MATHIU 13 - BAIBEL KANGTHIR (BSI)

Chili Kerik Alamlir

¹ Halabangso arni mamat Jisu hem pen damsi talo akung ingni damlo.

² Lapen armu ake-ongpi alangli ingno chepangrumlo, ansi alangli telong ehong along chethapsi ingnilo lapen armu atum talo akungsi arjapphrong-lo.

³ Lapen alangli lamlir pen halatum aphan thansi pulo: “Ephong inut amonit chili kerikjisi damlo.

⁴ Alangli chili kerik ahut penang-an achili ke tovar akung klolo, lapen vo atum vangsi la chongthok et-lo.

⁵ Akaprek achili ke longpak athak klolo. Hadak longle ongparpedet apotsi hala mamat la arong vang-lo,

⁶ bonta arni vangsi la thikhrailo, lapen angkur kechesak arnuknedet apot la chekedulo.

⁷ Akaprek achili ke ingsu kethe ajo klolo, lapen ingsu arong thesi laphan petthip-lo.

⁸ Bonta akaprek achili ke longle keme along klolo, lapen athe pathelo, abang pen ke phan pharo, abang pen ke phan throk-kep lapen abang penke phan thomkep anta dolo.”

⁹ Jisu than pajutsi pulo, “Ano kedo abang parjunang!”

Lamlir Alam Athe

¹⁰ Ansi sangho atum Jisu along vangsi alangliphan pulo, “Nangli kopi athesi halatum aphan lamlir hei hei pen puloma?”

¹¹ Alangli thaksi latum aphan pulo, “Nangtum aphan sining arat akepatu alam kepachiniji aphan nangpi tang-lo, bonta latum aphan ke pipedet-lang.

¹² Pima akhi kedo abang aphan aling pidetji, lapen alangli khi do-opo, bonta alangli akhi kavedet abang pen alangli long kedo amar anta thi pondetji.

¹³ La apotsi ne halatum aphan lamlir pensi pulo, pima latum langding setta thek longle, lapen arjubom setta arjulongle, lapen ke chinine.

¹⁴ Isaiah kemontri alam halatum pen ajok chekok-lo, atheke la pulo: ‘Labangso amonit atum arjubom arjubomji, bonta chininedetji; halatum langbom langbomji, bonta thek longledetji.

¹⁵ Pima halatum aning buikluihak-huk-lo, lapen ano ingthongjong-jang-lo, lapen amek selokjok-jak-lo. Lapu kali asonte, halatum amek pen thek longji apot-lo, ano pen arjulongji apot-lo, halatum aning pen chiniji apot-lo, lapen halatum nenat aning chiruisi ne halatum aphan pameji apot-lo.’

¹⁶ “Bonta nangtum ke nangkopai keme atumlo! Pima nangtum ke nang-mek pen thek-long-lo, lapen nangtum ano pen arjulong-lo.

¹⁷ Ne chenamsi nangtum aphan nangpulang, Arnam amontri lapen dhoromi amonit ake-ongpi atum nangtum kethek long ason kethek longji ingtungpik-lo, bonta halatum thek longledet-lo, lapen nangtum karjulong ason karjulongji ingtungpik-lo, bonta halatum arjulongledet-lo.

Chili Kerik Alamlir Alam Athe

¹⁸ “Tangte hala chili kerik alamlir alam athe kopima, lale nangtum arjutha.

¹⁹ Sining a-Rat alamjir arju setta kechinine abang ke hala tovar akung keklo achili ason thakthak-lo. Kehingno abang vangsi halabangso amonit aning arlo keriktang alam thipondetpo.

²⁰ Hala alam karjulong pen mamat aning arong pen kedeng atum ke longpak athak keklo achili ason thakthak-lo.

²¹ Bonta angkur kechesak arnuknedet apot lake cherso ahut ansi dochot-lo. Lasi lam pen apot akesung kalite akechenek kethur ahut pen mamat latum obuppo.

²² Hala ingsu akethe ajo keklo achili abang ke, hala alam arju setta labangso akai aphan aningbi kedo, akhi aphan kar-i pen ajok lam aphan kepetthip lapen athe kepathethe abang ason thakthak-lo.

²³ Hala longle keme along keklo achili abang ke hala alam karju lapen kechini abang ason thakthak-lo. Lake athe pathelo; abang pen ke phan pharo, mane abang ke phan throk-kep lapen mane abang ke phan thomkep an athe pathelo.”

Nonpelar Alamlir

²⁴ Jisu akaprek alamlir pen halatum aphan thansi pulo, “Sining arat aphan amethang arit along chili keme kerik abang pen pangbar un.

²⁵ Ningve isi monit atum amek jangklip ahut ahotur abang vangsi sok tepli angbong nonpelar achili rik tekangsi damjuilo.

²⁶ Bonta arong kevang lapen kephi ahut halabangso anonpelarta cheklang-lo.

²⁷ Ansi hem ahemphu aban atum alangli long vangsi pulo, ‘Hemphu, nangli akeme achili rik-lo, kalima? Tangte la nonpelar konat pensi vang-loma?’

²⁸ Alangli halatum aphan pulo, ‘Hotur abangsi la klemlo.’ Ansi aban atum alangliphan pulo, ‘Nelitum damsi la kepangrum damji aphan nangli ning hangma?’

²⁹ Bonta alangli pulo, ‘Lapu kali, nonpelar kepangrum ahut nangtum sok ta pangrumpon rappet tahai.”

³⁰ Sok rot-re-tik ke la hinita pathe rap rap lonang, lapen mo sok kerot ahut ne sok kerot atum aphan pupo, ‘Aphrang nonpelar an pangrumra papeng kreinon lapen me phrindutnon, bonta sok tepli ke pangrumra ne sok puru along thapnon.’”

Hanjang Amu Alamlir

³¹ Puthot Jisu halatum angno akaprek alamlir thansi pulo, “Sining arat ke inut amonit amethang arit along hanjang amu kerik ason thak-thak-lo;

³² lake kadokave amu angbong pen akebineilo, bonta arong the lote han arong angbong la theneilo, lapen thengpi arong ason cheplangpo, lasi vo atum vangsi la aro hei hei along atar chepatarpo.”

Thap Alamlir

³³ Jisu halatum aphan puthot akaprek alamlir pen thansi pulo, “Sining arat ke lapuson helo. Inut arloso penang an athap ensi him pen pangvuilo, lapen la kadokave kangpet-petik ke patip rapbomlo.”

³⁴ Kadokave alam Jisu lamlir pensi armu atum aphan pulo, lapen lamlir pen kalite alangli halatum aphan thangnatta pupedet-lo.

³⁵ Lake Arnam amontri kepu alam kepachekokji aphanlo. Atheke alangli pulo, “Neli lamlir pen neli ingho chingpuji, pirthe kepinchong ahut pen kepatujoi alamthe neli ningjeji.”

Nonpelar Alamlir Alam Athe Kethan

³⁶ Jisu armu atum pen chekakdet aphi alangli hem arlo lutdamlo, lapen asangho atum alangli long vangsi pulo, “Rit anonpelar alamlir alam athe netum aphan nethan pametha.”

³⁷ Alangli thaksi pulo, “Chili keme kerik abang ke Monit a-Sopolo,

³⁸ lapen rit ke pirthe, lapen chili keme ke ha sining a-Rat aso atumlo. Lapen nonpelar ke kehingno abang asomarlo.

³⁹ Lapen nonpelar kerik abang, hala hotur ke Hi-i Sarpolo. Lapen sok kerot ahut ke non akai akejut-lo, lapen sok kerot atum ke sining apherangke atumlo.

⁴⁰ Lasi nonpelar kepangrum lapen me kephrindut asonthotsi labangso akai akejut plangji.

⁴¹ Monit a-Sopo amethang apherangke atum aphan nangtoiji lapen halatum alangli rat angbong pen pap kepaplang-i ason an lapen kehingno keklem atum an aphan pangrum petji,

⁴² lapen meherang arlo halatum aphan varchuiji. Hadak latum chiru chernapsi aso chardengji.

⁴³ Ansi Po a-Rat angbong hala Arnam amonit atum arni asonsi tur-angji. Ano kedo abang parjunang.

Kepatu Akhi Alamlir

⁴⁴ “Sining arat ke lapuson helo: Inut amonit rit angbong kepatujoi akhi thek long-lo. Alangli la dipthusi patulo lapen aning arong piksi akhi kedo-an jordamdetsi halabangso arit namlo.

Mukut-abor Alamlir

⁴⁵ “Puthot, sining arat ke lapuson helo. Inut amonit akemesen amukut-abor rilo,

⁴⁶ lapen alangli kemepik amukut-abor thek damlongsi kadokave ahormu an chejordam-etsi labangso amukut-abor namlo.

Lan Alamlir

⁴⁷ “Puthot, sining arat aphan lan pen pangbar me. La talo along varlo lapen ok ajat kedo-an beng rappet-lo;

⁴⁸ lapen la plengset aphi halatum talo akung an alan vungsi ingniklip-lo. Ansi akeme a-ok an ke ingvaisi burup arlo thap-lo, bonta akeningjoino anke var-et-lo.

⁴⁹ Lasonthotsi labangso akai akejut plangji. Sining apherangke atum vangji lapen dhoromi atum angbong pen kehingno atum aphan paprekji,

⁵⁰ lapen herang arlo halatum aphan varchuiji. Hadak latum chiru chernapsi aso chardengji.

⁵¹ “Nangtum la kadokave chiniloma?” Latum alangliphan thaksi pulo, “Chinilo.”

⁵² Lapen alangli halatum aphan pulo, “La apotsi sining arat alamjir kecharlitang, aron kethekser abang ke ehum ahem ahemphu ason thakthak-lo. Alangli amethang akhi apuru angbong pen akemi lapen aban ahormu en.”

Nazareth Asor Jisu Aphan Kechakche

⁵³ Lapen Jisu la kadokave alam-lir ningje tangdet aphi hadak pen damjuilo.

⁵⁴ Lapen amethang adet chevangthusi alangli halatum asinagog arlo halatum aphan lam thanbomlo. Ansi latum kematha abidi jutdetsi pulo, “Alangli labangso agian lapen akemanghumeme akam hei hei keklemji ajakong konat pensi kelong-loma?

⁵⁵ Labangso abang ke hala kapat akimbang asopolo, kalima? Alangli pei amen ke Meri puhelo, kalima? Lapen alangli korte atum ke hala Jems, Joseph, Simon lapen Judas helo, kalima?

⁵⁶ Lapen alangli ingjir do-an etum alongsi do, kalima? Tangte alangli la kadokave konat pensi long-loma?”

⁵⁷ Lasi halatum alangliphan chakchedet-lo. Bonta Jisu halatum aphan pulo, “Arnam amontri aphan bithe bithata aman pi, bonta amethang ahem lapen arong angbong ke alangli aman longle.”

⁵⁸ Lapen latum akekroikre pen apot alangli hadak kemanghumeme akam kethe klempikpedet-lo.