KECHENG 4 - BAIBEL KANGTHIR (BSI)

Kein Lapen Abel

¹ Non Adam, la aphisi Iv pen che-enlo lapen bangpi oso chopathelo lapen Kein aphan mahangpathek si pulo, “Hemphu akerap pen apot ne inut pinso a-oso long-lo.”

² Lapen bangpi puthot la amu Abel amahang pathek-lo. Non Abel ke biresak kevi abang, lapen Kein ke inut longle asai ketiki abang-lo.

³ Ahut nanglesi Kein abang Hemphu aphan longle athesere adan vanpilo,

⁴ lapen Abel ta la api ahur pen athukedonei kechingthok-cheng api van pilo. Lapen Abel adan Hemphu deng-lo,

⁵ bonta Kein lapen la adan Alangli dengde det-lo. Lasi Kein aningthihak-lo, lapen la amahang ikkui lo.

⁶ Kein aphan Hemphu pulo, “Nang kopi athesi nangning kethi lo, lapen nangmahang chepa ikkuilo?

⁷ Nang jongsi keklem mesensete, pap ke nang inghap along chotonding-lo; la nangphan si aning hang-lo, bonta nang la aphan chepahaidet nangji.”

⁸ Kein amu Abel aphan pulo, “Etum hidi barlonang.” Lapen latum hidi along kedo un ahut, Kein ke amu Abel aphuthak thurkrap-lo, lapen laphan pathilot-lo.

⁹ Anke Kein aphan Hemphu pulo, “Nangkorte Abel konat-lo?” La thak-lo, “Ne chinine; ne nemu aphan kelang abangma?”

¹⁰ Lapen Hemphu pulo, “Nang kopisi keklempor loma? Nangmu avi ase longle pen Nenat nangchirukong-lo.

¹¹ Non lasi nang ke longle pen hirjuno long-lo, la nangmu avi nangrideng ke-enjisi angho chingpudang-lo.

¹² Nang longle ketiki ahut, la nangphan kepathe-oji ajakong avelo; nang chongvir nangpo lapen pirthe athak kedamtap abang plangpo.”

¹³ Hemphu aphan Kein pulo, “Ne karchak un apar neduk themulo,

¹⁴ langtha, pini arni Nang nephan longle pen phlungtang-lo lapen Nang ingno pen ne chepatu nangpo; lapen ne chongvir nangpo, lapen pirthe athak damtap nangpo, lapen nephan nekelong aling abang nepathipo.”

¹⁵ Anke Hemphu laphan pulo, “La an setke kali! Kein aphan jongsi mane pathilot pulote halabangso aphan phanthroksi alar huiji.” Anke Kein aphuthak Hemphu isi angthek bilo, labangso aphan kethek-long aling abang kepathilot-le detji aphanlo.

¹⁶ Anke Kein Hemphu angno pen damjuisi “Nod” pu adim, Iden anihang anat dodamlo.

¹⁷ Kein ta piso enlo, lapen bangpi aso chopathelo, lapen Enok amahang pathek-lo; lapen la rongsopi isi kimlo, lapen asopo Enok amen rongsopi irlo.

¹⁸ Enok aphan Erad amahang thekpilo; lapen Erad ke Mehujael apolo, Mehujael ke Methushael apolo, lapen Methushael ke Lamek apolo.

¹⁹ Lamek piso banghini enlo, inut abangpi amen ke Adah lapen anut kaprek abangpi amen ke Zillah.

²⁰ Adah ta Jabal amahang pathek-lo; la ke pehem-heihei lapen kepangreng api kedo atum apolo.

²¹ La akorte amen ke Jubal; la ke kumbeleng-chongdeng lapen pongsi kerim atum apolo.

²² Zillah ta Tubal-kein pu a-oso mahang pathek-lo; la ke tam lapen ingchin kerot-kevut ajohton ahemailo. Tabulkein angjir ke Naamah helo.

²³ Lamek apiso atum aphan chepulo: “Adah lapen Zillah, nelam arjutha; nang Lamek apiso atum, ne kepu alamthe no chedentha: Nephan nepasodak amat ne inut amonit pathilot-lo, inut ariso nephan nekechok apot.

²⁴ Kein phanthroksi alar chehuilote, chenamsi Lamek ke phanthroksi kep-ra throksilo.”

Seth Lapen Enosh

²⁵ Lapen Adam apiso pen che-enthusi puthot, bangpi inut sopo mahang pathek-lo, la amen ke Seth, athema bangpi pulo, “Abel alar Hemphu nephan anut kaprek sopo nepilo, athema Kein halaphan pathi lot-lo.”

²⁶ Seth aphan ta inut asopo mahang thekpilo, lapen alangli la aphan amen Enosh pusi irlo. Halaso ahut monit atum Hemphu amen hang pangcheng-lo.