LEVI 15 - BAIBEL KANGTHIR (BSI)

A-ok-Abang Pen Kangthirthe Ason Kebar

¹ Moses lapen Aaron Israel atum aphan kepathanjisi Hemphu kepi aron lahei helo.

² Inut amonit jongsi a-ok kangduk pen atini nangchon lote, la atini ingthirthelo,

³ La atini vangbom seta ateni ahin vang un-era chepa-op-het seta ingthirthelo.

⁴ Alangli kebe mate kangni ahongplang ta ing-thirthetang-lo.

⁵ Mane jongsi alangli hongplang papholote,

⁶ mate bangpo abang kangni adim ingni lote, kemesen abang ape-ari chechok masi lapen lang chinglu masi, lapen arni kangsam an alangli ingthirthedettang-lo.

⁷ Bangpo aphan atini penpen ke-ot abang ape-ri chechok nangji lapen lang chinglu nangji lapen arnikangsam an ingthirthesi do nangpo.

⁸ Atini kedo amonit jongsi arongpen ingthir-et abangphan ingthok lote kepho abang pe-ri chechok masi lapen lang chinglusi arnikangsam an ingthirthesi donangji.

⁹ Atini kevang abang kangni aling adim ingthirthe-tang-lo.

¹⁰ Keso abang kangni adim ke-ot abang aling arnikangsam an ingthirthetang-lo. Keso abang kangni ason kepon aling abang pe-ri chechok nangji lapen langchinglusi arnikangsam an ingthirthera do nangji.

¹¹ Keso abang jongsi ari aphrang charsamsera ot-lote halabangso abang ape-ri chechok masi lapen lang chinglusi arnikangsam an ingthirthepen donangji.

¹² Bangso abang ke-ot alongle aphule an paphuk-etnangji, lapen thengpi aharlung la ke-ot amar an cham-et nangji.

¹³ Atini kevang abang keso melote, alangli nithroksi inghong masi, ansi alangli ape-ari chechokpo lapen langkeme pen langchinglu po, lapen alangli aron atengpen ingthir-etpo.

¹⁴ Nerkep arni alangli vothung jonni kalite thungpharlo jonni Hemphu kedo a-Pehem ajakan anat ponpo, lapen lahei kurusar aphan pipo.

¹⁵ Kurusar abang ejon ke pap athok ason pipo, lapen ajon kaprek ke kephrin athok pi-ipo. Lasonsi halabangso amonit apharman alangli aron atengpen kepangthir akam klempo.

¹⁶ Mane apinso achili chonlote, alangli abang kangthim lang chinglu masi, lapen alangli ha arnikangsam an ingthirthesi do nangji.

¹⁷ Achili keklo ape mate ok-reng tame champangthir-et nangji, lapen la ha arnikangsam an ingthirthetang-lo.

¹⁸ Pinso arlo dim-tar pasidet aphi pinso arlota lang chinglu nangji lapen latum ha arnikangsam an ingthirthelo.

¹⁹ Inut a-arloso jongsi alangli achiklo avi chon lote, alangli nithroksi an ingthirthetang-lo. Bangpi aphan kepapho aling arnikangsam an ingthirthetang-lo.

²⁰ Bangpi achiklo avi kechonbom un ahut kangni mate ketebe amar an ingthirthelo.

²¹ bangpi ahongplang mate kangni adim ke-ot abang aling ape-ri chechok nangji,

²² lapen lang chinglu nangji, lapen arnikangsam an ingthirthesi do nangji.

²³ Bangpi hongplang athak mate nahok-le ingni mate bangpi ke-ot adim an kangni mate ke-ot aling abang arnikangsam an ingthirthetang-lo.

²⁴ Inut abangpo jongsi bangpi achiklo avi kechon esek bangpi pen dim-tar pasilote bangpota bangpi kangthirthe along ingthirthe rappetpo, lapen nithroksi an ingthirthe-detpo, lapen bangpo ketebe aling ingthirthelo.

²⁵ Inut abangpi jongsi achiklo avi kebu apar ongdung arni an vi bulote, mate achiklo avi kebu asek litsi bubomlote, vi butik an alangli ingthirthetang-lo, lake alangli achiklo avi kebu ahut ason lo.

²⁶ Lason ahut bangpi ketebe mate kangni amar an ingthirthetang-lo.

²⁷ Lahei amar aputhak ke-ot abang aling ing-thirthelo, lapen alangli pe-ri chechok nangji lapen lang chinglu nangji: la arnikangsam an ingthirthesi donangpo.

²⁸ Bangpi vi kebu ington lote, bangpi nithroksi inghong nangji, ansi bangpi aron atengpen ingthirji.

²⁹ Ninerkep arni bangpi vothung jonni kalite thungpharlo jonni Hemphu Kedo a-Pehem ajakan anat kurusar along ponpo.

³⁰ Kurusar abang ejon ke pap athok lapen akaprek ke kephrin athok pi-ipo, lapen lasonsi alangli bangpi apharman aron ateng pen kepangthir akam klempo.

³¹ Israel arat atum kangthirthe aputhak kepachereji aphan Hemphu Moses aphan pulo, anke latum mukam angbong kedo alangli Kedo A-pehem pasa-ur-elo. Latum jongsi pasa-urlote latum aphan pathilotpo.

³² Lahei helo inut apinso atini kechon mate achili kechon lapen

³³ inut abangpi achiklo avi kechon mate lason kangthirthe abangpi pen pinso atum dim-tar kepasi atum aputhak aron lo.