MATHIU 15 - BAIBEL KANGTHIR (BSI)

Aphusar Atum Kethan Alamthe

¹ Ansi Jerusalem pen Pharisi lapen aron thekser atum Jisu along vangsi pulo.

² “Nangli sangho atum kopi apotsi ephusar atum ekepitekang aron kroikredet-loma? Pima latum ari chersamsesi cholo.”

³ Bonta alangli thaksi halatum aphan pulo, “Nanglitumke tangte kopi apotsi nanglitum a-ove ove pen kevang aron pen apot Arnam ahukum kroikredet-loma?

⁴ Pima Arnam hukum pisi pulo, ‘Nangpi lapen nangpo aphan anong pathenon,’ lapen ‘Api apo aphan kehingno kepu abang aling aphan pathi vek nangji.’

⁵ Bonta ‘Badutame, alangli pen kelong nangji ale alangli Arnam aphan pitang-lo pule api lapen apo aphan thanlote, alangli api, apo anong pathe nangnelo.’ pusi nanglitum pulo.

⁶ Lasi a-ove ove pen kevang aron pen apot nanglitum Arnam alam ale pavedet-lo.

⁷ Nangtum angthin ke-ik atum! Isaiah nanglitum alamjir montri pamesi pulo,

⁸ ‘Labangso arat atum angtur pen nenong pathelo, bonta latum aning ke ne pen heloving-lo;

⁹ latum nephan kangduk thangnat ale ave, Pima latum kethan alam hei hei ke monit kepinchong aron chot-lo!’ ”

Monit Aphan Kepahijim Ahormu

¹⁰ Ansi Jisu armu atum aphan alang-lidung hangsi halatum aphan pulo, “Arjura chinitha! Ingho pen kelut amar ke ephan pahijimje,

¹¹ bonta ingho pen nangkebar amarsi ephan pahijimlo.”

¹² Ansi asangho atum alangli long vangsi alangliphan pulo, “Nang labangso alam kepu apot Pharisi atum aning oihurlo, lake nang chiniloma?”

¹³ Alangli thaksi pulo, “Sining athak kedo nepo ke-e-edet athengpi arong an phu-etji.

¹⁴ Halatum aphan thangta mathari. Latum ke amek kave atum aphan kejapon amek kave atumlo. Inut amek kave abang jongsi akaprek abang aphan japon lote latum bang hinita hilik jang rap-rapji.”

¹⁵ Ansi Pitor thaksi alangliphan pulo, “La lamlir alam athe netum aphan nethantha.”

¹⁶ Jisu latum aphan pulo, “Nangtum jokta non anta thangta chinine langma?

¹⁷ Nangtum chinine langma, ingho arlo pen kelut amar an epok arlo dampo, lapen barpi nangkebar ahor pen nangbarpo.

¹⁸ Bonta ingho pen nangkebar ason an ening arlo pensi vang-lo, lapen la hei hei ephan pangthirthelo.

¹⁹ Pima ning arlo pensi kehingno akematha vang-lo atheke pran ke-en, beisa keklem, arloso aphan kelangrem, kechonghu, chobei ahaki kepi, kepinrem hei heisi

²⁰ monit aphan pangthirthelo; bonta ari kecharsamse pen kechoke monit aphan pangthirthe pupe.”

Jisu Kanaan Adet Arloso Aphan Kepame

²¹ Jisu hadak pen ha Ta-ir lapen Sidon alongri damjuilo.

²² Lapen chini iktha, inut a-Kanaanpi halabangso alongri pen vangsi hangsersi pulo, “O Hemphu, David a-Sopo; neliphan ne ingjinsotha. Neli sopi pherememe ahi-i pholok-lo.”

²³ Bonta alangli labangpi aphan thangnatta thak dundedet-lo. Sangho atum alangli long vangsi, choningrisi pulo, “Labangpi aphan toinon, pima la etum aphi phi nangdunsi hangkong-lo.”

²⁴ Alangli thaksi pulo, “Neliphan Israel akhei kangbotang abiresak atum along ansi netoichot-lo.”

²⁵ Bonta labangpi vangsi alangliphan ardomkhrupsi pulo, “Hemphu, neliphan neliraptha.”

²⁶ Ansi alangli thaksi pulo, “Osomar atum ahim enra methan atum angno kevar, lake kemesen akam kali.”

²⁷ Labangpi thaksi pulo, “Ahok-lo Hemphu, tebonta methan atum ahemphu a-an kecho anghoi pen keklo abeng achet anta cholo.”

²⁸ Ansi Jisu thaksi labangpi aphan pulo, “O pei, nangli kekroi thedung-lo! Nangli ning kehang asonthot-le paplangnang.” Halabangso ahut pen mamat alangli sopi keso medet-lo.

Ongdung Atum Aphan Jisu Kepame

²⁹ Jisu halabangso adim che-osi Galili atalo akung soding damlo, lapen alangli inglong arlu damsi hadak ingnilo.

³⁰ Armu ake-ongpi alangli long vang-lo lapen halatum along akeng ketekok, ari ketekok, amek kave, alam kave, lapen akaprek kaprek ake-ongpi atum aphan vansi alangli kengri nangbilo, lapen alangli kadokave aphanta pamedet-lo.

³¹ Lasi armu atum alam kave abang keningje, ari-akeng ketekok atum kemethu, akeng kehonghap atum kechejor lapen amek kave atum kechecharthu thek longsi manghuphrong-lo, lapen Israel a-Arnam anong pathelo.

Bang Suri Phli Aphan An Kepacho

³² Jisu amethang asangho atum aphan adung chehangsi latum aphan pulo, “Ne armu atum aphan ingjinsolo, pima latum nelong nangkedodun nithomlo, lapen latum kecho ason thangnatta avelo. Latum aphan an pipepin pen kepadamji ne ning hanghe, pima latum hem kedam ahut aini ponruipo.”

³³ Lapen asangho atum alangliphan pulo, “Ladak monit kavedet, akangsamri adim armu atum aphan ke dorphlup a-an kepachoji aphan konatsi kelongpidam poma?”

³⁴ Jisu latum aphan arjulo, “Nangtum along him plang ko-an do?” Halatum thakdunsi pulo, “Him Plang throksi lapen oksomar asap.”

³⁵ Jisu armu atum aphan longle athak kepangniji ahukum pilo,

³⁶ lapen alangli hala him plang throksi lapen ok ensi Arnam aphan rolo. Alangli la bengsi asangho atum aphan pilo, lapen asangho atum la armu atum aphan pilo.

³⁷ Kadokave atum chosi ingkrangpet-lo lapen asangho atum kechotang abeng achet pangrumthusi ton throksi paplengset-lo.

³⁸ La kecholong atum arlosomar lapen osomar atum aphan lakhakhedetta pinsomar atum lok bang suri phli anbak dolo.

³⁹ Armu atum aphan padamtoisi alangli telong pen ha Megdala alongri damjuilo.