KECHENG 41 - BAIBEL KANGTHIR (BSI)

Recho Amang Alam Joseph Athe Kethan

¹ Ningkan hini damdet aphi, Ijip arecho ke Nil Aroi akung karjapding pu amang hemanlo.

² Kangtulimlam lapen angmi kejangtomtam achainong api jon throksi, langroi pen nangbar si bap kechopanji pangcheng-lo.

³ Anke ajon kaprek achainong jon throksi vang-lo, lahei chungkreng-o lapen areppi chon-roirai. Langroi akung latum akaprek achainong api adung arjapther-tharlo,

⁴ lapen kechungkreng achainong atum, kangtulimlam achainong atum aphan cho-et-lo. Anke recho amek prangdak-lo.

⁵ Alangli puthot amek chejangthulo, lapen akaprek amang hemanthulo. Sok athe bu throksi abu ingcholim lapen men pame, ehin anat vangchomlo.

⁶ Lapen akaprek bu throksi asok arong nang chingjok dunlo, sangtimili atomon pen apot athememe lapen thep-lailui,

⁷ lapen athe keme asok abu atum aphan ketheplailui asok abu atum joilut-lo. Recho amek prangdak si la ke mang keheman lo pu chechinilo.

⁸ Adapprang la ningrikrung-lo, lasi alangli mekbin keklem atum aphan lapen Ijip athek-kere kedo-an atum aphan phapet-lo. Alangli mang alam halatum aphan chethan pet-lo, bonta alangliphan baduta mang athe alam than thekthe det-lo.

⁹ Anke recho aphan hor ahemaripo abang thanlo, “Neli kechokche alam pini neli chekobirvek nangji.

¹⁰ Nangli him ahemarikethe aphan lapen neliphan ningthi-olo, lapen nangli nelitum aphan keton ahemphu ahem arlo nebengthot-lo.

¹¹ Ningve isi nelitum banghini anut-tin ta mang hemanlo, lapen mang athe ta prekjamjum.

¹² Nelitum along inut Ibri ariso do, keton atum ahemphu aban. Nelitum amang chethanlo, lapen alangli nelitum aphan mang athe alam nethanlo.

¹³ Alangli kethan asonthot si chekokdet-lo: Nangli neliphan aphrang akam nepaklem long-lo, lapen him ahemari aphan ke nangli pathilot-lo.”

¹⁴ Joseph aphan recho pahang-lo, lapen laphan hemkangsam pen van det-lo. Alangli chu chingtipdet lapen ape-ari cheseledet aphi la recho angno vang-lo.

¹⁵ Laphan recho pulo, “Nemang hemanlo, lapen la baduta nethan thekthe det-lo. Nang mang alam athe thanthek pusi nephan nethanlo.”

¹⁶ Joseph thak-lo, “Neli thekthe, Recho, bonta Arnam si isi mesen athe alam nepi-unpo.”

¹⁷ Recho pulo, “Ne Nil aroi akung karjapding amang hemanlo,

¹⁸ jonthroksi, kangtulim lapen angmi kejangtom achainong api langroi pen vangsi bap kechopan ahut,

¹⁹ akaprek jon throksi achainong chungkreng lapen arepi keklangroi, vang-lo. Lahei Ijip angbong ne kethek-long kechung kreng nei achainong-lo.

²⁰ Kechungkreng achainong atum kangtulim achainong aphan cho-et-lo,

²¹ bonta baduta la chinine det-lo, pima latum aphrang asonthot si hingnolo. Anke ne mek prangdak-lo.

²² Lapen ne kemenpame asok abu throksi amang ta hemanlilo, ehin anat vangchomlo.

²³ Anke sok abu throksi sangtimili atomon pen ajok amukethep-lai arong nangvang-lo,

²⁴ lapen abu keplengset asok aphan kethep-lai asok abu atum joilut-lo. Mekbin akam keklem atum aphan nemang alam ne thanlo, bonta latum angbong baduta lahei amang alam nethan thekthedet-lo.”

²⁵ Recho aphan Joseph pulo, “Hini amang ta isinat aphanlo; Arnam kopisi keklempoma Alangli nangliphan thanlo.

²⁶ Jon throksi kangtulim achainong ke ningkan throksi aphanlo, lapen sok athe keplenglim abu throksi ta ningkan throksi aphanlo; latum alam athe ta isinat-lo.

²⁷ Kechungkreng achainong api jonthroksi lapen sangtimili atomon kejap asok-muthep bu throksi ke ningkan throksi akhim kethurji aphan lo.

²⁸ La ke nangliphan neli nangkepu asonthot-lo-Arnam kopima keklem ji nangliphan nangpaklang-lo.

²⁹ Ijip adet adang bithe ningkan throksi sokthe doji,

³⁰ Laso aphi, ningkan throksi akhimthurji, lapen kerengme arni an chetengnebubpo, pima akhim si det paruhup-po.

³¹ Kedorphlup aningkan tengnedetpo, pima aphi kevangji akhim ke phere memepikji.

³² Mang keheman lemdet ke bangso akam Arnam si kepathik-lo lapen la Alangli mononphi paprapjin pen plangpo.”

³³ Non nangli ajehak abidi kedo lapen acho alam kechinithek amonit ingvaira, alangliphan le det kelang abang batnon.

³⁴ Nangli kaprek aban atum aphan ta kam bat nangji lapen sokthe aningkan phan pho pen ephan asok khangnon ningkan throksi angbong.

³⁵ Latum aphan kecho amar an kevangji aningkan kepangrumjile hukumpi-iknon, lapen rongsopi-heihei along sok kepabiji ajakong latum aphan pi-iknon, lapen la patondingnon.

³⁶ Ijip aputhak kevangji ningkan throksi akhim ahut det adang aphan kepadorji asok-lo. Lason si rat atum ingchir longle detpo.

Joseph Aphan Ijip a-Govornor Kebat

³⁷ Recho lapen alangli ban atum laso akam chedondunlo,

³⁸ lapen latum aphan alangli pulo, “Joseph pen apar kememuchot amonit eli longlelo, alanglike Arnam akarjong kedo amonit-lo.”

³⁹ Joseph aphan recho pulo, “Arnam si nangliphan la kedo-an ta nanglipaklang-lo, lapen ajok chinipamelo, nangli badu apar bidi lapen acho alam kechinimuchot abang-lo.

⁴⁰ Nangliphan si neli det aputhak ahemphu arpu nangbat-lo, lapen neli rat atum kedo-an nangli hukum kroipetpo. Nangli jakong la ke nelidun-lo.”

⁴¹ Non lasi nangliphan Ijip adang bithe aputhak a-Govornor bat-lo.

⁴² Recho asap ketheng-i a-arnan recho chephlok si Joseph arichimun along thonlo. Alangliphan la kemesen ape-kanglit pangchoilo, lapen achethok-komjir isi ser alek avaikang pa-ilo.

⁴³ Alangliphan la recho adun ahemkonglong pardonlo, lapen alangli man kepi atonbang atum alangli-phrang damlo, lapen hang-lo, “Tovar peknon! Tovar peknon!” Lasi Joseph aphan Ijip adet a-Govornor bat-lo.

⁴⁴ Alangliphan recho pulo, “Neli ke recho—lapen nangli hukum longlete Ijip adet kedo-an ta ari tame akeng tame chirung-longle.”

⁴⁵ Joseph aphan alangli Ijip asor amen Zaphenath Paneah pu hang-lo,

⁴⁶ lapen alangliphan Heliopolis arongsopi inut akurusar asopi, Asenath, pen pangrilo. Ijip arecho aphan Joseph kangduk ahut alangli arta ningkan 30 lo. Alangli recho akangsaihem osi det adang bithe langdamlo.

⁴⁷ Ningkan throksi sokthe aningkan sok longpik-lo,

⁴⁸ kelong an Joseph pangrumsi rongsopi along puru arlo thap-et-lo. Alangli arongsopitin hidi pen sok pangrumsi la akung-kung sok bilo.

⁴⁹ Lapu-an asok ke-ong-lo, Joseph kelin ingtonkok-lo la talo asangtimili asonlo.

⁵⁰ Akhim kethur aningkan kevang aphrang, Asenath pen ajok Joseph asopo banghini dolo.

⁵¹ Alangli pulo, “Nekesung kepho-an lapen nepo ahemtun kedo an aphan Arnam si nepatengne-et-lo;” lasi la aso-akleng aphan Manasseh pusi amen irlo.

⁵² Alangli pu thulo, “Nekesung adet Arnam nephan osomar nepilo;” lasi alangli sopo adakvam aphan Ephraim pusi amen irlo.

⁵³ Ijip adet sokthe ningkan throksi rengdok-rengni nangjut kok-lo,

⁵⁴ lapen ningkan throksi akhim nangcheng-lo, Joseph kepu asonthot nangplang-lo. Akaprek adet alongtin ta akhim nangdolo, bonta Ijip adet adang-bithe ta an dolo.

⁵⁵ Ijip aso atum an ingchir lote, an kelongjisi latum recho aphan cho-ar-empo. Anke alangli latum aphan Joseph along toipo, lapen latum aphan kepu asonthotsi klemlo.

⁵⁶ Akhim thurbomsi hingnopik-lo, lapen det adang bithe ta chetangphlup-lo, lasi puru ahem kedo-an Joseph ingpulo, lapen Ijip aso atum aphan jorlo.

⁵⁷ Joseph pen sok kenamjisi pirthe adang bithe-bitha pen rat atum Ijip adet vang-lo, pima akhim bithe-bitha ta chetangphlup-lo.