MATHIU 20 - BAIBEL KANGTHIR (BSI)

Drakha Aberi Along Kam Keklem Atum

¹ “Pima, sining a-Rat ke lapuson helo: Inut amonit amethang adrakha aberi arlo kam kepaklemji aphan adapprang kam kechongdat atum aphan ridamlo.

² Lapen arnisi ‘denari’ isi kepiji aphan kechongdat atum pen cheparaisi alangli latum aphan amethang aberi arlo toilo.

³ Lapen baji sirkep anbak apor alangli damthusi hithi along karjapphrong, thangta keklemkle atum aphan thek-long-lo.

⁴ Alangli latum aphan pulo, ‘Nangtumta neli drakha aberi arlo damtha, neli athikpet ador nanglitum aphan nangpiji.’ Ansi latum damlo,

⁵ lapen puthot nerlo chetim anbak apor, lapen baji kethom aporta alangli damsi lapusonthot klemlo.

⁶ Lapen puthot baji pho anbak apor alangli damthusi karjapphrong atum aphan thek long-lo, lapen alangli latum aphan pulo, ‘Kopi apotsi nangtum losini thang klemklera ladak arjapphrong loma?’

⁷ Latum alangliphan pulo, ‘Baduta netum aphan kam nepipelang.’ Ansi alangli latum aphan pulo, ‘Tangte nanglitumta kam keklem damjile neli beri arlo damnon.’

⁸ “Arni kangsam ahut drakha aberi ahemphu kam keja abang aphan pulo, ‘Kechongdat atum aphan hangpet-ra anam pirepnon. Aphi atum aphan pi paphrangra aphrang atum aphan pajutnon.’

⁹ Ansi baji pho apor anbak kevang atum ‘denari’ isi longrep-lo.

¹⁰ Hala adapprang kevang atum ke kelong ong muchotpo pusi mathalo, bonta latum ‘denari’ isi si ansi longchot-lo.

¹¹ La long-lok pen latum ahemphu aphan adai ketinjisi pulo,

¹² ‘La kevang paphi atum porphai isi ansi klemchot-lo, lapen nelitum ke losini arni keso ajo klemlo setta nangli kepi pachingbarpet-lo.’

¹³ “Bonta alangli halatum angbong pen inut aphan pulo, ‘Jirpo, neli nangliphan thangnat akechokche akam klemklelo, nangli neli pen denari isi ador cheparailo, kalima?

¹⁴ Nangli kelongji an enra damnon, neli nangliphan asonthot aphi kevang atum aphanta kepiji neli ning hang-lo.

¹⁵ Neli methang akhi pen neli neli ning kehang aling klem un, kalima? Kalite, neli keklem mesen apotsi nangli neliphan ne langdun un-e loma?’

¹⁶ “Lasonthotsi aphi atum paphrangji lapen aphrang atum paphiji.”

Jisu Amethang Kethiji Alam Batai Kethom Aphong Kechethan

¹⁷ Jisu Jerusalem karludam ahut alangli long asangho bang krehini atum aphan cheponlo, lapen tovar kedambom ahut alangli latum aphan pulo,

¹⁸ “Chini iktha, etum ha Jerusalem an dampo; lapen Monit a-Sopo aphan kurusar kethe lapen aron thekser atum arideng hodai detji, lapen halatum alangliphan ingsaisi kepathiji ahukum piji,

¹⁹ lapen alangliphan Jihudi kalidet atum arideng hodaisi papinremji lapen champre abu pen pachokji, lapen thengparpan athak pathiji, bonta nithom arni alangliphan pathurji.”

Jebedi Apiso Kechoningri

²⁰ Ansi Jebedi apiso amethang asopo bang hini atum pen Jisu along vangsi, ardomkhrupsi akerap chohang-lo.

²¹ Alangli labangpi aphan pulo, “Nangli kopisi kenangjima?” Labangpi alangliphan pulo, “Nangli rat angbong la neli sopo bang hini aphan nangli ar-e anat inut lapen nangli arvi anat inut pangnilongtha.”

²² Bonta Jisu thaksi pulo, “Nangtum kopisi kehang, lake nangtum chinine. NE KEJUNJI AHARLUNG NANGTUM JUN UNJIMA?” Latum thaksi pulo, “Netum un.”

²³ Alangli latum aphan pulo, “Nangtum ne harlung pen jun vekji, bonta ne ar-e lapen ne ar-vi anat kepangniji, lake nejakong ave, nepo kepathiktang atumsi la longji.”

²⁴ Hala bangkep atum la arjulongsi la bang hini akorte atum aphan aning thi-lo.

²⁵ Ansi Jisu latum aphan amethang adung chehangsi pulo, “Nangtum chinilo, Jihudi kalidet atum arecho halatum aphuthak ajakong do, lapen keja atum ajakong do pame.

²⁶ Bonta nangtum angbong ke lapuson paplangple nang, lapen badutame nangtum angbong akethe kecheplangji aning hang-lote, alangli nangtum aban cheplang nangji,

²⁷ lapen nangtum angbong badutame aphrangsi kecheplangji aning hang lote alangli nangtum aban cheplang nangji,

²⁸ lake Monit a-Sopo ason thakthak-lo, atheke alangli bang arideng pen keru kethai kelongji aphanle kevang kali, bonta keru kethaiji lapen ongdung atum aphan kepajokji aphan amethang apran kechepijisi vang-lo.”

Jisu Bang Hini Amek Kave Atum Aphan Kepame

²⁹ Jisu lapen asangho atum Jeriko pen kebar ahut armu ake-ongpi atum alangli phi phi dunlo.

³⁰ Lapen chini iktha, bang hini amek kave atum tovar alongsi ingnilo, lapen latum Jisu labangso atovarsi vangji pu arjulongsi latum hangjosi pulo, “O Hemphu, David a-Sopo; nelitum aphan ne ingjinsotha!”

³¹ Bonta armu atum doklip non pusi ingchek-lo, bonta latum aphrang apar kehang ase pathemuchotsi pulo, “O Hemphu, David a-Sopo; nelitum aphan ne-ingjingsotha!”

³² Jisu sangkoksi, latum aphan hangsi pulo, “Neli nanglitum aphan kopisi nangklempi nangjima?”

³³ Latum thaksi pulo, “Hemphu, nangli nelitum amek pachecharjisi netum ning hang-lo.”

³⁴ Jisu latum aphan ingjinsosi latum amek ot-lo, lapen hala mamat latum amek checharlo, lapen alangli phi phi dunlo.