MATHIU 8 - BAIBEL KANGTHIR (BSI)

Si-i Kelong Abang Aphan Kepangthir

¹ Jisu inglong pen nang kehir ahut armu ake-ongpi atum alangli phi phi dunlo.

² Lapen chini iktha, inut si-i kelong abang alangli long vangsi alangliphan ardomkhrupsi pulo, “Hemphu! Jongsi nangning hangte nang nephan nepangthir un.”

³ Lapen ari che-ensi alangli bang otsi pulo. “Ne ning hang-lo, ingthirnon.” Lapen hala mamat alangli ingthir-et-lo.

⁴ Lapen Jisu alangliphan pulo, “Arjutha! Nang badu aphanta thanri. Bonta damra kurusar atum angno chepaklang-ra halatum aphan haki kepi jile Moses kepi aron asonle athok thok-damnon.”

Chedanbang Bang Pharo Ahemphu Aban Aphan Kepame

⁵ Alangli Kapernaum kelutdam ahut inut chedanbang bang pharo ahemphu alangli long vangsi pulo,

⁶ “Hemphu, neli ban neli hem thi-klak akeso pen tiroksi dukparlo.”

⁷ Jisu alangliphan pulo, “Neli vangsi laphan pamepo.”

⁸ Bonta chedanbang bang pharo ahemphu thaksi pulo, “Hemphu, nangli neli hem kevangji, neli lason a-ot ave; bonta lam ethe puchot iknon, lapen la medetpo.

⁹ Pima neli bang arum kedo amonit, lapen neli ber ta chedanbang atum do; neli latum aphan ‘Damnon’ pulote latum dampo, lapen akaprek aphan ‘Vangnon’ pulote alangli vangpo, lapen neli ban aphan ‘La klemnon’ pu pulote la klempo.”

¹⁰ Jisu la arjulongsi manghu hak-lo lapen aphi phi kedun atum aphan pulo, “Ahokpetsi ne nangtum aphan nangpulang, Israel adet ne lason akekroi thek longlepinlang.

¹¹ Lapen ne nangtum aphan nangpulang, ake-ongpi atum nihang lapen nichi anat pen vangsi, sining aratsi Abraham, Isaak lapen Jakob atum pen chojun rap rapji;

¹² bonta halabangso arat asomar atum aphan ingtan akangtingsi vardetji. Hadak latum chiru chernapsi aso cherdengji.”

¹³ Jisu chedanbang bang pharo ahemphu aphan pulo, “Damnon, nangli kekroitang asonthot-le nangliphan paplangnang.” Lapen halabangso apor pen mamat alangli ban medet-lo.

Pitor Anipi Lapen Akaprek Atum Aphan Keso Kepame

¹⁴ Lapen Jisu Pitor ahem lutdamsi Pitor anipi aphu keso pen ketirok thek long-lo.

¹⁵ Alangli laphan ari ot-lo lapen aphu keso methulo. Lapen labangpi thursi alangliphan ru-thailo.

¹⁶ Lapen arni kangsam ahut halatum alangli long hi-i kepho ake-ongpi atum aphan vanlo. Alangli lam ethe pen hi-i atum aphan phlung-lo lapen keso atum an aphan pamepet-lo.

¹⁷ Lake Isaiah montri keputang alam kepaplangji aphanlo, atheke alangli pulo, “Alangli methang amatsi etum ajakong kavedet akeso enlo, lapen ason ason akeso anta ponlo.”

Sangho Keplangji Aning Kehang Atum Aphan Asat Kelang

¹⁸ Jisu amethang adung arei armu ake-ongpi thek-longsi ha taloso parai kepakapji ahukum pilo.

¹⁹ Lapen aron thekser abang inut alanglong vangsi pulo, “Thanbang, nang kedam alingsi ne nang phi phi dunkripo.”

²⁰ Jisu alangliphan thaksi pulo, “Sirung atum angthor do lapen nampi avota atar do, bonta Monit a-Sopo ke aphu kebiji adim anta ave.”

²¹ Asangho kaprek inut alangliphan pulo, “Hemphu, aphrangsi ne nepo aphan kepip damji ahukum nepitha.”

²² Bonta Jisu laphan pulo, “Nephi phi dunkrinon, lapen kethitang atum amethang hijanle pachepip lonang.”

Tomon Thepi Kepaham

²³ Ansi Jisu telong chethap damlo lapen asangho atum alangli phi phi dunlo.

²⁴ Lapen chini iktha, talo athak tomon thepi vang-lo, lapen lang ang-sum thursi telong arvakthip ason plang-lo, bonta Jisu ke amek jang-lo.

²⁵ Halatum alangli long vangsi, alangliphan ingthursi pulo, “Pajoknon, Hemphu! Etum acham dampo.”

²⁶ Alangli halatum aphan pulo, “Kopi apotsi nangtum lapu-an kephereloma? O nang kekroi kekom atum!” Ansi alangli thursi tomon lapen talo aphanta ingchek-lo, lapen la hamdet-lo.

²⁷ Kadokave atum manghuphrongsi pulo, “La kopuson amonit ma? Atheke tomon lapen talota alangliphan kroilo!”

Hi-i Kepho Banghini Aphan Kepame

²⁸ Alangli ha parai Gadara alongri nanglesi, hi-i kepho banghini atum thiri ajo pen nangbarsi Jisu pen chetong-lo. Halabangso atovar baduta damhaihe, pima halatum aphan pherelo.

²⁹ Lapen chini-iktha halatum hangjosi pulo, “Nangli nelitum pen kopi akamsi kedoma, O Arnam a-Sopo? Ahut chokche ako nelitum aphan kepasungjisi nangli ladak vang-loma?”

³⁰ Latum pen asapso akehelo phak ahur chopanlo.

³¹ Hi-i atum alangli-phan choningrisi pulo, “Nangli nelitum aphan phlung lote hala phak ahur angbongle netoinon,”

³² Alangli halatum aphan pulo, “Damnon” Ansi halatum nangbarsi phak ahur along damlo. Lapen chini iktha, halabangso aphak ahur ingchengdeng arleng anat ingplong phitsi talo along jangkoilo.

³³ Phak kevi atum katsi rong lutdamlo, lapen hi-i kepho atum alam, lapen kadokave alam pachethangpet-lo.

³⁴ Chini iktha, rongsopi isi amat Jisu pen kechetongjisi nangbarpet-lo, lapen alangliphan thek longsi halatum alongri pen kedamji aphan choningrilo.