KETHAN 2 - BAIBEL KANGTHIR (BSI)

Sangtimili Ajo Aningkan Ningkan Kedo

¹ Ansi padu elitum chevoisi sangtimili ajo anat damlo, Akaba Atalochekom atovarsoding, atheke Hemphu hukum ekepi ateng Edom anglong aren ajo penang an aningkan damtap-lo.

² Anke Hemphu neliphan pulo,

³ atheke halahei anglong along dor-phlup apor damtap-lo apotsi etum nirep anat damnangpo.

⁴ Lahei alam nanglitum aphan kepinkhatji aphan Alangli nepulo: “Nangtum Edom anglong aren ajo kehatputji nangle dokdok-lo, latum ke nangtum heloving adon atumlo, latum Eso apoton atumlo. Nangtum aphan latum nangpheredukji,

⁵ bonta nangtum latum pen kecheng ke ron chedan nangnelang, pima Ne nangtum aphan latum alongle asapbakta nangpipe. Edom alongleke Ne Eso apoton atum aphansi kepilo.

⁶ Latum pen nangtum an lapen lang chonamtame.”

⁷ Chemathatha, kopusonsi nangtum Arnam Hemphu nangtum keklem asontin along nang pahirjumedun-loma. Nangtum la adangkethe asangtimili ajo soding kedamtap ahut nangtum aphan ko-an Alangli nang lanaloma. Alangli nangtum along ningkan phlikepta nangdodunlo, lapen nangtum kenangji ason an nangtum long-lo.

⁸ Lasi Eli dambomlo, lapen Elah lapen Eziongeber arong pen ha Kethi Atalo anat kedam atovar obup-lo, lapen eli nirep-nihang Moab anat damlo.

⁹ Hemphu neliphan pulo, “Moab arat aphan pasungri, la Lot apoton atum lo, mate latum pen kecheng ron chedanri, lapen latum aphan Ar arongsopi pilo, lapen latum alongle Ne nangtum aphan asapta nangpipelo.”

¹⁰ (Isi akromkethe ajat Emim pu atum Ar along dolo. Latum akaprek akromkethe ajat Anakim pu atum ason ajonta dingpikpak.

¹¹ Anakim atum asonsi latum aphan Rephaim pusi chethang-lo; bonta Moab aso atum latum aphan Emim pusi hang-lo.

¹² Hor aso atum ke Edom alongsi dolo, bonta Eso apoton atum latum aphan phlung-lo, latum adet pavirlo, lapen hadaksi latum dothip-lo, atheke Israel atumle Hemphu latum aphan kepiji pu alongle along pen hotur atum an phlung-et asonsi latum klemlo.)

¹³ Hemphu netum aphan nepaklemtoi asonsi Zered Aroi hatpet-lo.

¹⁴ Kadesh Barnea odet pen ningkan thomkep-ra nerkep aphi Zered nanglelo. Hemphu aseme atengsi ronkechedan pinsomar a-ove atum an thi-et-lo.

¹⁵ Latum ver-et-etik an latum aphan Hemphu khamkhe dunbomlo.

¹⁶ Latum kadokave thi-et aphi,

¹⁷ etum aphan Hemphu pulo,

¹⁸ “Pini Ar atovar pen nangtum Moab alongri damput nangpo.

¹⁹ Anke nangtum Ammon atum adet keleji tebok-hetpo, latum ke Lot apoton atumlo. Latum aphan pasungri mate latum pen ron chedanri latum pen, pima latum aphan Ne kepitang alongle nangtum aphan asapbakta nangpipelo.”

²⁰ (Laso alongri aphan Rephaim alongri ta pu, la ke hadak kedo amonit atum amen ateng-lo; Ammon atum ke latum aphan Zamzummim pusi hang.

²¹ Latumta Anakim atum asonsi akrom-ajom. Latum aphai do-o, lapen latum ta kangtangrak ajat. Bonta Hemphu latum aphan pavirdet-lo, ansi Ammon aso atum latum adet cheraisi hadak do pathirlo.

²² Hemphu-ke lasonthotsi Edom aso atum aphanta klemlo, latum Eso apoton atumlo, latum Edom anglong aren ajosi kedo. Hor aso aphan alangli pavirlo, ansi Edom aso atum latum adet cherailo lapen hadak dothip lo.

²³ Mediterran atalo akung soding alongleke Krit alanglom pen kevang arat atumsi nangdolo. Latum Avvim, latum kedo barim atum aphan pavirlo, lapen latum alongle cheraidet-lo ha Gaza arongsopi anitur anat anta.)

²⁴ Moab hatput aphi, etum aphan Hemphu epulo, “Non, Arnon Aroi kehatjile kebar chengnon. Amor aso Heshbon arecho Sihon aphan Ne nangtum aridengsi jakong nangpidet-lo. Laphan tengkhengnon, lapen laso alongle kecheraijile chengnon.

²⁵ Pini pen Ne kadokave arat atum nangtum aphan nangpapherehurpo. Nangtum amen kepinpurpen abangphutinta a-ok klemhurpo.”

Sihon Arecho Aphan Israel Atum Keparem

²⁶ Anke neli Kedemoth akejejang-tang ajo pen Heshbon arecho Sihon aphan lahei ningkangsam alam laso pherangke atum aphan toilo.

²⁷ “Nanglitum adet nelitum aphan pahat-longput tha. Nelitum kengdet si dampo, lapen tovar pen suiselo.

²⁸ Nelitum kechoji a-an anam lapen kejunji alang anam nelitum nangpipo. Nelitum akenangsot ke nanglitum adet kehatput,

²⁹ nelitum aphan Hemphu nekechak alongle along kedamjile Jordan Aroi hatpetpe tik an. Eso apoton atum, la Edom along kedo atum, lapen Moab aso atum, la Ar along kedo atum, nelitum aphan latum adet nepahat longput-lo.”

³⁰ Bonta Sihon recho etum aphan adet dongput epadamlongle det-lo. Nangtum Arnam Hemphu si laphan aning pangtang-lo, lapen pathurkrap lo, anke eli laphan parem unpo lapen la adet cherai unpo, lahei adim eli nonputa cherai longbomlang.

³¹ Anke Hemphu neliphan pulo, “Langtha, Ne Shion recho lapen la adet nangtum angno pangduk-ruilo; la alongle enra cheraidetnon.”

³² Etum pen kechedanjisi Sihon ke amonit kedo-an pen nangbarlo, ha Jahaz arong adung,

³³ bonta Etum a-Arnam Hemphu laphan erideng jakong epilo, lapen eli laphan pathilo, la asopo, lapen la amonit atum an aphanta pathilo.

³⁴ Halaso ahut amat eli arongtin pavirlo, lapen abangphutin pinso, arlo, lapen osomar aphan pathilo. Badu aphanta eli kereng-et bibedet-lo.

³⁵ Kepangreng api eli ponlo lapen rong lutsi mar thi pon-et-lo.

³⁶ Etum Arnam Hemphu-si rong kedo-anta pacherai long-lo, atheke Aroer pen, la Arnon Arlok angchun, arong-heihei lapen laso arlok chitim along kedo arong-heihei, lapen ha Gilead atovar an arong epilo. Etum aphan rong apaisong kangtang muchot avedet-lo.

³⁷ Bonta Ammon alongri adung netum damdedet-lo mate Jabbok Aroi ariri mate inglong aren ajo mate Hemphu damri pu hukum nekepi adim damdedet-lo.