KETHAN 7 - BAIBEL KANGTHIR (BSI)

Hemphu Amethang Arat

¹ Nangtum Arnam Hemphu nangtum aphan nangtum kecheraiji alongle along nangvanpo, lapen Alangli ongdung akhei atum aphan phlungji. Nangtum dambomsi, nangtum apar thedung lapen kangtangmuchot akhei throksi aphan phlungpo: Hitti atum, Girgash atum, Amor atum, Kanaan atum, Periz atum, Hivi atum, lapen Jebusi atum.

² Nang Arnam Hemphu nangtum arideng lahei akhei atum nangkepi ahut latum aphan nangtum paremdetpo, lapen latum kadokave atum aphan nangtum pathi-et nangji. Latum pen nangtum thangnatta chelangri mate kangjinso paklangri.

³ Latum pen chepangri-rinon lapen nangsomar atum latum pen pangri pangdonrinon,

⁴ pima latum nangsomar atum aphan Hemphu aphan karcho pen pache-osi anut kaprek arnam aphan parcho rongpo. La plang-lote, Hemphu nangtum aphan aningthihakpo lapen menmen nangpavirdetpo.

⁵ Lasi latum adovan phri-etnon, lapen latum kangthir arlong anujok ing-lok etnon, latum arnampi Asherah angthek an chorpi-et nangji lapen akumlin-heihei me keipi-et nangji.

⁶ La klemnon pima nangtum Hemphu Arnam amarlo. Pirthe adang arat angbong nangtum aphan Alangli methang kepanong arat pusi nang ingvailo.

⁷ Akaprek akhei atum aphan nangtum aphai ong munak apot-le Hemphu nangtum aphan nangkanghon lapen nangkangvai lapu kali; nangtum ke pirthe athak kebinei akheilo.

⁸ Bonta Hemphu nangtum aphan inghon lapen nangphusar atum aphan Alangli kechechak apot paplengji Alangli ninghang-lo. La apotsi Alangli jakong pen nangtum aphan nangpajok-lo, lapen Ijip arecho along ban kedo pen nangpajok-lo.

⁹ Chemathatha, nang Arnam Hemphu-si Arnam chot, lapen Alangliphan kanghon lapen ahukum kekroi atum aphan Alangli ove suri anta kanghon paklang,

¹⁰ bonta Alangliphan kehijim atum aphan Alangli aduk kepiji mome.

¹¹ Lasi non, nangtum aphan nangkethantang ason kroinon; lapen pini ne nangtum aphan nangkepi aron an kroinon.

Kekroi Ahirjume

¹² Nangtum jongsi lahei ahukum arjulo lapen lahei kroipamelote, nang Arnam Hemphu nangtum pen kechejok aloh biverpo lapen nangphusar atum aphan Alangli kechak ason nangtum aphan nang inghonverpo.

¹³ Alangli nangtum aphan inghonpo lapen pahirjumepo, anke nangtum aphai chan-opo, lapen nangsomar ongdungpo; nanghidi Alangli pahirjumepo, anke nangtum sok, drakha ahorlang, lapen jit ajangthu longpo; nangtum ongdung kepangreng api lapen abiresak kepalong pen ajok Alangli nangtum aphan pahirjumepo. Lahei ahirjume Alangli nangphusar atum aphan chaksi nangtum aphan nangkepiji pu alongle along nangpipo.

¹⁴ Nangtum asonthot pirthe athak badu akheita ahirjume kelong avelo. Nangtum kepangreng api aso phiphedet pupelo.

¹⁵ Keso an pen Hemphu nangtum aphan nangraipo, lapen Ijip along nangtum kelongtang kepherememe akeso nangtum aphuthak Alangli vanvelo, bonta lahei nangtum ahotur aphuthak vanpo.

¹⁶ Hemphu nangkepi akhei tin aputhak pavirklungnon, lapen latum aphan thangnat akangjinso paklangri. Latum a-arnam aphan archori athema la ke virdetpo.

¹⁷ Nangtum methang lahei amonit atum aphai nanglitphlot-lo pu chepuri lapen latum aphan nangtum phlung un-elo pu puri.

¹⁸ Latum aphan phereri, Hemphu Ijip arecho lapen la arat aphan kopisi keklem loma chematha damtha.

¹⁹ Nangtum nangmek hini pen kethek-long kepherememe avur, manghumeme akam-heihei lapen angthek-heihei lapen alangli thedung ajakong lapen kangtang rak ajakong pen ajok nang Arnam Hemphu nangtum aphan nangpajok-lo. Lasonthotsi Alangli Ijip atum aphan pavirlo, lapen non nangtum kephere arat aphan Alangli pavirdetpo.

²⁰ Latum angbong Alangli paphere-phrat po lapen kejok-lang atum aphan lapen kechepatu atum pavirdetpo.

²¹ Lasi lahei arat aphan phereri, Nangtum Arnam Hemphu ke nangtum along sido lo; Alangli ke thedung Arnamlo lapen Laphansi pherechot nangji.

²² Nangtum dambom ahut asap asap Alangli lahei akhei atum aphan phlungpo. Ephongvet ke nangtum latum aphan pavir-et un-e; athema nangtum klemlote, nampi api nangchanpo, la nangtum aphan pherememepo.

²³ Nanghotur atum aphan nangridengsi Hemphu nangpipo lapen latum vir-et-etik-ke latum kephere pen pratseipo.

²⁴ Latum arecho Alangli nangtum arideng nanghodaidetpo. Latum aphan nangtum pathilotpo, lapen latum aphan tengnedetpo. Baduta nangtum aphan khang un-elo; abangphutin aphan nangtum pavirdetpo.

²⁵ Latum akumlin me keinon, lapen lahei nangtum aphan cheponri. Nangtum jongsi klemlote, la ke nangtum aphan kevirlo, pima Hemphu-ke kumlin kardom hijimlo.

²⁶ Lahei atum akumlin nangtum ahem arlo vanri, mate latum aphuthak keklo ahirjuno nangtum aphuthak dopo. Lahei akumlin nangtum hijimvek nangji lapen panovek nangji, pima lahei Hemphu ahirjuno angkangsi dolo.