MATHIU 6 - BAIBEL KANGTHIR (BSI)

Dan Kepi Alamthe Kethan

¹ “Monit atum angno nangtum adhoromipet akam kepathek longledetjile cherehurnon. Jongsi nangtum kadokave kepathek-phrong akam klem lote, sining athak kedo Po along nangtum anong-e ave.

² “Tangte nangtum keduk kelak atum aphan dan kepi ahut monit atum pen anong kelongji aphan, hala angthin ke-ik atum ason kardom ahemheihei along, lapen tovar along along nang methang aphrang pong-ut chebut-ri. Chenamsi ne nangtum aphan nangpulang, halatum kelong nangji anong-e an longtang-lo.

³ Bonta keduk kelak atum aphan nang dan kepi ahut labangso adan kepatu adan kecheplangji aphan nangri ar-e keklem akam,

⁴ nangri arvi pachini longri, lapen kechepatu pen kethek long abang, nang Po nangphan anam nangpiji.

Kardom Alamthe Kethan

⁵ “Lapen nangtum kardom ahut hala angthin ke-ik atum ason cheplangri; pima monit atum kepathek dunlongjisi latum kardom ahem-heihei along, lapen tovar samepi kechekok adim karjap-ra kardomjisi aning dokpik-lo. Chenamsi ne nangtum aphan nangpulang, halatum kelong nangji anong-e an longtang-lo.

⁶ Bonta nang kardom ahut nang sirkut chelut damra anghap inghap-hetnon, lapen kechepatu adim kedo, nang Po aphan ardomnon. Lapen nang Po ha kechepatu pen kethek long abang nangphan anam nangpiji.

⁷ “Lapen kardom ahut kekroikrelang atum ason thakthak akejoijepi alam chenglemdet-ri, pima alam ake-ongpi pen apot Arnam arjuji pusi latum mathalo.

⁸ Tangte nangtum halatum ason cheplangri, pima nanglitum alangli long chohanghe ako penta nangtum a-Po nangtum akehang ason an chinilo.

⁹ Tangte nangtum lapusonle ardomnon: ‘Sining athak kedo netum a-Po, Nangmen pangthirnang;

¹⁰ Nangrat pavangnang; Sining athak asonthot-le, pirthe athakta nangning kehang paplengnang.

¹¹ Pini netum kenangji a-an pini netum aphan nepitha;

¹² Lapen netum along apreng kedo atum aphan, netum kediyatang asonthot-le; netum aprengta nediyatha.

¹³ Lapen asat kelangjile netum aphan neponrinon, bonta kehingno ajakong pen netum aphan nepajoktha.’ ‘pima nangrat lapen jakong lapen anong, akai apar akai anta padonang.’

¹⁴ “Nangtum jongsi bang akelet hei hei diya lote, sining athak kedo nangtum a-Po nangtum aphanta nang-diyapo.

¹⁵ Bonta nangtum jongsi bang aphan diyaje dette nangtum a-Pota nangtum akelet hei hei diyajedetpo.

An Kehum Alamthe Kethan

¹⁶ “Lapen nangtum an kehum ahut angthin ke-ik atum ason ke nangtum amahang chepa-ikkuiri. Pima latum an humlo pu monit atum aphan kepachiniji aphan latum amahang chepa-ikkuilo. Chenamsi ne nangtum aphan nangpulang, halatum kelong nangji anong-e an longtang-lo.

¹⁷ Bonta nang an kehum ahut nangmahang chingmurnon, lapen nangphu jangthu chepatip-ra nangchu chingsok-lepnon,

¹⁸ lapen ajok anut kaprek atum nang an humlo pu pachininenang; bonta kechepatu pen kethek long abang nang Po la pachini nang, lapen kechepatujoi abang, nangtum a-Po anam nangpiji.

Sining Athak Akhi

¹⁹ “Pirthe athak nangtum akhi chobirtiri; atheke ingki lapen ingru phangnodetji lapen kanghu atum hem arlo lutsi la chonghu pondetji,

²⁰ bonta sining athak-le nangtum akhi chobirti non, hadak ingki kalite ingru ta phangnone, lapen kanghu atum lutsi inghuhe.

²¹ Pima kodakma nangkhi kedo, hadaksi nang ningta do-eji.

Ebang Arpum Akethe-ang

²² “Ebang arpum amelur ke emek helo. La helo nangmek jongsi mesen lote nang bang arpumta the-ang-dangpo.

²³ Bonta nangmek jongsi hingno lote nang bang arpumta ingtingkukpo. Tangte nanglong kedo akethe-ang jongsi ingtingkuk lote labangso akangting kopu-an aklolin manpo!

Arnam Lapen Pirthe Akhi

²⁴ “Badutame hemphu bang hini aphan chongduk rappet un-e, pima alangli la inut abang aphan langseletpo lapen anut kaprek aphan inghonpo; kalite inut abang aphan ahukum kroipo, lapen akaprek aphan hijimpo. Nangtum Arnam lapen tangka aphan ingduk rappet un-e.

²⁵ “La apotsi ne nangtum aphan nangpulang, nangtum apran aphan, atheke, nangtum kopisi chojima, kopisi junjima, kalite nangtum kopisi che-umjima, la ningbiri. An apar epran themu, lapen pe-ri apar e-ok themu, kalima?

²⁶ Nampi avo atum aphan langtha: latum rikta rik-re, rotta rot-re lapen apuruta thapthe; tebonta sining athak kedo nangtum a-Po latum aphan pacholongbom. Latum apar nangtum ador somu, kalima?

²⁷ Lapen nangtum angbong komatsi aning chepa-oi pen amethang achethe cherso chepading muchot unjima?

²⁸ “Lapen pe-ri aphan nangtum kopi apotsi ning bi loma? Rit amir-tado kopusonsi chingjok-lo, lale lang pamenon; latum kamta klemkle, lapen amethang aphan honta jengje,

²⁹ bonta ne nangtum aphan nangpulang, Solomon ahir-asang pen setta la epu amir ason thakthak alon ave.

³⁰ Tangte pini kedo, lapen penap ke mehip along kephrindunji ahidi abap aphan jongsi Arnam lapu-an alon padolo tangte la apar nangtum aphan kopu-an alon pipo? O nang kekroi parpe atum!

³¹ “Tangte kopisi chopoma, kalite kopisi jun poma, lapen kopisi che-um poma pura ningbiri.

³² Pima kekroikre atum la kadokave aphan river. Nang-tum la kadokave akenangji alam sining athak kedo nangtum apo chinilo.

³³ Bonta aphrangsi nangtum Arnam a-Rat lapen alangli aning kehang kopima, lale ri paphrang non, lapen la kadokave nangtum aphan nangpidetji.

³⁴ Lahelo penap aphan nangtum ningbiri; pima penapta amethang aningbi doji. Lasi arnivang akesung along la pa-ong dun nangnelo.