MARK 6 - BAIBEL KANGTHIR (BSI)

Najareth Asor Jisu Aphan Kechakche Alam

¹ Jisu hadak pen nangbarsi amethang arong chevang-lo, lapen asangho atum alangli long dunlo.

² Sabbath Arni alangli sinagog along lam kethanji pangcheng-lo. Hadak monit do-olo, lapen alangli kethan alam arjulongsi halatum manghuphrong-lo. Lasi halatum pulo. “Labangso abang lahei hei alam konatsi long-loma? Alangliphan kopi agiansi pitang-loma? Alangli kopusi la kemanghumeme akam hei hei klemloma?

³ Labangso abang ke hala kapat akimbang-lo, kalima? Alangli ke Meri asopo lapen Jems, Joseph, Judas lapen Simon akortelo, kalima? Lapen alangli ingjir atum ke ladak etum alongsi dolo, kalima?” Lasi halatum alangliphan chakchedet-lo.

⁴ Jisu halatum aphan pulo, “Arnam amontri ke kadokave adimta aman do, bonta amethang arong, adon arap, lapen ahem asangho atum angbong ke aman ave.”

⁵ Hadak keso manene atum aphu athak alangli ari batsi halatum aphan kepame pen apar ke thangnat kemanghumeme akamta klem un-edet-lo.

⁶ Halatum akekroi kave apot alangli manghuhak-lo. Ansi alangli hadak tebok terei arong damsi lam thandamlo.

Jisu Sangho Bang Krehini Atum Aphan Ketoi

⁷ Alangli amethang asangho atum aphan amethang adung chehang-lo, lapen halatum aphan bang hini ni pajalangsi toilo, lapen kangthirthe ahi-i aphan kephlungji ajakong pilo.

⁸ Alangli halatum aphan hukum pisi pulo, “Nangtum chin pen apar ke thangta ponri: him tame, jamborong tame, kalite tangka athia arlo poisa settame, nangtum ponri.

⁹ Bonta keng-op chethonnon, lapen choi asele cheponri.”

¹⁰ Lapen alangli halatum aphan pulo, “Nangtum nohok adimle dam settame, halabangso adim pen barbe tik ke nangtum kelutdam ahemle donon.

¹¹ Jongsi nangtum elong adim vangsi monit atum nangtum aphan chakchelo, lapen nangtum alam arjujelo tangte, hadak pen barra, halatum angno nangtum akengpak aduk cheho tekangnon. Lake halatum aphan kepacheretoi aphanlo.”

¹² Ansi halatum barsi monit atum pap pen aning kecherui nangji alam than pachethang-lo.

¹³ Halatum penang ahi-i phlung-lo, lapen keso amonit penang atum aphan jangthu patipsi keso pamelo.

Jon Baptist Kethi Alam

¹⁴ Herod recho la kadokave alam arjulong-lo; pima Jisu anong bithe bithata chethangphlup-lo. Manene atum pulo, “Jon Baptistsi rengthulo, lasi alangli la kemanghumeme akam hei hei keklemji ajakong long-lo”.

¹⁵ Bonta akaprek atum pulo, “Alangli ke Elijahlo.” Lapen akaprek atum pulo, “Alangli ke Arnam amontri inut-lo, hakoko ahut Arnam amontri atum asonthak thak inut Arnam amontrilo.”

¹⁶ Herod labangso alam arjulongsi pulo, “Alangli ke Jon Baptist-lo. Ne labangso abang angphun pangthantang-lo. Bonta non alangli rengthutang-lo.”

¹⁷ Pima amethang amat toisi Jon aphan panep-lo, lapen ingchin ani pen pakoksi phatek pabeng-lo. Akorte akebi, Philip apiso Herodias pen apotsi Herod alangliphan lapuson klemlo. Pima Herod labangpi aphan enlo.

¹⁸ Atheke Jon Baptist Herod aphan pulo, “Nangli nangli korte apiso aphan en kertang.”

¹⁹ Lasi Herodias Jon aphan aning solo, lapen alangliphan kepathiji aning hang-lo, bonta un-edet-lo.

²⁰ Pima Herod Jon aphan pherebomlang, atheke Jon ke dhoromi lapen ingthir-et amonit-lo pu alangli chinilo. Lasi Herod alangliphan raibomlang. Alangli Jon alam arju long-lote aning siksakpik titilo setta alangli lam karjuji aning dok-lo.

²¹ Aphisi Herodias asoi keme long-lo. Atheke Herod amahang kethek arni chojun amei bisi detpangri amonit thedung atum aphan, chedanbang ahemphu atum aphan lapen Galili adet thedung amonit atum aphan phalo.

²² Halabangso ahut Herodias asopi hem arlo damsi kanlo, lapen Herod lapen alohi atum aning dok-hurlo. Lasi alangli halabangso a-osopi aphan pulo, “Nang ning kehang alingle hangnon, ne la nangpipo.”

²³ Alangli seme tangsi pulo, “Ne seme tangsi pulo, nang nerat achitimle hang setta, ne la nangphan nangpidetpo.”

²⁴ Labangpi ingtan damsi apei aphan charjudamlo, “Ne kopisi hang nangjima?” Herodias thakdunsi pulo, “Jon Baptist aphu.”

²⁵ Hala mamat halabangso a-osopi recho along damseraksi pulo, “Jon Baptist aphu non mamat kasu pen vanra nepinon; ne ning kehang lahelo.”

²⁶ La arjulongsi recho aning aduk doparlo, setta alangli seme tang-lo apotsi lapen alohi atum pen apotsi kroikre haihedet-lo.

²⁷ Lasi alangli hala mamat keton aron-aso inut aphan toisi Jon aphu kevanji ahukum pilo.

²⁸ Chedanbang abang ingtan damsi phatek arlo Jon angphun ingthan damlo, lapen kasu pen aphu vansi halabangso a-osopi aphan pilo, lapen osopike apei aphan la pidamlo.

²⁹ Jon asangho atum labangso alam arjulongsi hadak vang-lo, lapen abang arpum ponsi atipit along bidamlo.

Ketoitang Atum Nangkechevoithu

³⁰ Ansi ketoitang atum nangchevoisi Jisu along chingrumpet-lo, lapen halatum keklemtang akam an lapen kethantang alam an alangliphan thanlo.

³¹ Alangli halatum aphan pulo, “Etum konatne kangsamri, monit kavedet adim damlonang; hadak nangtumta malomso sanglongpo.” Pima hadak kehelatpit atum do-o apotsi halatum an kechoji apor anta longledet-lo.

³² Lasi halatum telong pen kangsamri adim kedamjisi barlo.

³³ Ake-ongpi amonit atum halatum nangkebar thekdunlong-lo, lapen halatum aphan chinilo; lasi kadokave arongsopi pen vangsi kekat pen halatum hadak dam patenolo, lapen Jisu lapen asangho atum aphan apar alanglitum hadak le paphrang-lo.

³⁴ Jisu telong pen che-osi armu ake-ongpi atum aphan thek-long-lo, lapen halatum aphan ingjinsosi aning munduk-lo, pima halatum kevi abang kavedet abiresak atum asonthak thak-lo, lapen alangli halatum aphan penang alam kethanji pangcheng-lo.

Jisu Bang Suri Pho Amonit Aphan An Kepacho

³⁵ Anke apor do-olo apotsi Jisu asangho atum alangli long vangsi pulo, “Ladak ke monit kavedet adimlo, lapen aporta do-olo.

³⁶ Lasi latum aphan padamnon. Hala adung arei arong hei hei along lapen arit along padamra halatum amethang methang kechoji aphan kopinene amar pachonamdam lonang.”

³⁷ Bonta alangli halatum aphan thakdunsi pulo, “Latum kechoji aphan nangtumle kopine pinon,” Jisu thak-lo. Halatum alangliphan pulo, “Netum denari pharo hini ador an ahim namdamsi latum aphan pacho nangjima?”

³⁸ Bonta alangli halatum aphan pulo, “Nangtum along him plang ko-an do? Damra langdamtha!” Halatum langdamsi pulo, “Him plang pho lapen ok jonni do.”

³⁹ Ansi kadokave amonit atum bap kereng ajo kangni chom chomji aphan alangli hukum pilo.

⁴⁰ Halatum bang pharo, lapen bang phokep, lason jalangsi ingnichom chomlo.

⁴¹ Alangli him plang pho lapen ok jonni enlo, lapen sining anat langdingsi ahirjume hang-lo. Lapen him beng-lo, lapen la asangho atum aphan pisi monit atum aphan parontoilo. Ok jonnita alangli kadokave amonit atum aphan paronlo.

⁴² Halatum la chosi ingkrangpet-lo.

⁴³ Lapen halatum ke-ik un-e ahim lapen a-ok ahin pangrumsi ton krehini papleng-lo.

⁴⁴ Hala him kecho atum aphai pinso amonit bang suri pho dolo.

Jisu Lang Athak Kedam

⁴⁵ Jisu hala mamat amethang asangho atum aphan telong pachethapsi hapu parai, Bethsaida arongsopi anat padam patenobomlo. Lapen alangli methang ke armu atum aphan ahem pachedamtoilo.

⁴⁶ Alangli halatum pen chekaksi Arnam kardomdamji aphan inglong arludamlo.

⁴⁷ Arni kangsam ahut Telong ke talo angbongsi dolo, lapen alangli methang ke talo akungsi inutpet dolo.

⁴⁸ Jisu asangho atum telong vekbom vekbomsi dukpik-lo, lake Jisu thek-long-lo. Pima halatum aphan tomon khang-lo. Lasi alangli voku anbak apor ahut talo athak kengkam chejorsi halatum anat vang-lo. Alangli halatum aphan kelitphlotjisi mathalo.

⁴⁹ Bonta halatum Jisu aphan talo athak kengkam kechejor thek-longsi, alangliphan chamburukso tinkok-lo, lapen hangjolo.

⁵⁰ Pima kadokave atumta alangliphan thek-longsi pherelo. Bonta hala mamat alangli ningjesi halatum aphan pulo, “Ning thirklong non; ne lema, phereri!”

⁵¹ Ansi Jisu halatum along telong chethapdunlo, lapen tomon hamdet-lo. La thek-longsi Jisu asangho atum manghuphrong-lo,

⁵² pima bang suri pho amonit atum aphan him kepacho alam athe halatum chininelang; halatum aning buikluihak-huk-lo.

Gennesaret Alongri Jisu Keso Atum Aphan Kepame

⁵³ Halatum talo kapsi Gennesaret alongri nanglelo. Hadak latum telong kokdong-lo.

⁵⁴ Halatum telong pen keche-o ahut pen mamat monit atum Jisu aphan chinilo.

⁵⁵ Lasi halatum halabangso alongri bithe bitha adim damserak-lo; lapen Jisu hadaksi do pu karjulong alingsi alangli long keso atum aphan amethang atar pen rungponlo.

⁵⁶ Lapen alangli kedam aling, rong tame, rongsopi tame, rit-lo tame, halatum keso atum aphan hithi adim bisi, halatum alangli pe abu anchot setta kepa-ot longji aphan choningrilo. Lapen la ke-ot atum an medet-lo.