KETHAN 3 - BAIBEL KANGTHIR (BSI)

Og Recho Aphan Israel Atum Kehai

¹ Adunthu, etum Bashan alongri nirep anat damlo, lapen Edrei arong along Og recho amonit do-an pen etum aphan kechedanjisi nangbarpak lo.

² Bonta neliphan Hemphu pulo, “Laphan phereri. Ne, la, la amonit, lapen alongle ta nangtum aphan nangpidetpo. Laphanta Sihon recho aphan keklem asonthot laphanta klemnon. Sihon ke Amor arecho la Hoshbon pangrilo.”

³ Lasonsi Og recho aphan Hemphu-si etum ajakong arideng ehodailo, lapen eli latum kadokave aphan pathi-et-lo.

⁴ Halaso ahut amat etum kadokave arongso cherai-et-lo, eli kecheraire arong isibakta avedet-lo. Kadokave rong throkkep-an, Argob alongri, Bashan arecho Og kepangri adimlo.

⁵ Lahei arongso kedo-an kangtui apaisong inghap, lapen barlon ajakan anghap-heihei pensi parpongchenlo, lapen paisong kavepin arongta do-o.

⁶ Heshbon arecho Sihon arong-heihei aphan eli keklem asonthot rongso do-an pavirlo, lapen pinso, arlo, lapen osomar atum aphan pathi-et-lo.

⁷ Kepangreng api eli ponpilo lapen rongso an amar thipon-et-lo.

⁸ Halaso ahut la Amor recho banghini pen Jordan Aroi anihang alongle lapen Arnon aroi pen ha Harmon Anglong an enlo.

⁹ (Harmon Anglong aphan Sidon asor ke Sirion, lapen Amor atum ke Senir pusi irlo.)

¹⁰ Bashan arecho Og alongri an ta eli cheraipi-et-lo: Inglong apam arongsopi-heihei, Gilead lapen Bashan alongri ajo an, ha Salekah lapen Edrei arongso nihang anat anta cherailo.

¹¹ (Og rechoke Rephaim pen kejutsilo. La kethi ahongplang arlongpen si selamlo, keding ingrup nerkep lapen arpan ingrup phli, la halaso ahut angrup-lo. Amor atum arongsopi Rabbah along thek-longbom.)

Jordan Anihang Kedo Akhei Atum

¹² Etum longle cheraidet aphi, Reuben lapen Gad akhei atum aphan Arnon Aroi adung Aroer arongso anirep anat alongle ne pilo lapen Gilead alongri anglong aren ajo ephar la arongso-heihei pen pilo.

¹³ Manasseh akhei achitim atum aphan neli Gilead ahin an lapen Og kepangri Bashan alongle pilo, la ke Argob alongri kangthimlo. (Bashan aphan Rephaim adet pu ta pu.

¹⁴ Manasseh akhei pen Jair pu abang Argob mate Bashan alongri kangthim ha Geshur lapen Maakah ahoi an cherailo. Rong amen alangli men aphi che-irlo, lapen lahei Jair arong pusi nonputa chini.)

¹⁵ Manasseh akhei angbong Makir aro aphan ne Gilead alongle pilo.

¹⁶ Reuben lapen Gad akhei aphan Gilead pen Arnon Aroi an neli thak-lo. Arnon Aroi, ajehak ke Ammon atum ahoi anta lelo.

¹⁷ Nichi anat latum alongri ke Jordan Aroi an, Galili alangbi kesun anirep pen Kethi Atalo anitur an lapen ha Pisgah Anglong, kele ano anat.

¹⁸ “Halaso ahut amat, latum aphan lahei alam ne pinkhat-lo: ‘Jordan anihang alongle etum a-Arnam Hemphu kecheraiji aphan nangpilo. Non Jordan parai anat Israel akhei kaprek atum aphan longle pacheraiji along kerapdunjile latum aphrang kedamji aphan nangtum ron kechedan amonit atum aphan pachesiknon.

¹⁹ Nangpisomar, nangsomar atum lapen kepangreng api le ladak ne nangkepi arongso along padochotnon, ne chini nangtum kepangreng api do-o.

²⁰ Jordan anichi anat nangkorte Israel atum aphan Hemphu kepiji pu alongle cherailongletik lapen nangtum aphan Hemphu ladak nangkeklempi ason halatum ingsamjin pen do longletik ke nangtum rapdunbom nangji. Laso aphi si, Ne nangkepi alongle ladak nangtum nangchevoi longji.’”

²¹ Anke Neli Joshua aphan pinkhat-lo; “Sihon lapen Og recho aphan kosonsi nang Arnam Hemphu keklemloma nangli thek-long-lo; lapen nanglitum ketengkhengji adettin aphuthakta Alangli lasonsi klempo.

²² Latum aphan phereri, athema nang Arnam Hemphu-si nangtum aphan nangchedanpipo.”

Moses Aphan Kanaan Palut-longledet-lo

²³ Halaso ahut neli ardompik-lo,

²⁴ “Keklem-un a-Hemphu, Nangli thedung lapen manghumeme akam keklemji aphan kechengchotsi neliphan Nangli nepaklangchot-lang, la neli chinilo. Sining lapen pirthe athak thedung akam keklem-un Nanglison badu Arnamta avelo!

²⁵ Neliphan Jordan Aroi nepahat-longtha, Hemphu, lapen parai anat aho-or kedo alongle nelipalang longtha, kelangmesen inglong aren ajo, lapen Lebanon Anglongpi-heihei.”

²⁶ Bonta nangtum pen ajok, Hemphu neliphan aningthilo, lapen neli arjudun long-lo. Lasi Alangli pulo, “La anta chokpo! Laso alam puthot pinpurrinon!

²⁷ Pisgah Anglong aphuchong damnon, lapen ke nirep, nitur, lapen nihang, nichi anat langnon. Nang kopima kethek-long langpamenon, pima nang Jordan paraike damlonglelo.

²⁸ Joshua aphan kepinkhat nangji alam thannon. Aning parungra laphan aning pathirthipnon, pima nangkethek-long alongle kepa-cheraijisi rat aphan alangli japonpo.”

²⁹ Lasi elitum Bethpeor arongso anung anat kedo arlong alongsi dokok-lo.