KETHAN 18 - BAIBEL KANGTHIR (BSI)

Kurusar Atum Apharman

¹ Israel angbong Levi kurusar akhei atum ke apharman alongle long dundelo; laso alar, latum dan-heihei lapen athok-heihei Hemphu aphan kepi aputhak pensi reng-i nangji.

² Latum akaprek akhei atum ason longle cherai longlelo; Hemphu kechaktang ateng apharman ke Hemphu akurusar keplanglong helo.

³ Chainong mate biresak athok kepi ahut, kurusar atum aphan angjin, akechenghini lapen apok pi nangji.

⁴ Latum kechengsi asok, adrakha ahorlang, jit ajangthu lapen ul apharman kelong nangji atumlo.

⁵ Kadokave akhei angbong pen Hemphu Levi akhei aphansi alangliphan kaike kurusar pangdukverji aphan ingvailo.

⁶ Israel angbong Levi atum nahok arongso pen tame elong karchoji adim vang unlo

⁷ lapen hadak kedo akaprek a-Levi kurusar atum ason Hemphu a-Arnam aphan la kurusar ingduk-long.

⁸ Akaprek akurusar atum atengthotsi alanglita kecho amar longpo, lapen alangli hem asor kopi ma nangkechelo ason chebime.

Kekroithap Atum Kecheseke Aputhak Kepacheretoi

⁹ Nang Arnam Hemphu nangkepiji alongle along nangtum nangkele ahut hadak kedo akhei atum hijim meme kecheseke ason charli dun-ri.

¹⁰ Dovan-heihei ame along nangtum asomar atum aphan phrin-ri; lapen nang rat atum paludep toiri mate sangkelang abangphan parirenang mate thek-kere,

¹¹ mate majakanghoi parirenang, lapen kethitang akarjong pen kechingki atum pen thangnatta parjujenang.

¹² Nang Arnam Hemphu lahei kehijim meme akam keklem atum aphan hijimpik lapen laso apotsi nangtum dambom ahut lahei akhei kedo-an aphan alangli phlung-et-lo.

¹³ Hemphu aphanle kroithip khangjangnon.

Montri Inut Nangketoiji Kechak

¹⁴ Anke Moses pulo, “Nangtum kecheraiji alongle along, rat atum lodep chelangdunsi kopima keplangji charjupo, bonta lason nang Arnam Hemphu nangpaklem longle.

¹⁵ Laso alar, ne sonthot inut amontri alangli nangtoiji, alangli ke nangtum methang amonit penlo, lapen alangli lamsi nangtum arju nangji.”

¹⁶ Sinai Anglong along nangtum kechingrum arni, Hemphu puthot kepaningje mate me ade ketot-ang pavenang pusi nangtum choningrilo, pima nangtum thilotna pu nangtum pherelo.

¹⁷ Lasi Hemphu neliphan pulo, “Latum isi kemesen alam choningrilo.

¹⁸ Latum angbong ne nangson thot inut amontri toipo, la ke amethang amonit atum angbong penlo; laphan kopima keningje nangji Ne thanpo, lapen la rat atum aphan ne hukum kepi aling thanpo.

¹⁹ La nemen pensi lam ningjepo, lapen laso alam karjuje lapen kekroikre abang aling aphan Ne adukpipo.

²⁰ Bonta badu amontri tame Ne hukum kepipe abirta jongsi Nemen pen ningjedet pulote, laso apot la pathinang, lapen lasonsi akaprek arnam-heihei amen pen keningje atum anta lason paplangnang.”

²¹ Nangtum manghu tahai, kosonsi Hemphu pen birta longle pinle inut amontri lam ningje haijimapu.

²² Inut amontri jongsi Hemphu amen pen ningje la kopima keningje chekok ke pulote la Hemphu pen kevang abirta kalilo. Laso amontri ke amethang ajakong pensi lam ning jelo, lapen nangtum laphan phere nangnelo.