MARK 4 - BAIBEL KANGTHIR (BSI)

Chili Kerik Alamlir

¹ Jisu puthot talo akung lam kethanji pangcheng-lo. Armu ake-ongpi atum alangli long chingrumlo. Lasi alangli telong chethapsi ingnilo, lapen talo akung pen asapso akehelo an dodamlo, lapen armu kadokave atum ke talo akung lang areisi arjapphrong-lo.

² Alangli halatum aphan lamlir pen penang alam thanlo.

³ Alangli thansi pulo. “Arjutha! Ahut isi inut amonit chili kerikjisi damlo.

⁴ Alangli chili rik-lo, lapen penang achili ke tovar akungsi klolo, lapen vo atum vangsi la chongthok-et-lo.

⁵ Lapen penang achili ke longpak athaksi klolo. Hadak alongle kedo asapnat-lo. Hala mamat la arong vang-lo, pima lake alongle kedo ing-ar-olo.

⁶ Ansi arni vang-lo, lapen sok aklim angkur kedam arnuk-o-edet apotsi arni angtang pen ajok la thikhrailo.

⁷ Penang achili ke ingsu kethe ajosi klolo, lapen ingsu arong thesi labangso aklim aphan pet-het-lo, lapen la athe pathethedet-lo.

⁸ Bonta penang achili ke longle keme ajosi klolo. La arong vang-lo lapen arong thesi athe pathe-olo. Arong pen arong ke thomkep, arong pen arong ke throk-kep lapen arong pen arong ke pharo anta athe pathelo.”

⁹ Lapen alangli pulo. “Karjuji ano kedo abang parjunang.”

Lamlir Alam Athe Kethan

¹⁰ Jisu inutpet kedo ahut alangli long kedo atum hala bang krehini atum pen pen vang-lo, lapen lamlir alam athe hei hei kechinijisi alangliphan arjulo.

¹¹ Jisu halatum aphan thakdunsi pulo. “Arnam a-Rat alamjir akepatu alam nangtum aphan nangpitang-lo, bonta hala ingtan kedo atum an aphan ke lamlir pensi kadokave alamta putang-lo.

¹² Lasi, ‘Latum langbom langbom setta thek-longle, latum arjubom setta chinine. Lapu kali asonte, latum aning chiruisi, Arnam pen diya longji apot-lo.’ ”

Chili Kerik Alamlir Alam Athe Kethan

¹³ Ansi Jisu halatum aphan arjulo, “Nangtum labangso alamlir chininema? Tangte nangtum kopusi akaprek alamlir chinijima?

¹⁴ Chili kerik abang ke Arnam alamsi rik-lo.

¹⁵ Penang amonit atum ke tovar akung keklo achili asonthak thak-lo. Halatum la kepachethang alam karjulong pen mamat Soitan vangsi halatum aning arlo kerik alam an ponpo.

¹⁶ Lasonthak thaksi akaprek penang atum ke hala longpak athak keklo achili asonthot-lo. Halatum la kepachethang alam karjulong pen mamat aning arong pen la dengpo;

¹⁷ bonta halatum angkur kedam arnuknedet apotsi malomso ahut ansi la dochotpo. Ansi labangso alam pen apot kesung, kalite, kechenek vang-lote, halatum hala mamat la obuppo.

¹⁸ Lapen akaprek atum ke ingsu arong kethe ajo keklo achili asonthak thak-lo. Latum la kepachethang alam arjupo,

¹⁹ bonta labangso akai aningbi hei hei, lapen keplang kar-i lapen akaprek kaprek ason akar-i dosi kepachethang alam aphan petthippo, lapen la athe pathethedetpo.

²⁰ Bonta akaprek atum ke longle keme ajo keklo achili asonthak thak-lo. Latum la kepachethang alam arjupo, lapen dengpamesi athe pathepo. Abang pen abang ke thomkep, abang pen abang ke throk-kep, lapen abang pen abang ke pharo anta athe pathepo.”

Hoton Arum Kebi Amelur Alam

²¹ Jisu halatum aphan pulo, “Melur vansi hoton arum, kalite hongplang arum bijima? Lake melur archok athaksi batji, kalima?

²² Kepatu amar an aphan paklangdetji, lapen kedip ason an aphan paklangdakji.

²³ Karjuji ano kedo abang parjunang!”

²⁴ Alangli halatum aphan puthulo, “Nangtum karjulong alam matha-pamenon. Nangtum keteng atengthotsi nangtum aphanta tengthudetji, lapen nangtum aphan la apar ta pithudetji.

²⁵ Pima mar kedo abang aling aphan ansose pithudetji, lapen thangta kavedet abang pen do-an amarta thiponthudetji.”

²⁶ Jisu puthulo, “Arnam a-Rat lapuson helo: Inut amonit amethang arit ajo chili rik-lo.

²⁷ Ajo anerlota, alangli amek jang-lotsi do tame kalite thurphlutsi do settame, chili ke arong vangsi thelo. Bonta la kopusonsi plang-loma, lake alangli chinidundelo.

²⁸ Longle amethangsi la aklim aphan pathebomsi athe padolo; aphrangsi ke la arong vangsi chingjok-lo, ansi la philo, lapen aphisi ke la athe pathelo.

²⁹ Bonta sok athe mensi alangli nokek rangso pen la kerotji pangcheng-lo; pima sok kerot apor nangletang-lo.”

Hanjang Amu Alamlir

³⁰ Jisu arjusi pulo, “Etum Arnam a-Rat aphan kopi pensi pangbar unjima? Kalite kopi alamlir pensi than pajirmidamjima?

³¹ Lake hanjang amu asonlo. Longle athak kerik ahut ke la pirthe athak kadokave amu apar bimulo.

³² Bonta rikdet aphi la arong vangsi han arong an angbong kethenei arong plangpo, lapen la aro kethe kethe dopo. Lasi nampi avo atum vangsi labangso aro along atar chepatarpo.”

³³ Lasonthak thak akaprek kaprek penang alamlir pensi Jisu halatum aphan pachethang-lo. Alangli halatum kechini unchit alamsi thanlo.

³⁴ Alangli lamlir penpete halatum aphan thanthedet-lo; bonta bang kaprek atum kavedet ahut ke alangli amethang asangho atum aphan kadokave alamta than pachinidak-lo.

Jisu Tomon Kepaham

³⁵ Halabangso arni, arni kangsam ahut Jisu amethang asangho atum aphan pulo. “Ili ha parai damlonang.”

³⁶ Halatum armu atum pen chekaksi Jisu kechethap atelong along hala-tumta chethapdunlo, lapen halatum alangliphan ponlo, lapen akaprek atelongso atumta alangli long dunlo.

³⁷ Ansi tomon thepi vangphlut-lo, lapen lang angsum thursi telong aphan arvakthip-lo. Lasi halabangso ahut telong ke lang pen plengrang-lo.

³⁸ Jisu ke telong aphi akandar anat puhui chepuhuisi amek jang-lot-lo. Ansi halatum alangliphan ingthursi pulo. “Kuru, netum virklungpo pu nang mathathema?”

³⁹ Jisu amek prangsi thurlo, lapen tomon aphan ingchek-lo, lapen talo aphan pulo, “Dojoinon, huriri!” Anke tomon hamsi ingsamklip-lo.

⁴⁰ Ansi Jisu amethang asangho atum aphan pulo. “Nangtum kopi apotsi phere loma? Nangtum akekroi avelangma?”

⁴¹ Bonta halatum jasemet pherelo, lasi halatum lahin lahin chepulo, “Labangso amonit komatma? Tomon lapen talota alangli lam kroilo.”