KETHAN 1 - BAIBEL KANGTHIR (BSI)

Pachini

¹ Laso aloh along ke Jordan Aroi anihang akejejangtang ajo Israel atum kedo ahut rat atum aphan Moses keningje alam-heihei tok-lo Latum Jordan a-Arlok, Suph adung, la ke rongso hini adak do, atheke ehin anat ke Paran lapen ahin kaprek anat ke Tophel, Laban, Hazeroth, lapen Dizahab.

² (Sinai Anglong pen Kadesh Barnea an Edom anglong atovar pen ni kre isi nangji.)

³ Latum Ijip odet pen Phlikep aningkan kre isi achiklo kecheng arni, latum aphan kepathanjisi Moses aphan Hemphu kepi ahukum an rat aphan thanlo.

⁴ Laso alam ke Amor arecho Sihon, la Heshbon alongri kepangri abang, lapen Bashan arecho Og, la Ashtaroth lapen Edrei arong kepangri abang-lo, latum aphan Hemphu paremdet aphi.

⁵ La ke rat atum Moab alongri Jordan anihang anat kedo ahutsi Moses rat atum aphan Arnam aron-heihei lapen akethan-heihei thanjirlo. Alangli pulo,

⁶ “Elitum Sinai Anglong along kedo ahut, etum a-Arnam Hemphu epulo, ‘Laso Anglong along nangtum kedo ajir ding-olo.

⁷ Mukam chephrira damnon, Amor atum anglong ariri lapen la kekomchen alongri an damnon-ha Jordan Arlok an, inglong ariri anat, lapen thoi anat, ha nitur ahin anat lapen ha Midianteran akung anat dam non. Kanaan adet anat damnon, lapen ha Lebanon Anglong-heihei apar ha Euphratis Aroipi an damnon.

⁸ Lahei alongleke Ne, Hemphu si nangtum aphusar Abraham, Isaak lapen Jakob lapen apoton atum aphan kepiji pu kechak alonglelo. Damra la cheraidamnon.’ ”

Kangsai Atum Aphan Moses Kebat

⁹ Rat atum aphan Moses pulo, “Elitum Sinai Anglong along kedo-un ahut, neli nanglitum aphan nangpulo, ‘Nanglitum aphan nangkejaji akam ke neliphan arpu the-ong-lo. Neli inutpet la klem un-e.

¹⁰ Sining angsong achiklolongso asonsi nanglitum aphan nang Arnam Hemphu aphai nangpa-ongdung-lo.

¹¹ Hemphu, nang-phusar atum a-Arnamle nangtum aphan phansuri nangpabat-lonang, lapen alangli kechak tang ateng nang pachingthur lonang!

¹² Bonta neli inutpet kosonsi nangtum kechebohong alam lapu-an akardik arpu keklem unpoma?

¹³ Ajehak, kethekser, kemathathekser, lapen keklemlongtang apinso amonit aphan akheitin pen ingvainon, lapen neli latum aphan nanglitum aphuthak batpo.’

¹⁴ Lapen la mesen akamlo pu nanglitum anta nangchedon dunlo.

¹⁵ Lasi ne nanglitum akhei pen kangvaitang kethekser, keklemtang ajalin atum aphan ponlo lapen latum aphan nangtum aphuthak bat-lo. Ajehak atum ke suri arat arpu enpo, ajehak atum ke pharo isi arat arpu enpo, ajehak atum ke bang phokep arat arpu enpo, lapen ajehak atum ke kep arpu enpo. Akheitin penta ajehak asaikhi atum aphan ne batpo.”

¹⁶ Halaso ahut ne latum aphan pinkhat-lo, ‘Arjutha nangtum arat angbong kopine kechebohong alam vanlote, asontin alam ingsaipamenon, la nangtum angbong alam setame, mate nangtum angbong nangkedo dun bang adet aso atum alam setame.

¹⁷ Nangtum kephar alam along thangnatta abe kedun pavedet nangji; laso alam paklong pen abangphutin aphanta ingsai-inon, halabangso abang jok amonit setame. Badu aphanta phereri athema nangtum akephar ke Arnam pensi kevang. Pine nangtum aphan kangsai sungpik pulote la ne long vannon, lapen la ne si pharpo.’

¹⁸ Lasonthotsi ne nangtum kopipima keklem nangji ason an nangpinkhat et-lo.

Kadesh Barnea Pen Kelangjoi Atum Aphan Ketoi

¹⁹ Netum Arnam Hemphu kopisi netum aphan hukum nepiloma netum klem-et-lo. Netum Sinai Anglong olo, lapen ajak keding lapen kepherememe Amor atum anglong atovar soding dambomlo. Netum Kadesh Barnea kele ahut ne nangtum aphan nangpulo,

²⁰ Ne nangpulo, “Nangtum non Amor atum anglong akeng-ri nanglelo, atheke etum Arnam ephusar atum a-Arnam Hemphu-si etum aphan epilo.

²¹ Langtha, Nangtum Arnam, Hemphu-ke nangtum angno longle nangbitang-lo; arludamra, nangtum aphan nangphusar atum Arnam Hemphu nangkepu ason, cherai damnon; nangtum phereri, mate ning cheparun-ri.”

²² Bonta nanglitum nelong vangsi pulo, “Longle kepalangjoiji aphan etum aphrang monit toilonang, anke latum etum aphan kedam nangji akemenei atovar ethanthekpo, lapen hadak kopuson arongsopi-heiheisi kedoma ethanthekpo.”

²³ La mesen akam pusi neli mathalo, lasi akheitin pen inut nut bang krehini amonit ne ingvailo.

²⁴ Latum inglong ajo damlo ha Eskol Arlok anat an lapen la langpamelo.

²⁵ Latum elitum aphan ajehak hadak kelong athesere lapen etum aphan ethanlo, atheke etum Arnam Hemphu etum aphan ekepi alongleke aho-or dopik.

²⁶ Bonta nangtum Arnam Hemphu ahukum aphuthak thurkhrap-lo, lapen det lutdam longlelo.

²⁷ Nangtum lahin lahin pasimulo: “Hemphu etum aphan ehijimlo. Alangli etum aphan Ijip pen ekevan la ke Amor atum arideng ekehodaiji aphanlo, anke latum etum aphan epathi unpo.

²⁸ Kopisi eli hadak kedam nangpo? Netum phere-ong. Etum ketoi amonit atum ethanlo atheke latum ephan apar ingtang muchot lapen ajon ding muchot, lapen latum kedo ke rongsopi arpong sining lekai arongsopi-heihei alongsi kedo. Latum hadak akromthepik amonitta thek-long!”

²⁹ Bonta neli pulo, “Lahei amonit atum aphan phereri.

³⁰ Nang Arnam Hemphu-si nangtum aphan nangjapo, lapen Alangli nangtum aphan nang chedan pipo, nangtum ha Ijip along kethek-long,

³¹ lapen kejejangtang ajo kethek-long asonthot. Nangtum chethek-long-lo, koson si Alangli ladak anta nangkevan loma, atheke apole asopo aphan kepon asonsi nangponlo.”

³² Bonta ne putangdet-lota nangtum Hemphu aphan chiki thekthelang,

³³ Alangli nangtum aphan mukam kepa chekimji aphan adim ridamsi aphrang aphrang damlo. Tovar nang kepaklang jisi Alangli me archok pen ajo aphrang aphrang damlo lapen inghun archok pen anerlo damlo.

Israel Atum Aphan Hemphu Aduk-kepi

³⁴ Nangtum kepasimu alam Hemphu arjulongtang-lo, lapen aningthilo, lapen Alangli pachethangdak-lo,

³⁵ “La kehingno a-ove pen nangtum inutbakta nangphusar atum aphan ne kepiji aho-or kedo alongle arlo lutdun longlelo.

³⁶ Kaleb, la Jephunneh asopo si lutdun longchotji. Alangli Nephan kroithipver, lapen laphan lapen la apoton atum aphan la kelang alongle Ne piji.”

³⁷ Nangtum ajok Hemphu neliphanta aningthilo lapen pulo, “Nang, Moses ta det lutdun longlelo.

³⁸ Bonta nangphan nangkerap dun abang, Nun asopo Joshua aning pathirthipnon. Israel atum longle pacheraijisi alangli japonpo.”

³⁹ Anke Hemphu etum kadokave kedo-an aphan epulo, “Nangsomar atum me-hingno kechiniji aphan bihek-lang atumsi det lutdun longpo nangtum kepu a-osomar atum aphan hotur atum nep-etpo, lapu kali, latum aphansi Ne longle pipo, lapen la latum cherai longji.

⁴⁰ Bonta nangtum aphan ke chiruithusi sangtimili ajo damthupo ha Akaba atalo chekom soding atovar pen.”

⁴¹ Nangtum thak-lo, “Moses, netum Hemphu abe thursi pap klemtang lo. Bonta non nelitum tengkheng dampo, netum aphan Arnam Hemphu hukum nekepi ateng.” Anke nangtum kadokave abangphutinta hai unji pu mathasi inglong aren ajo ketengkhengjisi chesik-lo.

⁴² Bonta neliphan Hemphu pulo, “Latum ketengkhengkhe detjile pacherenon, athema latum along Ne dodunde, lapen latum aphan ahotur atum paremdetpo.”

⁴³ Hemphu kopisi kepuma ne nangtum aphan nangthan lo, bonta nangtum nangno chedendelo. Nangtum Alangli be thurlo, lapen nangtum cheparokasi inglong aren ajo tengkheng damlo.

⁴⁴ Anke hadak inglong along kedo Amor atum pijo ahur ason nanghirpaklo. Latum nangtum aphan Hormah an nang arphlung dunlo lapen Edom anglong aren ajo latum nangtum aphan paremdet-lo.

⁴⁵ Lasi nangtum Hemphu pen kerap kelongjisi hangjolo, bonta Alangli nangtum akehang mate akardom anochedende det-lo.

⁴⁶ Lasonsi Kadesh along kedo ajirdingklui an ongdung arni nangtum hadak dolo.