KETHAN 6 - BAIBEL KANGTHIR (BSI)

Kethenei Ahukum

¹ Nangtum aphan kepathanji aphan nang Arnam Hemphu neliphan kepi ahukum lahei helo. Nangtum kelut lapen kecheraiji dokdok alongle along lahei kroinon.

² Nangtum rengtik an, nang lapen nangpoton atum nang Arnam Hemphu aphan aman pinangji, lapen Ne nangkepi la aron kedo-an kroipetnon, anke nangtum halaso alongle along ajirdingklui an dolongpo.

³ Lahei arjupamenon, nang Israel arat atum, lapen lahei kroithipnon! Anke nangtum mesenpo, lapen nangtum isi thedung akhei plangpo, lapen nangphusar atum a-Arnam Hemphu kechak ason, halaso keplang lapen aho-or kedo alongle along dolongpo.

⁴ Israel atum, laso alam chemathatha! Hemphu lapen Hemphu inutpet si e-Arnamchot.

⁵ Nangning do-an pen nang Arnam Hemphu aphan chinghon non, nang pran do-an pen, nangjakong do-an pen chinghonnon.

⁶ Pini laso nangtum aphan ne nangkepi ahukum tengneri.

⁷ Nangsomar atum aphan lahei thannon. Lahei nangtum hem kedo ahut lapen ingtan kedam ahut, lapen nangtum kesang ahut, lapen nangtum kam keklem ahut ruibomnon.

⁸ Lahei nangri along chekokdong non lapen nangtum kechemathaji aphan nangtum atehang along chekokdong non.

⁹ Lahei nangtum ahem anujok-heihei along lapen inghap along-heihei toknon.

Kekroithekthe Aputhak Kepacheretoi

¹⁰ Nangphusar Abraham, Isaak lapen Jakob atum aphan Hemphu nang Arnam kechak asonthot, Alangli nangtum aphan isi thedung lapen kechingthur nangtum kimkepin arongsopi-heihei nangpipo.

¹¹ Nangtum bibepin seta mesen amar pen keplengset ahem lapen nangtum hut-hepin alangtuk, lapen nangtum drakha ke-e-epin adrakha aberi lapen jit aberi longpo. Laso alongle along nangtum aphan Hemphu nangkevan ahut nangtum kopima kechoji nangning kehang ason long po,

¹² seta nangtum Ijip adet ban kedo adim pen nangtum aphan nangkepajok a-Hemphu aphan tengneri.

¹³ Hemphu nang Arnam aphan aman pinon, Alangliphanle archo chotnon, lapen Alangli men penle nangtum aseme tangchotnon.

¹⁴ Akaprek arnam aphan archori, nangtum komchen arat atum a-Arnam aphan archori.

¹⁵ Nangtum jongsi akaprek arnam atum aphan archolote, nangtum aphuthak Hemphu aningkethi me ason vangsi nangtum aphan pavirdet khangjangpo, pima nangtum along kedo Arnam Hemphu-ke akaprek badu arnam aphan chakche.

¹⁶ Nang Arnam Hemphu aphan nangtum Massah along keklem ason asat-langri.

¹⁷ Alangli nangtum aphan nangkepi aron kedo-an kekroithip thekjile nangtum chechakpamenon.

¹⁸ Hemphu kopima kepu la le klemnon, lake chokpet lapen mesen lapen nangtum akai along la mesenpo. Nangtum aphusar atum aphan Hemphu kepiji pu aho-or kedo alongle nangtum chepahemphu longpo,

¹⁹ lapen Alangli kechechak ateng pen nangtum ahotur atum aphan nangtum phlung unji.

²⁰ Mo ahut nangkele ahut nangsomar atum nangtum aphan arjupo, “Lahei aron kopi athesi etum Arnam Hemphu kekroijile hukum ekepi loma?”

²¹ Anke latum aphan thannon, “Netum Ijip arecho aber ban donang-lo, lapen thedung jakong pen Hemphu netum aphan nepajok-lo.

²² Netum amek angden Alangli manghumeme akam keklem thek-long lo, lapen Ijip asor aphan latum arecho lapen asaihemphu atum aphan kepherememe akam keklem thek-long-lo.

²³ Ladak netum aphan kevanjisi Alangli Ijip pen nepajok-lo lapen laso alongle netum aphan nepilo, Alangli ephusar atum aphan pi unji pu kechak ateng-lo.

²⁴ Anke e-Arnam Hemphu lahei aron kekroiji aphan lapen Alangliphan aman kepiji aphan hukum epilo. Jongsi eli klemlote etum adet aphan Alangli langverpo lapen pachingthur-vurpo.

²⁵ Etum aphan Arnam hukum ekepi an ason kroipet-lote Alangli etum aphan aning ingsam-opo”