum aphan phlung-lo.”

Rat Atum Aphan Jisu Kangjinso

³⁵ Jisu kadokave arongsopi lapen arong an damtupsi Sinagog hei hei along lam thanlo, lapen sining a-Rat abirta keme pachethang-bomlo; lapen kadokave akeso lapen ajakong kekom-det atum aphan pamelo.

³⁶ Jisu armu ake-ongpi atum aphan thek-longsi halatum aphan ingjinsosi munduk-lo; pima kevi abang kavedet biresak atum ason thak-thaksi halatum sungpiksi abidi jutdet-lo.

³⁷ Lasi alangli asangho atum aphan pulo, “Ahok-lo, sok ke do-o, bonta kerot atum ke ong-e.

³⁸ Tangte alangli kam keklem atum aphan sok keparotjisi nangketoiji aphan sok kerot a-Hemphu aphanle cho-ardomhurnon.”