KECHENG 44 - BAIBEL KANGTHIR (BSI)

Kangbo Aharlung

¹ Ahem aban atum ahemphu aphan Joseph hukumpilo, “Laso amonit atum athoila latum kepon-un-an asok thapdunnon, lapen abangphutin atangka latum athoila arlo athaksi along bidunkok non.

² Lapen ke ne harlung ke la akebisi athoila arlo le bidunnon, atangka penpen.” Laphan kepu ateng la klemlo.

³ Adapprang a-ik atum aphan agadha pen pen atovar pachedamtoilo.

⁴ Rongsopi pen latum damchot anvet-lang, ahem kelang aban aphan Joseph pulo, “Halaso amonit atum aphi dunseraktha. Latum kethek-long pen arjunon, ‘Akeme alar kopi apotsi nanglitum kehingno keklemloma?

⁵ Kopi athesi nanglitum nehemphu arup aharlung kechonghu pondet-loma? La pensi alangli kejunchot, la pen si alangli sang-kelang-i. Nanglitum isi adaithedung akam klemlo!’ ”

⁶ Aban abang latum aphan chephodunsi, laso alam alangli pu lemdet-lo.

⁷ Laphan latum thak-lo, “Lason alam keningje ke, akehai, kopi aphansi kepulo? Nelitum semetang-lo, lason akam nelitum klemkle.

⁸ Nangli chini, nelitum athoila arlo Kanaan adet along kelong atangka nelitum nangliridengsi tangka nangvoidet-lo. Tangte kopisi nelitum nangli hemphu ahem pen rup mate ser chonghu jilangma?

⁹ Akehai, nelitum angbong jongsi mane abang along lason long-lok-lo pulote, laphan pathilotnon, lapen nelitum kedo-an ke nanglitum aban plangpo.”

¹⁰ Alangli pulo, “Neli nang chedon-dunlo, bonta harlung kepon abangsi neban plangchotji, lapen akaprek atum an ke damlongji.”

¹¹ Lasi latum athoila longle arum pasunserak-lo, lapen abangphutin ta amethang athoila chepurlo.

¹² Joseph aban abang aklengsi pen ha akebisi an angton pen ripamelo, lapen Benjamin athoila arlo si harlung long-lok-lo.

¹³ Aningduk si a-ik atum ape chingsek-lo, latum agadha charthang lo, lapen rongsopi anat nang chevoithulo.

¹⁴ Judah lapen akorte atum Joseph ahem nangkele ahut, alangli hadaksi dolang. Alangli angno latum angphun patongki lo,

¹⁵ lapen pulo, “Nangtum kopisi keklemloma? Ne ason amonit sekelang pen ajok nangtum aphan nanglong un pu nangtum chininelangma?”

¹⁶ “Nangliphan nelitum kopisi kepujilangma, akehai?” Judah thak-lo. “Nelitum kopusonsi lam chedanthek poma? Nelitum kosonsi chepajokthek poma? Nelitum adai Arnam si hek-ang-lo. Nelitum kedo-an ta non ke nangliban lo, harlung kelong abangphu chot kali.”

¹⁷ Joseph pulo, “Oh, kali! Ne la klemkle! Harlung kedo abangphusi neban plangchotji. Kadokave atum nangpo along chedamlong pame unji.”

Benjamin Aphan Judah Kechoningripi

¹⁸ Joseph along Judah damsi pulo, “Kanghonpen, akehai, nanglipen neliphan pachingkilongtha. Neliphan ningthi ik-ri; nangli ke recho amethang asonthakthak-lo.

¹⁹ Akehai, nangli nelitum aphan arjulo, ‘Nangtum apo lapen akaprek akorte dolangma?’

²⁰ Nelitum nanglithak-lo ‘Nelitum apo, dolang, sar-olo, lapen korte akebisi do, alangli kesar abotor ahutsi mahangthekpilo. Laso a-oso a-ik ke thi-et-lo, lapen la helo apei epumpet kerenglang asolo; apo laphan chinghonpik.’

²¹ Akehai, laphan ladak kevandetji aphan nangli nelitum aphan nepulo, anke laphan nangli lang longpo,

²² lapen nelitum nangliphan thak-lo, la apo aphan che-o-un-e; la jongsi la klemlote apo abang thilotpo.

²³ Anke nangli pulo, ‘Nangtum along jongsi nangtum akorte akebisi nangdunde tangte nangtum aphan nelong pavanglongle.’”

²⁴ Nelitum apo along nelitum kechevoi ahut, nangli kepu alam an alangliphan nelitum than-lo.

²⁵ Anke alangli nelitum aphan asap-bak asok kenamji aphan pulo.

²⁶ Nelitum thak-lo, “Netum damde; netum along jongsi netum akorte akebisi nang-lodunde pulote bangpo along netum damlongle. Netum along netum akorte akebisi abang nangdun lote lasi bangpo along damlongji.”

²⁷ Nelitum apo nelitum aphan nepulo, “Nangtum chinilo, nepiso Rachel nephan pinso oso banghinisi mahangpathek chot.

²⁸ Inut abang ke ne-otekangbub-lo. Laphan ingnam api atum ingsek-i-lo tahai, pima la ke-o arni pen ne laphan thek-longledet-lo.

²⁹ Nangtum jongsi laphanta pondet-lo lapen laphan pine cheplangdet-lo pulote, nangtum keklem nekepasung aningduk si nekesar ahut nepathipo.”

³⁰ Lapen Akehai, Judah pubom-lo, “Laso a-oso non neli ponpepin pen nelipo along chedamlote, nelilong oso avedet kethek-longpen amat alangli thilotpo.

³¹ Alangli chetheke oso achethe pensi cherap-het asonlo, lapen alangli lapu-an kesarlo, laso alam pen kematha chepasungsi thilot tahaipo.

³² Kopisi dolang, oso alar nelipo aphan nelichethe si chechak tekangdet-lo. Alangliphan neli pulo, neli jongsi oso alangli long ponpipe pulote, kedo-an adai apot nelikai isi nelisi chechak lunpo.

³³ Lasi akehai, non, oso alar nelisi nangliban ason nangdodun po, la ke a-ik atum along padunlonang.

³⁴ Oso jongsi nelilong nang dunde pulote kosonsi nelipo along neli chevoi poma? Laso akevir neli po aphuthak kevang langdunding-un-e.”