Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

LEVI 9 - BAIBEL KANGTHIR (BSI)


Aaron Athok-heihei Kepi

1 Kebat aron tangdet puthot arni, Aaron lapen asopomar lapen Israel ajalin atum aphan Moses hangpet-lo.

2 Alangli Aaron aphan pulo, “Chainong aloso lapen aju-kavepin abiresak alo ejon ponnon, lapen lahei Hemphu aphan athok pajirnon, chainong ke pap athok aphanlo, lapen biresak alo ke kephrin athok aphanlo.

3 Anke Israel atum isi apap athok paponji aphan bi alo ejon lapen kephrin athok aphan ningkan isi achainong aloso ejon, lapen ningkan isi abiresak aloso ejon aju kavepin paponnon,

4 lapen kejelang athok aphan chainong alo ejon lapen biresak alo ejon paponnon. Latum lahei Hemphu aphan jangthu pen kepatip sok-sang athok penpen pinangji. Latum la klemvek nangji pima pini Hemphu nang cheklangpo.”

5 Moses kepi ahukum ateng latum Pehem athengno vanpet-lo, lapen Hemphu aphan karchojisi kedo-an arat atum hadak chingrumpet-lo.

6 Moses pulo, “Nangtum lahei keklemji aphansi Hemphu hukum pilo, anke alangli kedo keturbong akethe-ang nangtum aphan nang-cheklangpo.”

7 Anke alangli Aaron aphan pulo, “Dovan along damra, nangtum apap lapen rat apap kechamjile pap athok lapen kephrin athok pajirdam non. Hemphu hukum kepi ateng laso athok rat apap kechamji aphanle pajirnon.”

8 Dovan along Aaron damlo, lapen amethang apap athok aphan chainong aloso pathilo.

9 Asopomar atum alangliphan vi vanpilo, lapen alangli richimun la along nimsi dovan akung anu along ajehak hilo, lapen ahin an ke dovan aling along la dung-et-lo.

10 Anke dovan athak athu, ahambi-heihei, lapen angthin akemenei aphar Moses aphan hukum kepi ateng alangli phrinlo.

11 Bonta a-ok lapen areng ke mukam angtansi alangli phrinlo.

12 Alangli amethang kephrin athok aphansi pi pathilo. Alangli sopomar atum alangliphan vi vanpilo, lapen alangli la dovan konaphli along dung-et-lo.

13 Latum alangliphan pi aphu lapen akaprek athan ta pajirlo, lapen alangli lahei dovan athak phrinlo.

14 Anke aphek-angthin alangli cham pangthirlo, lapen aphi akeng hongnita chamlo, lapen lahei dovan athak kephrin athok athak an phrinlo.

15 Labangso aphi, rat athok-heihei alangli pilo. Rat apap athok aphan alangli bi ponlo, lapen la pathilo, lapen alangli methang apap athok aphan keklem asonthotsi la athok pajirlo.

16 Alangli kephrin athok aphan pi vanlo, lapen aron ateng pen la athok pilo.

17 Alangli soksang adan pilo, lapen chekip isi ahim aduk ensi dovan athak la phrinlo. (Lake kaike kephrin athok apar-si kepilo.)

18 Rat atum akejelang athok aphan alangli chainong alo lapen biresak alo ta pathilo. Alangli sopomar atum alangliphan vi vanpilo, lapen la alangli dovan atok-phli along thok-lo.

19 Chainong lapen biresak athu athan-heihei Aaron ke

20 pi aningthang athak si bat-lo, lapen la kadokaveta dovan along pon-et-lo. Alangli dovan athak athu phrinlo,

21 lapen aningthang lapen aphi akeng ar-e ahong kurusar atum apharman isi Hemphu aphan kepanong adan pura Moses aphan hukum kepi ateng pilo.

22 Aaron kadokave athok kepi pajut-et aphi, alangli ri rat aputhak chirungsi pahirjumelo, lapen nangsunlo.

23 Moses lapen Aaron atum Hemphu kedo A-pehem arlo lutdamlo, lapen latum nangkebar ahut latum rat aphan ahirjume pilo, lapen kadokave arat aphan keturbong Hemphu akethe-ang nangklang-lo.

24 Menmen amat Hemphu me nangtoilo, lapen la kephrin athok lapen dovan athak athu athan-heihei cho-et-lo. Rat atum la thek-longsi, kadokaveta hangprak-lo, lapen halatum amahang longle patongbaksi ardomlo.

Karbi Holy Bible © Bible Society of India, 2010.

Used by permission. All rights reserved worldwide.

Bible Society of India
ကြှနျုပျတို့နောကျလိုကျပါ:



ကြော်ငြာတွေ