KETHAN 24 - BAIBEL KANGTHIR (BSI)

Kecheti Lapen Chepangrithu

¹ Pudamlonang, inut amonit inut a-arloso pen chepangrilo, lapen aphi bangpi aphan akenang avelo pusi mathalo, pima bangpi aputhak la pine aning kedokde ason long-lo. Lasi la keti aloh tok-lo, lapen lahei bangpi aphan pilo, lapen bangpi aphan amethang ahem pen toijuilo.

² Anke pudamlonang bangpi anut kaprek apinso aphan penan dokok-lo,

³ lapen laso amonit ta keti aloh toksi lahei bangpi aphan pilo, lapen amethang ahem pen bangpi aphan toijuilo. Mate pudamlonang, bangpi aphi apenan abang thilot-lo.

⁴ Lasonlo pulote, bangpi aphrangsi apenan abang bangpi aphan enthuthedet nangji; bangpi aphan la ingthirthe pusi matha nangji. Jongsi la bangpi aphan puthot chepangrithu lote, la ke Hemphu angno aning kedokde akamlo. Nang Arnam Hemphu nangtum aphan nangkepi ji pu alongle along nangtum lason kepherememe apap klem nangnelo.

Ason-ason Aron-heihei

⁵ Inut amonit jongsi chepangri mirak-lang, labangso aphan chesong akam along amen bipon nangnelang mate akaprek rat akam adeng along bi nangnelang; laphan ningkan isi an pajok nangji, anke la alangli hem chedolongpo, lapen apiso aphan aning-parong longpo.

⁶ Mane aphan nangtum pine ason paramlote, la sok kekoi-i arlong bondok khang nangnelo. Latum kerengji aphan him kekoiji pen hem isi aphan kekhang-lo.

⁷ Akorte Israel aphan jongsi mane nepponchek-lo, lapen laphan aban paplang-lo, mate chojordet-lo pulote lason amonit aphan pathilot nangji. La-sonsi nangtum kehingno pen jokpo.

⁸ Nangtum jongsi si-i keso pen chechak nang-lote, Levi akurusar nangtum aphan kopisi nangkepu ma chinipamenon; Ne latum aphan kepi kepinkhat ason an klemnon.

⁹ Nangtum Ijip pen kevang ahut nang Arnam Hemphu Miriam aphan kopisi keklemloma chemathatha.

¹⁰ Mane amonit aphan pine amar nangtum paramlote, nangtum aphan la bondok nangkepiji pu ape-ari ke-en damji aphan hem arlo lut damri;

¹¹ ingtanle inghongra la amethangle nanglong pachevannang.

¹² La jongsi keduk amonit, jopangthang la bidet-ri;

¹³ laphan lahei arnikangsamtin voithudetnon, anke la amek kejangji aphan pe chelongpo. Anke la nangtum aphan choropo, lapen nang Arnam Hemphu nangphan aning ingsamjinpo.

¹⁴ Kerong aban keduk kelak atum aphan chobeiri, la nangkorte Israel tame mate bang adet aso nangtum arong kedo abang tame.

¹⁵ Arnivangta la kam keklem anam arnikangsam apor pidun nangji; la tangka nangji, lapen longpo pusi la lakhalo. Laphan jongsi nangtum anam pipe pulote, la nangbe thursi Hemphu aphan hangpo lapen laso apap adai apot nangdo dopo.

¹⁶ Asomar atum prankarmut apot api-apo aphan pathi nangnelo, lapen apo-apei atum prankarmut apot asomar atum aphan pathi nangnelo; inut amonit amethang keklem aprankarmut apotsi pathichot nangji.

¹⁷ Bang adet aso atum lapen jangreng atum kelongji ajakong khang nangne; lapen hemepi ape bondok khang nangne.

¹⁸ Chemathatha, Ijip adet nangtumta ban donang-lo, lapen nang Arnam Hemphu-si nangtum aphan nangpajok-lo, la apotsi ne nangtum aphan laso ahukum nangkepilo.

¹⁹ Nangtum asok kepamtang ahut, lapen nangtum kerottang asok ajehak hem van un-edet-lote, la kevanji aphan chedamthuri; lahei ke bang adet aso atum aphan lapen jangreng, hemepi atum aphan bi pinon, anke nang Arnam Hemphu nang kopima keklem aputhak nangpahirmepo.

²⁰ Nangtum ajit athe ephong humlote, puthot la ahin kehum damji aphan chedamthurinon; lahei ke bang adet aso atum, jangreng atum lapen hemepi atum aphan bi pinon.

²¹ Nangtum adrakha athe ephong hum tangdet lote, ahin kehumdamji aphan chedamthurinon; ahin kedo anke bang adet aso atum, jangreng, lapen hemepi atum aphanlo.

²² Nangtum ta Ijip along ban kedo alam chetengneri; la apotsi ne nangtum aphan laso ahukum nangkepilo.