KECHENG 6 - BAIBEL KANGTHIR (BSI)

Monit Akhei A-ot-kelangno

¹ Pirthe athak monit atum kechan pangcheng-lo, lapen latum aphan asopimar atum mahang pathekpilo,

² Keklotang Arnam asopomar atum monit asopimar atum arje langmesen thek-long-lo; lapen latum aphan chongvaisi latum halatum pen che-en chedolo.

³ Anke Hemphu pulo, “Ne Karjong monit along kaike dovervelo, athema la ok chot, la apotsi la achethe ningkan 120 an parengchotpo.”

⁴ Halaso ahut Nephilim atum pirthe athak dolo, latum monit asopimar atum pen pen chopatherap asolo. Lahei atum hako ahut ingtangrak lapen anong chethanghu amonit atumlo.

⁵ Pirthe athak monit akun langnopik-lo, Arnam la thek-long-lo, lapen latum aning kematha asontin ta kehingno saide.

⁶ Lapen pirthe athak Hemphu monit kepinchong apot Alangli ning che-oilo, lapen la Alangliphan aning paduk-lo.

⁷ La apotsi Hemphu pulo, “Ne kepinchong amonit aphan pirthe athak pen Ne pavirdetpo, monit, lapen pi lapen keklim api lapen kangjar avo-heihei aphan, pima latum aphan Ne kepinchong apot Nening che-oilo.”

⁸ Bonta Hemphu angno Noah abang kangjinso long-lo.

Noah

⁹ Noah a-ove-heihei lahei helo. Noah inut dhoromi amonit, a-ove ahut alangliphan kejong adim ave; Noah, Arnam pen-pen kengkam chejorrap-rap-lo.

¹⁰ Lapen Noah asopomar bangkethom do, Shem, Ham lapen Japheth.

¹¹ Non Arnam angno pirthe chehotang-lo lapen pirthe kephalangno si plengthup-lo.

¹² Lapen Arnam pirthe langsi thek-long-lo, la chehopik-lo; athema ok kedo-an halatum atovar pirthe athak ahokpetpe det-lo.

¹³ Lapen Noah aphan Arnam pulo, “Ne kadokave ok an pavir-etpo pusi mathathip-lo; athema latum pen ajok pirthe kephangno plengset-lo, langtha, pirthe pen Ne latum aphan pavirdetpo.

¹⁴ Thengjangthu pu akapat pen telong ehum kimnon, lapen telong ingdenghini binon, lapen la athak alkatra vitnon.

¹⁵ Lasonle nang telong selamnon: Telongkeding ingrup 300, la arpan ingrup 50, lapen kangtui ingrup 30.

¹⁶ Telong asarnung selamnon lapen la ingrup isi pangtuira patangnon; lapen la akung anat inghap selamnon, la abersi athengsong anghap selamnon.

¹⁷ Athema langtha, pirthe athak sining aber achethe-kerengphun api an kepavirjisi lang-heihei alangthepi Ne nangtoipo; pirthe athak kedo-an amar thipo.

¹⁸ Bonta nang pen Ne kechejok aloh pathikpo, lapen nangtum telong arlo vangpo, nang, lapen nangsomar atum, nangpiso lapen nangmunpi atum.

¹⁹ Lapen ok kedo-an kereng-et asontin amar, nang echor-echor ajattin telong arlo vanpo, latum nang pen pen kerengrappetji aphan; lahei api lapen alo donangpo.

²⁰ Vo ta ajattin, marat api ajattin, longle athak keklim api ajattin, ta nanglong arlo nang arludunpo, halatum kereng-longji aphan lo.

²¹ Kechome ahormu ajat an, lapen la pangrumra binon; lapen la nangtum aphan an plangpo, lapen halatum aphanta lo.”

²² La Noah klemlo; la aphan Arnam hukum kepi ason an klempi-et-lo.