LEVI 8 - BAIBEL KANGTHIR (BSI)

Aaron Lapen Alangli Sopomar Atum Aphan Kehodai

¹ Moses aphan Hemphu pulo,

² “Ne kedo A-pehem ajakan along Aaron lapen asomar atum aphan ponnon lapen kurusar ape-ari, kehi ajangthu, pap athok aphan chainong aloso, biresak alo jonni, lapen thap kave ahim aton vannon.

³ Lapen hadak rat kedo-an aphan pangrumnon.”

⁴ Hemphu hukum kepi atengsi Moses klemlo, lapen rat atum kechingrum ahut,

⁵ halatum aphan alangli pulo, “Non ke Hemphu hukum nekepitang asonsi ne keklempo.”

⁶ Aaron lapen asomar atum aphan Moses vanlo, lapen ke latum aphan aron ateng pen lang kechinglura kechepangthirji aphan pulo.

⁷ Alangli Aaron aputhak choi lapen choikeding pangchoilo, lapen avamkok arita kok-lo. Alangli la aphan sangkelang a-arlong pachingthang-lo, lapen avam along kethak paphirsoni arri pen kok-lo.

⁸ Alangli la aphan aning aden pangchoilo, lapen la arlo Urim lapen Thummim thap-lo.

⁹ Alangli la aphu athak poho phung-lo, lapen la athengno ser eplang lake kehodai pangthir angthek, Hemphu hukum kepi ateng, pa-ilo.

¹⁰ Anke kepatip ajangthu Moses ensi Hemphu kedo A-pehem arlo la bilo, lapen la along kedo-an asontin bilo, lason alangli kadokave ta Hemphu aphan hodaipet-lo.

¹¹ Ajehak ajangthu alangli ensi, la batai throksi dovan athak arsilo, lapen Hemphu aphan kehodaijisi dovan ajohton lapen phumang lapen la aklong aden aputhak arsilo.

¹² Alangli Aaron aphuthak kepatip ajangthu kedung pen ajok Aaron aphan kam bat-lo.

¹³ Adunthu, Aaron asomar atum aphan Moses vanlo, lapen latum aphan choi pangchoilo, avamkomchen vamkok kok-lo, lapen latum aphu athak phutup kup-lo, Hemphu hukum kepi ateng-lo.

¹⁴ Anke chainong aloso pap athok aphan Moses vanlo, lapen la aphu athak Aaron lapen asopomar atum ari bat-lo.

¹⁵ La Moses pathilo, lapen ajehak avi ensi dovan anu along arichimun pen la kehodaijisi hilo. Vi ahin an ke alangli dovan aling dung-et-lo. Lapusonsi alangli la hodailo lapen la pangthirlo.

¹⁶ Aphek komchen athu an alangli enlo, angthin akemenei aphar, lapen ahambi-heihei kechebon athu penpen, lapen la alangli dovan athak phrinlo.

¹⁷ Ahin a-ok an, la areng, a-ok, aphek-angthin-heihei, alangli ensi Hemphu hukum kepi ateng pen mukam angtan si la phrin damlo.

¹⁸ Adunthu, kephrin athok aphan Moses biresak alo vanlo, lapen Aaron lapen asopomar atum la aphu athak ari bat-lo.

¹⁹ Moses la pathilo, lapen la avi dovan anophli along arsilo.

²⁰ Lapen biresak a-ok ingthan-et aphi, Moses ke aphu, a-ok athan lapen athu me phrinlo.

²¹ Aphek-angthin lang pen cham et aphi, dovan athak biresak arpum kangthim Moses me phrinlo, la kephrin athok-lo, lapen angnim Hemphu aningdok-lo, Hemphu aphan isi me kephrin athok Hemphu kepi ahukum ateng-lo.

²² Anke adun abiresak alo Moses vanthulo, la ke kurusar atum aphan kebat aphanlo, Aaron lapen asopomar atum ari la aphu athak bat-lo.

²³ La Moses pathilo, lapen ajehak avi ensi Aaron ar-e ano anonam along hilo, lapen ar-e arimunpo along hilo, lapen ar-e ano anonam along hilo, lapen ar-e arimunpo along hilo, lapen ar-e akeng munpo along hilo.

²⁴ Anke alangli Aaron asopomar atum aphan vanlo, lapen latum ar-e anonam along, arimunpo ar-e along, latum ar-e akengmunpo along vi hilo. Ahin avi an Moses dovan bithe-bitha chordut lo.

²⁵ Athu, arme athu, aphek-angthin ketelom athu an, kemenei angthin aphar, ahambi athu penpen alangli enlo, lapen aphi akeng ar-eta enlo.

²⁶ Lapen Hemphu aphan kehodaitang thap kave ahim aton pen alangli him eplang, lapen jangthu pen kepangdang ahim eplang, lapen himkedok eplang enlo, lapen lahei athu athak bat-lo, lapen ar-e akengta athak bat-lo.

²⁷ Lahei kecho amar alangli Aaron lapen asomar atum arideng pilo, lapen alanglitum Hemphu aphan isi kepanong adan asonsi pajirlo.

²⁸ Anke halatum pen Moses kecho amar enlo lapen dovan athak la phrinlo, la kephrin athok athaksi lo, lapen la isi kehodai adanlo. La ke isi kecho amar adanlo, lapen la angnim Hemphu aphan aningpadok lo.

²⁹ Anke aningthang Moses ensi Hemphu aphan isi kepanong adan ason pilo. La ke Moses ahin pen kehodai biresak a-ok-lo. Hemphu hukum kepi atengsi Moses asontin ta klempi-et-lo.

³⁰ Ajehak kepatip ajangthu lapen dovan along kedo ajehak avi Moses ensi lahei Aaron lapen asopomar atum aphuthak lapen ape-ari along hilo. Lasonsi alangli latum aphan lapen latum ape-ari Hemphu aphan pangthirpilo.

³¹ Aaron lapen asopomar atum aphan Moses pulo, “Hemphu kedo apehem ajakan along ok ponra la up non lapen Hemphu hukum kepi ateng kebat athok aton along kedo ahim penpen hadak amat la chodet non.

³² Ahin kedo-an a-ok mate ahim setame me phrindutnon.

³³ Nangtum aphan kebat aron jutjetik, nithroksi an Pehem ajakan o-ri non.

³⁴ Nangtum apap kechamji aphansi pini etum keklem ason ke Hemphu etum aphan hukum ekepilo.

³⁵ Pehem ajakan along ni throksi an Hemphu ahukum klemra donangji. Nangtum jongsi klemkle pulote, nangtum thiji. La Hemphu-si nephan hukum pilo.”

³⁶ Lasonsi Moses aphan Hemphu hukum kepi asontin Aaron lapen asopomar atum klemlo.