LEVI 19 - BAIBEL KANGTHIR (BSI)

Kangthir Lapen Ahok-akangsai Aron-heihei

¹ Israel arat atum aphan kepa-thanjisi Moses aphan Hemphu pulo.

² “Chepangthir-ettu, pima, Ne nang Arnam, Hemphu ingthir-et.

³ Nangtum abangphutinta nangpei lapen nangpo aphan aman pitu, lapen Kesang arni rimtu, Ne hukum nangkepitang ateng. Nesi nang Arnam Hemphu-lo.”

⁴ Nephan ne-ori, lapen kumlin-heihei archori; tasam pen arnam-heihei selamri lapen lahei aphan archori. Nesi nang Arnan Hemphu-lo.

⁵ Kejelang athok aphan nangtum pi kepathi ahut, Ne nangtum aphan nangkepi aron atengpen klemnon, lapen Ne athok dengpo.

⁶ Ok ke pi kepathi arni kalite puthot arni si cho nangji. Nithom an kepahin a-ok ke me phrindut masi,

⁷ pima la aron ateng pen ingthirthelo, lapen badutame la kecho aling, Ne la athok dengdelo.

⁸ Badutame la kecho aling abang nephan kepi ason ningjoinolo pusi kematha abang-lo, lapen la Nerat aso lo pu Ne lakhakhelo.

⁹ Nang hidi sok rot lote, sok abu an rot-ri, lapen ke-otang aser kephangji aphan damrinon.

¹⁰ Kelik ahut kelangkai mate arum keklo adrakha ajo kelikdamji aphan drakha ajo chedamthuri; lahei keduk mate bang adet aso aphan bi pinon. Athema Nesi nang Arnam Hemphu-lo.

¹¹ Chonghuri mate pachoreiri mate pachobeiri.

¹² Nang jongsi nanglam chebi ninghanghe pulote Ne men pen semetangri; la pen ajok Ne men aputhak nong kejuno vanpo. Neke nang Arnam Hemphu-lo.

¹³ Badu aphanta pasungri mate amar thi ri. Nang kam kepaklem amonit anam khangri, ejo-natta khangri.

¹⁴ Anokangthong amonit aphan hirjuno piri, mate amekkave angno pine kepatekungji aphan bi ri. Nephan pherenon; Ne ke nang Arnam Hemphu-lo.

¹⁵ Ahokpet lapen athikpet che-plangtu lam kangsai ahut; keduk abangphan abedun-ri mate keplang abangphan phereri.

¹⁶ Bang alam chobei pen pachethangtap-ri, lapen mane apran alam aphuthak kangsai dolote pine nang haki pen kerapdun-un ason dote ningjedun tame. Ne helo Hemphu-lo.

¹⁷ Badu aphuthakta ning kehingno chebiri, bonta halabangso amonit pen kopima akeprek ason chepamenon, anke alangli pen apot nang pap klemklelo.

¹⁸ Badu aphuthakta alar huiri mate hijimbom-ri, bonta nangdung atum aphan nangmethang kechinghon asonthot-le chinghonnon. Ne ke Hemphu-lo.

¹⁹ Nehukum-heihei kroinon. Kepang-reng api jatni aso papunrinon. Hidi elongnat along jatni athengpi eri. Jatni ahon pen kethak ape chingthang-ri.

²⁰ Inut abanpi jongsi kechinitang inut apinso ke-enpangtar apisolo pulote lapen la aphan anam pipelang lapen pajoktang-lote, lapen mane apinso bangpi pen irap-rap-lote, latum aphan adukpipo, bonta pathithelo, pima bangpi ke banpi.

²¹ Pinso abang kechetu athok aphan Ne Kedo A-pehem ajakan along biresak aloso vanpo,

²² lapen la pen pinso apap kepakakjisi kurusar abang aron ateng kepangthir ji akam klempo, lapen alangliphan Arnam diyadetpo.

²³ Nangtum Kanaan adet arlo kevang ahut lapen ajat jat athengpi arong ke-e ahut, langnon kecheng ningkan kethom ke aron ateng pen athe ingthirthelo. Laso esek nangtum la chochedet masi.

²⁴ Phli aningkan si Ne Hemphu aphan nangtum kechematha ning-aro kedo angthek athe hodaisi dan nepipo.

²⁵ Bonta pho aningkan nangtum athe cholongpo. Nangtum jongsi lahei klemlote nangtum athengpi athe ongmuchotpo. Nesi nang Arnam Hemphu-lo.

²⁶ Avi kedo a-ok jonghe seta chori. Mekbin akam chesekeri.

²⁷ Nangphu akung achu chesoiri mate nang ingmum ano chingtip-ri,

²⁸ mate kethitang amonit apot nangbang chesiri-ak nangnelo, lapen akri chetok nangnelo. Ne Hemphu-lo.

²⁹ Nangsopimar atum aphan kardom ahem abeisapi kepaplang pen ajok latum aphan aman padamphak-rinon; nang jongsi klemlote nang akaprek a-arnam-heihei anat suirongpo lapen det angbong a-ot-kave pensi plengsetpo.

³⁰ Kesang-arni rimnon, lapen nephan karcho adim aman pinon. Ne Hemphu-lo.

³¹ Kethitang akarjong aphan karju kepaludep atum along akepare alam aphan damri. Nangtum jongsi klemlote nangtum aron ateng pen ingthirthelo. Ne nangtum a-Arnam, Hemphu-lo.

³² Arleng kesar atum aphan aman pinon lapen nephan man pipik pen nekroinon; Ne Hemphu-lo.

³³ Nangtum adet along kedo bang-adet-aso aphan langrop-ri.

³⁴ Latum aphan nangkorte Israel aso asonthot-le langnon, lapen latum aphan nangmethang kechinghon asonthot-le inghonnon. Chematha non, nangtumta ehut isi Ijip adet along bang adet amonit-lo. Ne helo nangtum a-Arnam Hemphu-lo.

³⁵ Ahok-he kepun-i, kelin-i, aphai ke-en-i ateng pen badu aphan ta chobeiri.

³⁶ Ahokpet alinle mate athuli rimnon, ahokpet a-arlong alinle rim non, lapen ahokpet apunle ennon. Ne helo nang Arnam Hemphu-lo, lapen Nesi nangtum aphan Ijip adet pen nangkevan a-Bang-lo.

³⁷ Ne aron do-an lapen hukum kedo-an kroipetnon. Ne Hemphu-lo.