LEVI 13 - BAIBEL KANGTHIR (BSI)

Reng Amek Keso Aputhak Aron-heihei

¹ Moses lapen Aaron aphan Hemphu lahei aron pilo.

² Mane abang jongsi areng along amek mate ingthum mate menvok pen ajok pherememe areng amek ke plangji pulote, alangli Aaron aro akurusar atum along van nangpo.

³ Kurusar abang amek langpo lapen jongsi la along kedo angmi lokphlelo pulote lapen amek adung arei areng apar arnuk muchot pulote, la ke kepherememe areng amek-lo, lapen bangpo aphan kurusar abang ingthirthelo pu pachethangpo.

⁴ Bonta amek jongsi lokphle lapen la adung arei areng apar arnuk muchot kali pulote lapen areng angmita lokphle-phle pulote, bangpo aphan kurusar ni throksi elong adim padovetpo.

⁵ Throksi arni kurusar abang puthot langthupo, lapen jongsi alangliteng ke amek aphrang ateng lapen kamke pulote alangliphan alangli puthot nithroksi kedo paprekdakpo.

⁶ Puthot nithroksi arni bangpo aphan kurusar langthupo, lapen amek kreng-lo lapen la ingdakdelo pulote, alangliphan aron atengpen ingthir-et-lo pu alangli pachethangpo; la ke amek chot-lo. Abangphu abang ape-ari chechokpo lapen aron ateng pen chepangthir-etpo.

⁷ Bonta kurusar abang la aphan langdet aphi lapen ingthir-et-lo pu pachetheng-et aphi amek ingdakbom pulote, alangli puthot kurusar angno cheklang nangji.

⁸ Kurusar abang alangliphan puthot langthupo, lapen jongsi la ingdak bomlang pulote, la aphan alangli ingthirthelo pusi pachethangpo; lake si-i akesolo.

⁹ Mane jongsi si-i akeso cholong-lok-lo pulote, alangliphan kurusar along vandet nangpo,

¹⁰ alangliphan alanglisi langpo. Jongsi alangli reng athak lokphle amek do, lapen areng angmita lokphle, lapen atini saide pulote,

¹¹ lake keme un-e areng amek-lo. Kurusar abang alangliphan ingthirthe pu pachethangpo; ladak alangliphan kebi paprekviji akenang avelo, pima alangli ke ingthirthelo pu chinilorlo.

¹² Jongsi areng amek ingdakbomsi aphu pen akeng an dipthip pulote

¹³ alangliphan kurusar abang puthot langthupo. Abang bithe anta kedipthip-lo pu alangli thek-longle te alangliphan alangli aron atang pen ingthir-et-lo pu pachethangpo. Alangli reng kadokaveta lokphlelo pulote, alangli aron ateng pen ingthirtang-lo.

¹⁴ Bonta akaprek amek nangkebar pen la ingthirthetang-lo.

¹⁵ Alangliphan kurusar langthupo, lapen alangli akaprek amek keklang thek-long-lo pulote la ingthirthelo pu pachethangpo. Akaprek amek nangkeklang lo pulote la ke si-i akesolo, lapen halabangso amonit ke ingthirthelo.

¹⁶ Bonta amek medet-lo lapen puthot lokthuphlelo pulote bangpo abang kurusar along dam nangpo,

¹⁷ alanglisi la aphan puthot langthupo. Jongsi amek lokphlelote, la aron ateng pen ingthirtang-lo, lapen kurusar abang alangliphan ingthirtang-lo pu pachethangpo.

¹⁸ Mane abang jongsi ingthum dolo lapen la medet-lo,

¹⁹ lapen ingthum along jongsi aphi alangthing kelok mate isi ke-etjo angthek dokok pulote alangli kurusar along damnangpo.

²⁰ Alangliphan kurusar si langpo, lapen jongsi adung arei areng apar angthek arnuk muchot pulote lapen la along kedo angmi lokphlelo pulote, alangli ingthirthetang-lo pu pachethangpo. La ke ingthum along si-i akeso kelong kecheng-lo.

²¹ Bonta kurusar abang la lang-lo, lapen la along kedo angmi lokphlephle lapen adung arei areng apar arnukne, bonta khaikhelang pulote, alangliphan kurusar abang nithroksi kepado paprekvipo.

²² Jongsi angthek kambom, kurusar abang la aphan ingthirthe lo pu pachethangpo; alangli keso kecholong abang-lo.

²³ Bonta la prekpre lapen kamke, la ke ingthum angpramchot pulote kurusar abang alangliphan aron atengpen ingthir-et pusi pachethangpo.

²⁴ Mane aphan me cholo lapen a-ok lokpok-lo mate etjolo pulote,

²⁵ kurusar alangliphan langpo. Jongsi amek along kedo angmi lokphle lo lapen la adung arei areng apar arnuk muchot pulote la ke me kecho along si-i akeso kecheng-lo, lapen la aphan kurusar abang ingthirthelo pu pachethangpo.

²⁶ Bonta la along kedo angmi jongsi lokphlephle pulote, lapen la adung arei areng apar arnuk muchotche bonta ing-armuchot pulote, kurusar abang la aphan nithroksi kebi paprekpo.

²⁷ Throksi arni kurusar abang la aphan langthupo, lapen jongsi la ingdakbom pulote, la ke si-i akesolo, lapen kurusar abang la aphan ingthirthetang-lo pu pachethangpo.

²⁸ Bonta angthek prekpre lapen la ingdangde, lapen areng ing-arphle pulote, la ke si-i akeso kali. Kurusar abang la aphan aron ateng pen ingthirtang-lo pu pachethangpo, pima la ke me kecho angpramchot.

²⁹ Mane inut apinso mate a-arloso aphu along kalite angbip along amek dolote,

³⁰ kurusar la langpo. La jongsi adung arei areng apar arnuk muchot lapen la along kedo angmi-heihei etjo lapen ing-arphle pulote la ke si-i akesolo, lapen bangso aphan ingthirthelo pusi alangli pachethangpo.

³¹ Jongsi kurusar la aphan kelang ahut amek adung arei areng apar arnuk muchotche, bonta la along kedo angmi ingtangphrophre, alangli la aphan nithroksi an kebi paprek dakpo.

³² Throksi arni kurusar abang amek puthot langthupo, lapen la ingdangdelo lapen la along kedo angmi etjojelo, lapen la adung arei areng apar arnuk muchot kalilo pulote,

³³ bangso abang amek adang palomvi-si achu chesoi-etpo. Kurusar abang puthot alangliphan nithroksi bi paprekvipo.

³⁴ Throksi arni kurusar abang amek langthupo, lapen la ingdangdelo, lapen adung arei areng apar amek arnuk muchotche lote alangli la aron atengpen ingthir-et abang pu pachethangpo. Bangso abang ape-ari chechokpo, lapen la ingthir-et po.

³⁵ Bonta la aphan ingthir-et-lang pu pachethangdet aphi amek ingdangbom pulote,

³⁶ la aphan kurusar abang puthot lang thupo. Jongsi amek ingdangbomlang, ke-etjo angmi aphan alangli lang nangnelo; bangso abang thek-lorsi ingthirthetang-lo.

³⁷ Bonta kurusar ateng pen amek ingdangde, lapen la along kangtangphro angmi chingjokbomlo, pulote amek metang-lo, lapen kurusar abang la aphan aron atengpen ingthir-et-lo pu pachethangpo.

³⁸ Mane apinso mate a-arloso areng along akelok angthek dolote,

³⁹ bangso aphan kurusar palang-lonang. Ang-thek jongsi lokphlechot, la areng pen kanghang isi angthekchot pulote bangso abang aron ateng pen ingthir-et-lang.

⁴⁰ Inut amonit achu jongsi ingjui-long-lo, alangli phukoilo, seta alangli ingthir-et-lang.

⁴¹ Lapen inut amonit jongsi atehang adung pen achu ingjui-long-lo lapen phukoijoilo seta la aphan pangthirthedetde.

⁴² Bonta jongsi phukoijoi along erring-alokchot amek angthek do pulote la si-i akeso lo.

⁴³ Alangliphan kurusar langpo, lapen jongsi ake-erring-alokchot amek isi do pulote,

⁴⁴ alangliphan kurusar abang ingthirthetang-lo pu pachethangpo, pima alangli phu athak si-i akeso kedo apot.

⁴⁵ Inut amonit si-i akeso kecho-long abang ke kerakprot ape-ari si chingthang nangji, achuta ching-soksedet nangji, amahang aber an chepipsi, “Ingthirthe, ingthirthe!” pu hang nangji.

⁴⁶ La akeso memetik ke ingthirthelo, la mukam ingtansi donangji, akaprek atumpen chepahe-lomasi.

Si-i Kedo Ape Aputhak Aron-heihei

⁴⁷ Pe-ri athak si-i dolote, ul mate pe-kanglit athak tame,

⁴⁸ mate pe-kanglit achet athak tame, mate ul ape athak tame, mate ok-reng athak tame, mate ok-reng pen keselam amar athak tame,

⁴⁹ la jongsi lirseng mate erhing pulote, la ke kangdak asi-ilo lapen la kurusar aphan paklang nangpo.

⁵⁰ Kurusar abang la langpo, lapen la ni throksi an bangso amar bi paprekvipo.

⁵¹ Ni throksi arni alangli la puthot langthupo, lapen jongsi si-i kecho pangdangbom pulote la ingthirthelang.

⁵² Kurusar abang la me thordutpo, pima la ke kangdakbom asi-i, la me pen pavirdet nangji.

⁵³ Bonta jongsi, alangli la lang-et-lo, pe athak si-i ingdangbombe lang pu kurusar abang thek-long-lote,

⁵⁴ la kepachokji aphan alangli hukum pipo, lapen akaprek ni throksi an kebi paprekvi po.

⁵⁵ Anke alangli la langpo, lapen asi-i amek arong che-larle, la thebombe seta amek kethu angno mate anungle do setame, la ingthirthelang; mar-heihei nangli mephrin-et nangji.

⁵⁶ Bonta jongsi, kurusar abang puthot langthulo, asi-i amek krengrolote alangli la pe mate a-ok-reng pen ingsek nangji.

⁵⁷ Anke, si-i amek puthot nangcheklang-thulo, lapen theponbom lote, ahemphu abang mar mephrin nangpo.

⁵⁸ Alangli jongsi amek chamlo, lapen adak avedet-lo, alangli puthot chamthu nangpo, lapen la aron ateng pen kangthir plangpo.

⁵⁹ La, helo, angmi ape non mate kanglit ape non, si-i keso ape-ari aputhak aronlo, mate ok-reng pen keselam jat amar aputhak setame; lasonsi aron atengpen ingthir loma ingthirthe loma la phar-ipo.