MATHIU 22 - BAIBEL KANGTHIR (BSI)

Recho Asopo Aphan Piso Kepangri

¹ Puthot Jisu halatum aphan lamlir pen thansi pulo,

² “Sining Arat ke inut arecho asopo aphan piso kepangri amei kesik pen pangbar me.

³ Alangli piso kepangri amei along kephatang atum aphan kepahang damjisi aban atum aphan toilo, bonta latum nangkedunji aning hanghedet-lo.

⁴ Puthot alangli akaprek aban atum aphan toisi pulo, ‘Damra kephatang atum aphan than damnon, chini iktha, ne kechopi sik tang-lo, ne chainong alo lapen kepangtutang achainong anta thutang-lo, lapen kadokave ason anta siktang-lo, piso kepangri along nangduntha.’

⁵ Bonta halatum thangta arjujedetsi amethang akam chedam rep-lo; inut ke arit chedamlo, akaprek abang ke kulat damlo,

⁶ lapen hala akaprek atum ke alangli ban atum aphan patherak-lo, lapen pathi-et-lo.

⁷ Recho aning thisi, aron-aso atum aphan toilo, lapen hala apran ke-en atum aphan pathikoilo, lapen arongsopi me pacho-et-lo.

⁸ Ansi alangli aban atum aphan pulo, ‘Piso kepangri akechopi siktang-lo, setta kephatang atum la kecho longji a-ot avedet-lo.

⁹ Tangte nangtum tovarpi along damra nangtum kepholok abang aling aphan kechopi amei along nangkedunjile hangdamnon.’

¹⁰ Alangli ban atum tovar akrongtin along damsi kepholok atum an aphan pangrumdamlo, akehingno lapen akeme atum aphan pangrumlo. Ansi piso kepangri ahem ke alohi atum pensi paplengset-lo.

¹¹ “Recho abang alohi atum aphan kelang damjisi arlo damlo lapen alangli hadak inut piso kepangri ape kechepindengde abang aphan thek-long-lo.

¹² Lapen alangli laphan pulo, ‘O jirpo, nangli kopi apotsi piso kepangri ape avedet-le ladak nangkelut dun loma?’ Alangli thangta ningjejedetsi dojoilo.

¹³ Ansi recho amethang aban atum aphan pulo, ‘Laphan ari akeng kok-ra ha ingtan akangtingle vardamnon, lapen hadak latum chiru chenapsi aso chardengji.’ ”

¹⁴ Lapen Jisu pulo, “Ake-ongpi atum aphan phalo, bonta penang an atum aphansi ingvaichot-lo.”

Midu Ketu Alamthe

¹⁵ Ansi Pharisi atum damsi Jisu amethang keningje alam pen apot alangliphan adai kenepji abidi rilo.

¹⁶ Halatum amethang asangho lapen Herod abe kedun atum aphan alanglilong toisi papulo, “Thanbang, nangli ke ahok, lapen ahok pensi Arnam atovar thanbomlo, lapen nangli badu aphanta pherere, thangbakma nangli monit atum aman aphan langdamde.

¹⁷ Tangte nangli kopusi mathalo, nelitum aphan thantha: Koisor Recho aphan midu ketu aron doma avema?”

¹⁸ Bonta Jisu halatum akehingno akematha abidi chinisi pulo, “Kopi apotsi neliphan asat nelang-loma? Angthin ke-ik atum!

¹⁹ Midu ketu-i atangka neliphan nepaklangtha. Lapen halatum ‘denari’ isi alanglilong vanlo.”

²⁰ Alangli halatum aphan pulo, “Labangso amohor lapen amen komat-lo?”

²¹ Halatum pulo, “Koisor Recho.” Ansi Jisu halatum aphan pulo, “Tangte mesenlo, Koisor Recho amar an Koisor Recho aphan tunon, lapen Arnam amar an Arnam aphan tunon.”

²² Halatum la arjulongsi manghu phrong-lo, lapen alangliphan otekangsi damjuilo.

Monit Thidet Aphi Kethurji Alam

²³ Halabangso arni mamat Saduki atum alanglilong vang-lo, lapen kethitang atum thurthuthe pusi latum pulo. Lapen latum alangliphan arjusi pulo,

²⁴ “Thanbang, Moses pulo, ‘Mane abang jongsi aso ave ako thilot lote akorte abang la akorte apiso aphan patengvek nangji, lapen akorte asomar paplang nangji.’

²⁵ Non hadak nelitum along korte bang throksi dolo; aklengsi abang piso ensi thilot-lo, lapen alangli asomar avedet-lang apotsi alangli piso amu aphan otekang-lo.

²⁶ Lapusonthotsi adakvam abang lapen adakvam adun abang lapen ha bangthroksi atum anta plang-lo.

²⁷ Kadokave aphisi arlosota thilot-lo.

²⁸ Tangte mo kethur arni labangpi la bangthroksi angbong komat abang apiso cheplangjima? Pima kadokave labangpi aphan enpet-lo.”

²⁹ Jisu thaksi halatum aphan pulo, “Nanglitum akechokche thedung-lo, pima nanglitum hastro alamthe lapen Arnam ajakongta chininedet-lo.

³⁰ Pima mo kethur arni halatum pisota en-e lapen penanta dode, bonta halatum sining athak kedo apherangke atum ason thakthakpo.

³¹ Bonta kethitang atum kethurji alam ke nanglitum porhehe pin langma? Atheke, Arnam nanglitum aphan putang-lo,

³² ‘Nelisi Abraham a-Arnam, Isaak a-Arnam lapen Jakob a-Arnam.’ Alangli ke kethitang atum a-Arnam kali bonta kereng-et atum a-Arnamlo.”

³³ Lapen armu atum la arjulongsi alangli kethan alam apot manghu phrong-lo.

Akethenei Ahukum

³⁴ Jisu Saduki atum aphan padoklip-lo pu Pharisi atum arjulongsi latum chingrumpet-lo.

³⁵ Ansi halatum angbong pen inut aron thekser abang alangliphan asat kelangjisi arjulo,

³⁶ “Thanbang, aron along akethenei ahukum kolo abang-lo?”

³⁷ Ansi alangli alangliphan pulo, “‘Nang ning ajakong an penle, lapen nangpran ajakong an penle lapen nang kematha ajakong an penle nang Arnam aphan chinghon non.’

³⁸ Lahelo aphrangsi lapen akethenei ahukumlo.

³⁹ Adun abang lahelo, ‘Nang methang aphan asonthot-le tebok abang aphan chinghon non.’

⁴⁰ Aron an lapen montri atum kethan alam hei hei ke la sonni ahukum pensi patirpilo.”

Khristo David Asopoma?

⁴¹ Manene a-Pharisi atum keching-rum ahut Jisu halatum aphan arjusi pulo,

⁴² “Nanglitum Khristo alamjir kopisi kemathama? Alangli komat asopoma?” Halatum alangliphan thaksi pulo, “David asopo.”

⁴³ Alangli halatum aphan pulo, “Tangte Karjong pen ajok David kopusonsi alangliphan Hemphu pusi puloma? Atheke, alangli pulo,

⁴⁴ ‘Hemphu ne Hemphu aphan pulo, Ne nang hotur atum aphan nang kengpak arum bibetik ke, Ne ar-ele ingnitha.’

⁴⁵ David jongsi alangliphan Hemphu pusi hang-lo tangte alangli kopusonsi David asopopoma?”

⁴⁶ Baduta alangli-phan ethe natta thak thekthedet-lo, lapen halabangso arni penke baduta alangliphan alam kaprek arju haihedet-lo.