KETHAN 23 - BAIBEL KANGTHIR (BSI)

Hemphu Arat Pen Kepave

¹ Kasi ke-en amonit mate a-ok kangduk kerotpet amonit Hemphu arat plang longlelo.

² Api apo atum aronre pen chepangri atum mate lason asomar atum ovekep anta Hemphu arat planglongle.

³ Ammon atum, mate Moab atum, latum apoton atum ove kep anta Hemphu arat dolonglelo.

⁴ Nangtum Ijip pen kevangbom ahut nangtum aphan latum an nangpipe lang nangpipe, lapen nangtum aphan ahirjuno kepi jisi latum Mesopotamia along kedo Pethor arongsopi pen Beor asopo Balaam aphan rong-lo.

⁵ Bonta nang Arnam Hemphu Balaam alam arjuje det-lo; ahirjuno alar alangli ahirjume paplang rong-lo, pima alangli nangtum aphan chinghon-o.

⁶ Nangtum khei dotik ke, laso akhei aphan nangtum thangnatta rap-rinon mate pachingthurrinon.

⁷ Edom aso aphan langremri; latum ke nangtum adonlo. Lapen Ijip aso aphanta hijimri, ehut isi latum along nangtum dolo.

⁸ Ovekethom aphi penke latum aphan Hemphu arat angbong parlopon tamelo.

Chesong Amukam Pangthir-et Pen Kebai

⁹ Ron apor nangtum mukam keche-kim ahut, aron ateng pen kangthirthe ason an ke nangtum chepahelo nangji.

¹⁰ Mane jongsi manglangno pen ajok ajo achili chonlo lapen ingthirthetang-lo pulote, alangli mukam angtan dam nangji lapen hadaksi dodam nangji.

¹¹ Arnikangsam ahut la amethang langchinglu nangji, lapen arni kechilut ahut la mukam chevang tamelo.

¹² Mukam angtan nangtum kedo adim elongbak donangji hadak nangtum kesangji akenang ahut dam longpo.

¹³ Chin ehong isi arisim ason cheponnon, anke nangtum barpi kedam ahut la pen tuk si barpi pipnon.

¹⁴ Aron ateng nangtum amukam pangthir-etnon, pima nangtum aphan nangkeraijisi lapen nangtum ahotur aphuthak kepahaijisi nang Arnam Hemphu-ke nangtum amukam along nangdodunpo. Nangtum aphan Hemphu nangpanung phakphe detjile aronre akam klemrinon.

Ason Kaprek-kaprek Aron

¹⁵ Inut aban jongsi ahemphu pen katjuilo, lapen nanglong vangsi chepachong-lo, laphan toithu nangnelo.

¹⁶ La kechongvai aling nangtum arongso angbong padonang, lapen laphan nang chenek nangnelo.

¹⁷ Pinso tame arlo tame, Israel angbong kardomhem abeisa plang nangne.

¹⁸ Kechechak chepaplengji aphan lason akam keklem pen nang Arnam Hemphu ahem tangka van nangnelo. Kardomhem abeisa Hemphu hijim lo.

¹⁹ Nangtum tangka paramlote, mate an mate ajat tame nangkorte Israel atum aphan paramlote, abat ale enri.

²⁰ Bang adet aso aphan nang kopima keparam ason aputhak abat ale entame, bonta nang korte Israel atum pen thangnatta enri. Lason aron kroinon, lapen nangtum kecheraiji alongle along nang Arnam Hemphu nangtum kopima keklem asontin aputhak nangpahirmepo.

²¹ Nang Arnam Hemphu aphan nang pine kepiji chechak-lote, nang kechechak ason che-ori; Hemphu nangphan kechak kopima nangton-epo, kechechak ason keklemkle lake pap-lo.

²² Hemphu aphan thangnatta chechakchedet lake pap kali,

²³ bonta mane jongsi aningkehang ateng chechak-lote, la keklem unjile chemathanon.

²⁴ Nangtum jongsi mane adrakha aberi soding damput-lo, nangtum nang ninghang an chotame, bonta kechoponji aphan kethap adim chothappon nangnelo.

²⁵ Nangtum kedambom ahut tovar mane asok ahidi phoponlote, nangtum nangninghang an nangri pen kangprun asok chotame, bonta nang nokek-rangso pen sok rot nangnelo.