MATHIU 14 - BAIBEL KANGTHIR (BSI)

Jon Baptist Kethi

¹ Halabangso ahut Galili adet ahemphu Herod Jisu alamjir arjulong-lo.

² Alangli amethang aban atum aphan pulo, “Labangso abang ke Jon Baptist-lo, alangli kethi pen rengthutang-lo; la apotsi alangli kemanghumeme akam kethe hei hei klem unlo.”

³ Pima Herod ke akorte Philip apiso Herodias pen apot Jon aphan nepcheksi kokdong-lo, lapen phatek bengthot-lo.

⁴ Pima Jon alangliphan pulo, “Nangli labangpi aphan ke-enji aron ave.”

⁵ Lapen alangli alangliphan kepathiji aning hang setta armu aphan pherelo, pima halatum Jon aphan Arnam amontri pusi mathalo.

⁶ Bonta Herod pirthe kehache arni nanglesi Herodias asopi halatum angbong kanlo, lapen Herod la aning ingsamlo.

⁷ Ansi alangli semetangsi labangpi kehang aling piji pusi alam chak-lo.

⁸ Labangpi apei pen abidi longsi pulo, “Ladak kasu kethe arlo Jon aphu nepinon.”

⁹ Recho aning duk-lo, bonta alangli kechaktang alam pen apot lapen alohi atum pen apot la kepiji ahukum pilo.

¹⁰ Ansi alangli toisi phatek arlo Jon angphun pangthanpet-lo.

¹¹ Lapen aphu vansi kasu akethe athak nangbilo, lapen labangpi aphan pilo, lapen nimsopi la apei aphan pidamlo.

¹² Jon asangho atum vangsi abang arpum ponsi pip damlo lapen halatum damsi Jisu aphan than damlo.

Bang Suri Pho Aphan An Kepacho

¹³ Jisu labangso alam arjulongsi hadak pen telong pen damsi monit kavedet, kangsamri adim dodamlo. Lapen armu atum la arjulongsi, arongsopi-heihei pen vangsi akeng pen alangli phi phi dunlo.

¹⁴ Lapen alangli telong pen che-osi armu ake-ongpi aphan thek long-lo lapen halatum aphan ingjinsosi aning duk-lo lapen halatum akesota pamelo.

¹⁵ Arni kangsam ahut asangho atum alangli long vangsi pulo, “Ladak ke kangsamri adim lapen arnita chiji dokdok-lo, latum aphan arong arong toira amethang methang aphan kecho ahormu kepachonam damjile hukum pinon.”

¹⁶ Jisu thaksi pulo, “Halatum dam nangnelo, nangtumle latum aphan kechoji ahormu pinon.”

¹⁷ Latum alangliphan thaksi pulo, “Netum arideng him plang pho lapen ok jonni pen apar thangnatta ave.”

¹⁸ Ansi alangli pulo, “Lahei nelong vannon.”

¹⁹ Alangli armu atum aphan bapso athak kepangniji ahukum pilo, lapen him plangpho lapen ok jonni ensi sining anat langsi ahirjume hang-lo, lapen him bengsi asangho atum aphan pilo. Asangho atum armu aphan la pilo.

²⁰ Kadokave atum la chosi ingkrang-lo, lapen halatum kecho abeng achet pangrumsi ton krehini papleng-lo.

²¹ La kecho atum arlosomar lapen osomar atum aphan lakha ponpedetta pinso atum lok bang suri pho anbak dolo.

Jisu Akeng Pen Lang Athak Kedam

²² Ansi Jisu asangho atum aphan telong pachethap-lo, lapen alangli phrang ha parai padam toilo, lapen amethang ke armu atum aphan pusi padamtoilo.

²³ Armu atum aphan padamdet aphi alangli Arnam kardomjisi inutpet ha inglong arlu damlo. Arni kangsam anta alangli hadak inutpetsi dolo,

²⁴ lapen telong ke halabangso ahut talo akung pen helo-olo, lapen lang angsum kethur pen ajok la paleng-longtong-lo, pima tomon japsi laphan khang-lo.

²⁵ Ansi adap baji kethom pen baji throk adak malom alangli talo athak akengkam chejorsi asangho atum along damlo.

²⁶ Bonta asangho atum alangphan talo athak akengkam kechejor thek longsi thirik-hurlo lapen chamburukso pusi alangliphan puhurlo, lapen kepheresi hangjolo.

²⁷ Bonta hala mamat Jisu latum aphan pulo, “Ning thirklongnon, ne lema; phere nangne.”

²⁸ Ansi Pitor alangliphan thaksi pulo, “Hemphu, jongsi la chenam tangte, lang athak kedamji ahukum nepitha.”

²⁹ Alangli pulo, “Vangnon.” Ansi Pitor telong pen hirsi lang athak kengkam chejorsi Jisu along damlo.

³⁰ Bonta tomon thek longsi alangli pherelo, lapen lang jangji dokdoksi alangli hangsersi pulo, “Hemphu, nepajoknon.”

³¹ Hala mamat Jisu ari chirungsi alangliphan otsi pulo, “O nang kekroi kekom abang, nang kopi apotsi nang ning aberbu kedo langma?”

³² Lapen latum telong chethapdet anke tomon hamdet-lo.

³³ Ansi telong arlo kedo atum alangliphan ardom-khrupsi pulo, “Ahok-lo, nangke Arnam a-Sopolo.”

Jisu Gennesaret Alongri Keso Kepame

³⁴ Ansi latum parai kapsi Gennesaret alongri nanglelo.

³⁵ Halabangso alongri amonit atum alangliphan chini pamesi latum det adang an monit toisi kadokave akeso alangli dung pavanlo.

³⁶ Halatum ape abu ke-ot chotji ahukum chohang-lo, lapen la ke-ot long atum an medet-lo.