KECHENG 3 - BAIBEL KANGTHIR (BSI)

Monit Akekroithekthe

¹ Non Hemphu Arnam kepinchong nampi api an angbong pen pherui abang resak muchot. La arloso aphan pulo, “Beri arlo athengpi an athe chori” putong Arnam nangkepuma?

² Pherui aphan arloso abang pulo, “Beri arlo athengpi-heihei athe netum cholong;

³ bonta Arnam pulo, ‘Nangtum beri angbong chittim athengpi athe chori, lapen la nangtum paphori, kalite nangtum thiji.’ ”

⁴ Bonta arloso aphan pherui thak-lo, “Nangtum thithe.

⁵ Athema nangtum la kecho ahut nangtum amek chingpu dangpo, lapen nangtum Arnam ason plangpo, keme lapen kehingno chini-unpo pu Alangli chini.”

⁶ Lasi arloso abang halaso athengpi kecho aphan mesenji pu thek-long-lo, lapen la emek aphan kelangmesen, lapen halaso athengpi gian kelongji ar-imeme, bangso athengpi athe bangpi ensi chodet-lo; lapen bangpi apenan aphan ajehak pilo lapen alanglita chodet-lo.

⁷ Anke banghini ta amek chingpudang-lo, lapen latum areng-angse pu chechinilo; lapen latum thebo arong arvosi latum chedip-i-lo.

⁸ Lapen kangsamdop arni beri arlo Hemphu Arnam akengkam arki latum arjulong-lo, lapen beri athengpi-heihei angbong Hemphu Arnam angno pen monit lapen apiso chepatujoilo.

⁹ Bonta Hemphu Arnam monit aphan hangsi la aphan pulo, “Nang konatsi kedolo?”

¹⁰ Lapen la thak-lo, “Beri arlo nang kevang arki ne arjulong-lo, lapen ne pherelo, pima nereng-angse; lapen ne chepatulo.”

¹¹ Alangli pulo, “Nangreng-angse pu komatsi nangphan nangkepulo? Ne chori pu nangphan hukum nangkepi athengpi athe nang chodetma?”

¹² Monit abang pulo, “Nang nelong nang-kepadodunji pu nekepi a-arloso, bangpi si thengpi athe nekepi lapen neli chodet-lo.”

¹³ Anke Hemphu Arnam, arloso aphan pulo, “Nang la kopisi keklemlo ma?” Arloso abang thak-lo, “Pherui si nephan ne chongthuidet, lapen ne chodet-lo.”

Arnam Kangsai

¹⁴ Pherui aphan Hemphu Arnam pulo, “Pima nang la keklem apot, Kepangreng api-an angbong apar lapen nampi api-an angbong apar nang ahirjuno kepho abang-lo; nangpok pensi nang dam nangpo, nangkai isi nang longle aduk si chonangpo.

¹⁵ Nang lapen arloso angbong, nangsomar lapen bangpi asomar angbong hotur pacheplangpo; la nangphu pangje po, lapen nang la akengti pangjepo.”

¹⁶ Arloso aphan Alangli pulo, Oso mahang kepathek ahut nang keso jasemetsi pa-ongpo; sopik pensi nang oso chopathe nangji, seta nangpenan aphan si nangning do-eji, lapen la nangphuthak pangripo.

¹⁷ Lapen Alangli Adam aphan pulo, “Pima nang nangpiso alam karju apot, lapen ‘Nang la chori’ pu Ne nangphan hukum nangkepi athengpi chodet apot, nang pen apot longle pahirjuno lo; nangkai isi chepaduk-khrup pensi nang cholongji;

¹⁸ Ingsu lapen bapsudo-heihei nangphan doji lapen hidi ajo athengpi arong athe-heihei si nang chonangji.

¹⁹ Nang-ing-i buprup si nang an cholongji ha longle along nang chevoivetik, athema nangphan la pensi nangke-en lo; nang longle aduk lo, lapen longle aduk along si nang chevoinangji.”

²⁰ Adam apiso aphan Iv pusi amen irlo, pima bangpi ke kereng an amar apei lo.

²¹ Lapen Adam lapen apiso aphan Hemphu Arnam ok-reng ape-heihei selampilo lapen latum aphan pangchoilo.

Beri Pen Adam Lapen Iv Aphan Kephlung

²² Anke Hemphu Arnam pulo, “Langtha monit atum Etum ason plangtang-lo, keme lapen kehingno chinitang-lo; lapen non la ari pen chethe atheng pi endet-ra chodet apot-lo lapen kaike rengver po.”

²³ La apotsi la aphan ke-en alongle kepatikijisi laphan Iden aberi pen toijuilo.

²⁴ Alangli laphan phlungjuilo lapen Iden aberi anihang anat Cherubim bilo, lapen chethe athengpi atovar keraijisi ame-akar kedo anokjir epak hevikdirlo.