MATHIU 23 - BAIBEL KANGTHIR (BSI)

Pharisi Lapen Aron Thekser Atum Aphan Jisu Kangchek

¹ Ansi Jisu armu lapen asangho atum aphan pulo,

² “Aron thekser lapen Pharisi atum Moses anghoi ingni.

³ Tangte halatum nanglitum aphan kethan aling tame nanglitum la klemra kroipetnon, bonta halatum keklem ason ke klemri, pima halatum ke kethan ateng klemkle.

⁴ Halatum anghor kardik rak-hetsi monit aphang athak batkokji, bonta latum ari chimun ehong pen anta kerapdunji aning hanghe,

⁵ lapen monit atum kepalangphrongji akam an halatum klembomlo. Langtha hastro alamjir ketok a-ok-reng achui halatum atehang lapen ari along kechingthang kopu-an akethenei!

⁶ Latum kecho kejun amei along kangni adim akemenei lapen Sinagog ahem hei hei along kethik pitang kethenei anghoi along kangniji aning dok-lo,

⁷ lapen hithi borwa along man kepi akardom lapen ‘Thanbang’ pu kepahangji aphan latum aning dok-lo.

⁸ Bonta nanglitum aphan ke ‘Thanbang’ pu nang pahang longri, pima nanglitum ke korte saidelo, nanglitum athanbang ke inutnat.

⁹ Pirthe athak badu aphanta ‘Po’ pu hangri, pima lake inutnat; sining athak kedo abangsi nanglitum a-Polo.

¹⁰ Kalite nanglitum aphan ‘Keja abang’ pu nang pahang longri, pima nanglitum aphan keja abang inutnat, lake Khristo helo.

¹¹ Bonta nanglitum angbong akethenei abang ke nanglitum aban cheplang nangji.

¹² Lapen amethang kechepathe abang aling aphan ke pabihekji lapen amethang kechepabihek abang aphan aling patheji.

Pharisi Lapen Aron Thekser Atum Aphan Jisu Kangchek

¹³ “Nangtum Pharisi lapen aron thekser atum! Nangtum ko-an akepherememe akesung pho nangpo! Nangtum angthin ke-ik atum! Pima nangtum monit atum angno sining a-Rat anghap inghap-lo; pima nanglitum methang methangta lutdamde, lapen kelutji kematha atum aphanta palut longle!

¹⁴ Nangtum Pharisi lapen aron thekser atum! Nangtum ko-an akepherememe akesung pho nangpo! Nangtum aning ke-ik atum! Nangtum hemepi atum aphan langrem rok-lo, lapen halatum ahem kurukpilo; lapen palem lemsi Arnam ardom varet-lo! Labangso apot nangtum ado themuchotji.

¹⁵ “Nangtum Pharisi lapen aron thekser atum! Nangtum angthin ke-ik atum! Nangtum ko-an akepherememe akesung pho nangpo! Pima inut amonit aphan nangtum adhorom kepa-enjisi talo lapen pirthe adang anta ridamlo, lapen labangso abang nangtum adhorom amonit plang-lote, nangtum alangliphan nangtum apar phanni Chom kedamji a-oso pinchong-lo!

¹⁶ “Ko-an akepherememe pho nang-poma, nangtum amek kave keja atum! Atheke nanglitum pulo, ‘Badutame Kardom ahem kangthir penle seme tang lote alangli thangta kali, bonta badutame Kardom ahem thepi aser penle seme tang lote, alangliphan adai do.’

¹⁷ Nanglitum amek kave, kelupik atum! Kolo abangsi kethemulo, ser ma, mate ser aphan kepangthir a-Kardom ahemthepi ma?

¹⁸ Lapen nanglitum puthulo, ‘Badutame dovan pen seme tang-lote, alangli thangta kali, bonta badutame dovan athak adan pen seme tang-lote, alangliphan adai do.’

¹⁹ Nanglitum amek kave atum! Kolo abang themulo, dan abang ma, mate dan aphan kepangthir adovan abangma?

²⁰ Tangte dovan pen seme ketang abang ke dovan lapen la athak kedo amar an pensi seme tang-lo.

²¹ Lapen badutame Kardom ahem thepi angdeng kangthir penle seme tang lote alangli la lapen la arlo kedo abang, Arnam pensi seme tang-lo.

²² Lapen sining pen seme ketang abang ke Arnam anghoi lapen la athak kangni abang penta seme tang-lo.

²³ “Ko-an akepherememe akesung pho nangpoma, nangtum aron thekser lapen Pharisi atum! Nangtum angthin ke-ik atum! Pima nanglitum Podina, ahom-abirik lapen jira phan kep angbong pen ephan Arnam aphan pibomlo, bonta aron angbong acho alam, atheke athikpet akangsai, kangjinso lapen kekroi kethirklongji aphan ke nanglitum mathathedet-lo. Hala hei hei nanglitum ketengnedet asonthotsi nanglitum la hei heita klemvek nangji apot-lo.

²⁴ Nanglitum amek kave keja atum, nanglitum kejunji ahut timsik anta ingsirsi junlo, bonta ka-ut aphan ke joiponlut-lo!

²⁵ “Ko-an akepherememe akesung pho nangpo, nangtum aron thekser lapen Pharisi atum! Nangtum angthin ke-ik atum! Pima nanglitum harlung lapen kasu angtan anat ingthilo, bonta la arlo ke nanglitum akar-i lapen jakong pen kelong ahormusi plengset-lo.

²⁶ Nanglitum amek kave a-Pharisi atum! Harlung angtan anat kepangthirjile aphrangke la arlo ingthi pamenon.

²⁷ “Nangtum aron thekser lapen Pharisi atum ko-an akepherememe akesung pho nangpo! Nanglitum aning ke-ik atum! Pima nanglitum ke kelokphlan atipit asonlo: la angtan pen kelang ke mesen, bonta la arlo ke monit kethitang arepi lapen a-ok kethusi plengset-lo.

²⁸ Nanglitumta angtan anat ke dhoromi asonsi monit atum angno cheklang-lo, bonta nanglitum aning arlo ke angthin ke-ik lapen akehingno akamsi plengset-lo.

Pharisi Lapen Aron Thekser Atum Akesung Kephoji Alam Jisu Kethanmek

²⁹ “Nanglitum aron thekser lapen Pharisi atum ko-an akepherememe akesung pho nangpo! Nanglitum angthin ke-ik atum! Pima nanglitum Arnam amontri atum atipit selamlo, lapen dhoromi atum atipit alon padolo,

³⁰ lapen nanglitum pulo, ‘Etum jongsi ephusar atum a-arni ahut dodun asonte etum halatum pen Arnam amontri atum aphan kepathi akam klem dunde detji apot-lo.’

³¹ Tangte nanglitum ke hala Arnam amontri atum aphan kepathi atum asomar atumlo pu nanglitum methang amatsi haki chodunlo.

³² Tangte nanglitum nanglitum aphusar keklemtang akam kepaplengji aphanle klemnon!

³³ Pherui atum, lapen pherui asomar atum! Chom arlo nangkepavarji ahukum pen nanglitum kopusonsi jokthekjima?

³⁴ La apotsi neli nanglitum along Arnam amontri atum lapen giani atum lapen aron thekser atum aphan nangtoilang. Nanglitum halatum angbong pen manene atum aphan pathiji lapen thengparpan athak pathiji, lapen Sinagog hei hei arlo halatum angbong pen manene atum aphan areng pasoji lapen cheneksi elong arong pen akaprek kaprek adim arphlungji.

³⁵ Labangso apotsi nanglitum dhoromi amonit atum aphan kepathi apot, atheke dhoromi a-Abel ha Berakiah asopo Jekhariah aphan nanglitum Kardom ahem thepi pen dovan adak along kepathi avi adai nanglitum aphuthaksi dokokpo.

³⁶ Chenamsi ne nangtum aphan nangpulang, la kadokave kepathi adai apot akesung ke labangso a-ove aphuthaksi klopetji.

Jisu Jerusalem Aphan Akanghon

³⁷ “O Jerusalem, Jerusalem! Nang Arnam amontri aphan kepathi lapen nanglong nang ketoitang atum aphan arlong pen karbu abang! Vopile amethang asomar atum aphan aveng-kong arum kepangrumpet pen kebi ason ne batai ko-ansi nangsomar atum aphan kepangrumchomji ingtung-loma? Bonta nangtum ke la ingtungtedet-lo.

³⁸ Chini iktha, nanglitum ahem ingsamri lapen ingthaidangpo.

³⁹ Lapen neli nanglitum aphan nangpulang, mo ‘Hemphu amen pen kevang abang ahirjume atheng-lo’ pu nanglitum pupetik ke nanglitum non pen apara neliphan thek longledetji.”