MARK 9 - BAIBEL KANGTHIR (BSI)

¹ Lapen alangli halatum aphan pulo, “Ne nangtum aphan ahok alamsi pupo, ladak karjapphrong atum angbong manene atum Arnam a-Rat jakong pen kevang thek-longletik ke thithedetji.”

Jisu Arje Kechepharlo

² Nithrok aphi Jisu hala Pitor, Jems lapen Jon aphan cheponsi baduta kavedet adim, kangtuiving anglong athak damlo. Halatum angno Jisu arje chepharlolo.

³ Alangli pekelok klingsi klarbong cheplang-lo; pirthe athak baduta lapuson chok palok thekthe.

⁴ Ansi Moses lapen Elijah halatum angno cheklang-lo; halatum Jisu pen lam chingkilo.

⁵ Pitor Jisu aphan pulo, “Rabbi, etum ladak kedo ke mesenlo! Netum pharla humthom kimpo. Nangphan ehum, Moses aphan ehum, lapen Elijah aphan ehum kimpipo.”

⁶ Pima alangli pisi puloma, lake chininedet-lo; atheke halatum phere-olo.

⁷ Ansi inghun ephar thursi halatum aphan binthip-lo, lapen inghun angbong pen ase vangsi pulo, “Lake ne kechinghon a-Sopolo, alangliphan arjuphrongnon.”

⁸ Lapen halatum tongsekot pen talavir lang-lo, bonta Jisu aphan apar ke badu aphanta thek-longledet-lo.

⁹ Halatum inglong pen nangkehir un ahut Jisu halatum aphan hukum pisi pulo, “Monit a-Sopo kethi pen rengthusi thurthetik-ke nangtum la kethek-long alam badu aphanta thanri.”

¹⁰ Halatum la alangli kepu alam asonthotsi klemlo, bonta kethi pen thurthuji pu alam athe kopima pusi halatum angbong chethanseibomlo.

¹¹ Ansi halatum alangliphan arjusi pulo, “Aron thekser atum kopi apotsi aphrangke Elijah vang nangji pu puloma?”

¹² Alangli halatum aphan thakdunsi pulo, “Chenamsi Elijah kadokave alam kesikjisi aphrang vangji; bonta Monit a-Sopo kesung pho-o nangji, lapen monit atum alangliphan langremriji pu hastro kopi apotsi puloma?

¹³ Tebonta ne nangtum aphan nangpulang, Chenamsi Elijah ke vang-et-tang-lo, lapen hastro alangli lamjir kepu asonthotsi monit atum aning kehang aling alangliphan klemtang-lo.”

Jisu Inut Hi-i Kepho A-oso Aphan Kepame

¹⁴ Halatum sangho atum along vangsi, armu atum sangho atum aphan kekomjai, lapen aron thekser atum halatum pen lam kechedansei thek-long-lo.

¹⁵ Armu atum Jisu aphan thek-longsi manghuphrong-lo, lapen alangli dung katvirsi kardom chepilo.

¹⁶ Jisu amethang asangho atum aphan arjulo, “Nangtum latum pen kopi alamsi chedanseiloma?”

¹⁷ Armu angbong pen inut abang thakdunsi pulo, “Kuru, neli nangli long neli sopo vanlo, pima alangli hi-i pholoksi lamta ningje un-edet-lo.

¹⁸ Lapen hi-i alangliphan kenep aling hi-i alangliphan longle athak pakrepthor titilo. Anke angho angpip suphlongsi aso pachingkrit titilo, lapen abang chekenghek-titilo. Nangli sangho atum la kepaphlungji aphan neli choningrilo, bonta halatum la phlung un-edet-lo.”

¹⁹ Ansi alangli halatum aphan thakdunsi pulo, “Mai, O kekroikre a-ove! Ne nangtum along kopu ansi nangdodunbom nangjilangma! Ne nangtum aphan kopu ansi ning chepadingbom nangjilangma! Halabangso a-oso aphan nelilong vannon.”

²⁰ Ansi halatum alangli long labangso a-oso vanlo. Hi-i ke Jisu aphan kethek-long pen mamat oso aphan heveng-lo, lapen osoke longle athak krepthorlo lapen angho angpip suphlongsi chardak-lo.

²¹ Jisu labangso a-oso apo aphan arjulo, “Komantu ahut pensi lason keplang-lo?” Alangli thakdunsi pulo, “Bihek ahut pen.

²² Hi-i labangso a-oso aphan kepavirjisi abatai batai me along lapen lang along pakrep-lo. Bonta nangli jongsi un tangte, nelitum aphan ingjinsora neraptha.”

²³ Bonta Jisu alangliphan pulo, “Jongsi un tangte, puha! Kekroi kedo abang ke kadokaveta unlo.”

²⁴ Hala mamat oso apo abang hangsersi pulo, “Neli kroilo. Neli akekroikre an pavetha.”

²⁵ Bonta armu atum kekat pen alanglinat kevangbom thek-longsi Jisu hala kangthirthe ahi-i aphan ingcheksi pulo, “O alam kave lapen ano kangthong ahi-i, ne nangphan hukum pilo, nang labangso a-oso pen nangbarnon lapen labangso a-oso along non pen apara lutdamthuri non.”

²⁶ Halabangso ahi-i hangsersi oso aphan jasemet heveng-lo lapen oso along pen ingtan nangbarlo. Ansi osoke kethitang ason cheplang-lo.

²⁷ Bonta Jisu labangso a-oso aphan otsi ingthurlo, lapen labangso a-oso thurlo.

²⁸ Jisu hem arlo damdet aphi asangho atum alangliphan arjusi pulo, “Netum kopi apotsi labangso ahi-i aphan phlung un-edet-loma?”

²⁹ Jisu halatum aphan pulo, “Lason ahi-i aphan ke Arnam kardom lapen an-kehum pensi phlung unchotji.”

Jisu Amethang Kethiji Alam Batai Hini Aphong Kechethan

³⁰ Jisu lapen asangho atum hadak pen barsi Galili adet dongponputsi damlo, lapen baduta la kechininedetjisi Jisu aning hang-lo. Pima alangli amethang asangho atum aphan thanbomsi pulo.

³¹ “Monit a-Sopo aphan monit arideng hodaidetji, lapen halatum alangliphan pathilotji, bonta nithom aphi alangli rengthusi thurji.”

³² Bonta halatum labangso akethan alam athe chininedet-lo, lapen alangliphan karjujita phereduk-lo.

Akethenei Abang Komatma

³³ Ansi halatum Kapernaum arongsopi nanglelo. Hem arlo damdet aphi Jisu amethang asangho atum aphan pulo, “Mo tovar kevang un ahut nangtum kopi alamsi chedansailo?”

³⁴ Bonta halatum thangta thakdundesi doklip-lo. Pima matsi theneiloma pusi halatum tovar kevang un ahut lam nangchedanseilo.

³⁵ Jisu ingnisi asangho bangkrehini atum aphan amethang adung chehang-lo, lapen pulo, “Mane abang jongsi kethenei abang keplangji aning hang-lo tangte, alangli kebinei abang, lapen kadokave atum aban cheplang nangji.”

³⁶ Ansi alangli inut a-oso ensi halatum angno parjap-lo; lapen la aphan arbaksi halatum aphan pulo,

³⁷ “Badu tame, nemen pen lasonthak thak a-oso inut aphan chak-lote, alangli ke nephan chak-lo; lapen nephan kechak abang aling ke, nephan kali, bonta nephan neketoi abang aphan chak-lo.”

Ehotur Kalidet Abang ke Ebelo Pu Alam

³⁸ Jon Jisu aphan pulo, “Inut amonit nangmen pen hi-i atum aphan kephlung netum thek-long-lo. Alangli ke netum asong amonit kalilo. Lasi netum alangliphan, ‘Nang lason klemri,’ pusi pulo.”

³⁹ Bonta Jisu pulo, “Alangliphan khangri. Pima nemen pen kemang-humeme akam keklem abang ke malomsopet aphi nephan kehingno alam puji, lapu kali.

⁴⁰ Pima ehotur kalidet abang ke ebelo.

⁴¹ Chenamsi ne nangtum aphan nangpulang, nangtum ke nesangholo apotsi nangtum aphan lang harlung isi nangkepi abang aling ke jonghe setta anong-e longledetji, lapu kali.

Pap Kepaklemji Aphan Asat Hei Hei Kevang Alam

⁴² “Badutame la nephan kekroi a-osomar angbong pen inutbak aphan pap paklemlote, alangliphan ke achethok along him kekoi-i a-arlong kethe homra talo along varchui memulo.

⁴³ Lasi nangri jongsi nangphan pap paklemlo tangte, la thanpetnon. Ri hongni pen Chom along, atheke kaita kemepmepin ame herang along kedamnang apar, ri longjong setta chethe angbong kelutdun memu.

⁴⁴ Hadak halatum aphan kecho angthan atum kaita thithe, lapen halatum aphan kecho ame kaita mepme.

⁴⁵ Lapen nangkeng jongsi nangphan pap paklemlo tangte, la thanpetnon. Nangkeng hongni pen nangphan Chom arlo kevarchor apar, nang keng-longjong setta chethe angbong kelutdunlong memu.

⁴⁶ Hadak halatum aphan kecho angthan kaita thithe, lapen halatum aphan kecho ame kaita mepme.

⁴⁷ Lapen nangmek jongsi nangphan pap paklemlo tangte, la hekjok-ra varchornon. Nangmek hini pen nangphan Chom arlo kevarchor apar nangmek isipet setta nang chethe angbong kelutdun memu.

⁴⁸ Hadak halatum aphan kecho angthan kaita thithe, lapen halatum aphan kecho ame kaita mepme.

⁴⁹ “Arnam aphan kethok athok ingti pen kepangthir asonthotsi abangphutin aphanta me pen pangthirji.

⁵⁰ “Ingti ke mesen, bonta la lamdak-lo tangte, la aphan kopusonsi padokthuthekjima? Nangtum aning arlo ingti chepadora ning kangsam penle dorap-rapnon.”