KETHAN 15 - BAIBEL KANGTHIR (BSI)

Throksi Aningkan

¹ Throksi aningkan kejut aphongtin nangtum along nangkechoram atangka diya det nangji.

² Lasonsi la klem nangji. Badutame akorte Israel atum aphan tangka paramlote apreng diya det nangji; alangli tangka hang nangnelo; Hemphu amethangsi preng diyatang-lo pu pachethang-lo.

³ Bang adet aso atum pen nang kelongji atangka pangrumtame, bonta nang methang amonit atum nangkepiji pu atangka pangrum nangnelo.

⁴ Hemphu nang Arnam nangkepi alongle along Alangli nangtum aphan nangpahirmeji. Nangtum angbong badu aratta dukde detji,

⁵ jongsi nangtum Alangliphan kroipamelote lapen pini ne nangtum aphan nangkepi ahukum-heihei an talon pamelote, hirjume longji.

⁶ Hemphu kechechak ateng pen nangtum aphan Alangli nangpahirmeji. Ongdung akhei atum aphan nangtum tangka paramlongji, bonta nangtum badu penta choram jokphlotji; ongdung akhei atum aphan nangtum pangriji, bonta badu akheita nangtum aphan nangpangrirelo.

⁷ Jongsi nang Arnam Hemphu nangkepi alongle along nangtum arongso angbong mane Israel akorte pine akenang dolote chepaching-chomri lapen laphan kerapjile mo ri.

⁸ La lera pajoikenon, lapen la akenang an paramdunnon.

⁹ Laphan keparamdunji aphan mori, lapen kediya aningkan nangtebok-het-lo apotsi pipelo pu mathari. Lason kehingno akematha nangning arlo pavanglongrinon. Jongsi nang keparamdunji molote, Alangli nangbe thursi Hemphu aphan hangpo, lapen nangdai dokokpo.

¹⁰ Laphan pajoike pen pinon lapen chingchomche detnon, lapen ke nang keklem asontin aputhak Hemphu pahirmepo.

¹¹ Israel atum angbong keduk-keboi atum kaiketa doji, lasi nangtum latum aphan chingchomchera pajoikeji aphan hukum nangpilo.

Ban Atum Aphan Kelang

¹² Pinso tame mate arloso tame, jongsi Israel angbong nangtum aphan ban nangchojor lote, la nangphan ningkan throk nangdodundet aphi pajoknon. Throksi aningkan nangkele ahut ke laphan nang pajoksi toi nangpo.

¹³ Nang laphan kepajok ahut ari angse toiri.

¹⁴ Nangphan Hemphu kopipisi nang kepahirjume loma biresak pen, sok, drakha ahorlang, penpen laphan pidunnon.

¹⁵ Chemathanon, nangtumta Ijip adet along ban donang-lo, lapen nang Arnam Hemphu si nangtum aphan nangpajok-lo; laso apotsi Ne nangtum aphan laso ahukum nangkepilo.

¹⁶ Bonta nangban abang o-ingtungte det tahai; alangli nangphan lapen nanghem asor aphan chinghon lapen kedothuji aninghanglang.

¹⁷ Lason pulote laphan nanghem inghap along ponnon, lapen ano etnon; anke la akai isi nangban plangverpo. Lasonsi banpi aphan ta nangtum lang nangpo.

¹⁸ Nangban atum kejok ahut nangtum pajokmo nangnelo; jat seta la nangphan ning kan throk kam nangklempilo, la ke kerong kepon anam pen ta achitim vet-lo. La klemnon, anke nang Arnam Hemphu nang keklem ason an nangpahirme dunpo.

Kechingthok-cheng Achainong Lapen Abiresak

¹⁹ Nang Arnam Hemphu aphan kechingthok-cheng achainong lapen abiresak aloso panong-ra pinon; lahei achainong kam aphan en-ri lapen abiresakta angmi ingtip-ri.

²⁰ Elongvet karcho adim along Hemphu angno nang lapen nanghemtun isi aningkan tin kechonangjilo.

²¹ Bonta pi along pine jongsi kechokche do pulote, atheke akeng tekok jok, mate amek selokjok mate pine akechokche do pulote, nangtum nang Arnam Hemphu aphan lahei athok pajir nangne.

²² Lason api nangtum nanghem along chechotame. Nangtum kedo-an, aron ateng pen ingthirnon-ingthirthenon, nangtum thijok lapen jok-lu kecho asonthot lahei chotame.

²³ Bonta lahei avi kechoji aphan chonangnelo; la lang asonsi longle athak dung-et nangji.