KECHENG 27 - BAIBEL KANGTHIR (BSI)

Jakob Aphan Isaak Kepahirme

¹ Isaak nonke sartang-lo, lapen amek checharchedet-lo. Alangli aso akleng aphan hang si pulo, “Po!” Kopilo, pu la thak-lo.

² Isaak pulo, “Nang chinilo, ne sartang-lo, lapen thidap-prangpo.

³ Nang thai lapen aso-heihei chepon-ra, det arlo damnon, lapen nephan ejonbak api pathinon.

⁴ Ne ningkehang kechomesen ahan ajehak tun pamenon, lapen la nelong van non. La ne chotangdet aphi, ne thithe aphrang ne kepadu ahirjume nangphan nang-pitekangpo.”

⁵ Iso aphan Isaak lam kethanbom ahut, Rebeka ke arjudunding-lo. Lasi Iso sekar kedam bar-et aphi,

⁶ Jakob aphan bangpi pulo, “Iso aphan nonhet nangpo kethan alam ne arjudun long-lo,

⁷ ‘Nephan pi nevanpira la netunpinon. La ne chodet aphi, ne thithe aphrang nangphan Hemphu angno hirjume nang-pitekangpo.’

⁸ Non, lasi, po, ‘Rebeka ningjebomlo, ‘Nelam arjutha, lapen ne kepu aling le klemnon.

⁹ Pi ahur along damra, lapen athu kedo abi jonni ingvainon, anke lahei ne tun longpo lapen lahei pen ajehak nangpo aning kedoknei ahan tun pipo.

¹⁰ La nang alanglilong ponlongpo kepachoji aphan, alangli thithe ako la ahirjume nangphan nangpi tekangpo.”

¹¹ Bonta apei aphan Jakob pulo, “Nang chini Iso ke angmijanghu amonit, bonta ne ke nailep.

¹² Nepo nephan nepapho lote ne alang phan pachobeidet-lo pu chinipo; lasonsi ahirjume alar nephuthak ahirjuno si chevanrongpo.”

¹³ La apei thak-lo, “Nangphuthak ahirjuno kepho an nephuthak le paklonang, po, ne kepu ateng le klemnon, lapen nephan damra bi nevanpinon.”

¹⁴ Lasi halahei ke-endamjisi la damlo, lapen bangpi aphan vanpilo, lapen la apo aning kehang ahan bangpi tun pilo.

¹⁵ Anke Iso akemenei bangpi hem kebi achoi bangpi endamlo, lapen lahei Jakob aphan pangchoilo.

¹⁶ Bi areng-heihei la ari aphang along bangpi bat-lo lapen la angmikave achethok along an ta bat-lo.

¹⁷ La aphan bangpi kechomenei ahan bangpi kepangdang ahim pen pen pilo.

¹⁸ Anke apo along Jakob damlo, lapen pulo, “Po!” “Kopilo” alangli thak-lo. “Nang komat abang-lo?”

¹⁹ Jakob thak-lo, “Ne ke nangso akleng Iso lo; nang kepu ateng si ne keklemlo. Kanghon pen ingnira ne nangphan nangkevanpi a-ok chotha, anke nang nephan nepahirme unpo.”

²⁰ Isaak pulo, “Nang kopusonsi lapu-an kelongdap-lo, po?” Jakob thak-lo, “Nang Arnam Hemphu si la kelongji nerap-lo.”

²¹ Jakob aphan Isaak pulo, “Nangbang nang kepapholong jile nedung vangtha, po. Nang chenamsi Iso loma?”

²² Apo adung Jakob damsi chepachinilo, lapen alangli pulo, “Nangse ke Jakob ase ason, bonta nangri-nangphang ke Iso ari ason.”

²³ Alangli Jakob aphan chinine det-lo, pima la ari Iso ari asonsi angmi dolo. Laphan alangli ahirjume kepiji dokdok-lo,

²⁴ bonta arjuthulo, “Nang chenamsi Iso loma?” Kalang-lo, la thak-lo.

²⁵ Isaak pulo, “Nephan ok ajehak nevanpitha. Ne la chodet aphi, ne hirjume nangphan nangpipo.” Jakob la aphan vanpilo, lapen alangli phan kepajunjisi la drakha ahorlang ta vanpilo.

²⁶ Anke laphan apo pulo, “Nedung vang-ra, ne ingjuptha, po.”

²⁷ Alangliphan kangjup jisi la kevang ahut, la achoi angnim Isaak ingnim long-lo, lasi laphan alangli hirjumepilo. alangli pulo, “Kedokjin nesopo angnim ke Hemphu kepahirjumetang ahidi ason.

²⁸ Arnam sining angsong pen ar-e nangpapi nang lapen nanghidi-heihei ho-or padonang! Nangphan alangli dorphlup asok-asang lapen drakha ahorlang nangpapi lonang!

²⁹ Det atum nangban paplang lonang, lapen rat atum nangphan pardomri nang. Nangdon-nangrap aphuthak nang pangrinang, lapen nangpei asomar atum nangphan pardomrinang. Nangphan ahirjuno kepi abang pahir junonang, lapen nangphan kepahirme abang ahirjume paplangnang.”

Isaak Ahirjume Iso Kehang

³⁰ Isaak ahirjume kepi patang-lo, lapen Jakob odet aphi, la a-ik Iso sekar pen nangchevoilo.

³¹ La ajehak kechomesen ahan tunlo lapen la apo aphan ponpilo. La pulo, “Kanghon pen, po, ingnipamenon lapen ajehak nangphan nangkevanpi a-ok chotha, anke nephan nang hirjume nepi-unpo.”

³² “Nang komat-lo?” Isaak arjulo. “Nangso-akleng Iso-lo,” la thak-lo.

³³ Isaak keklemhur pangcheng-lo lapen abangbithe klemhurlo, lapen alangli arjulo, “Tangte hala komat-lo, pi that si la nelong kevan abang komat? Nang kevang aphrangchot-lang ne kecho. Halaphan si nehirjume padu pilo, la apotsi la ke kaike halaphanlo.”

³⁴ Iso la arjulongdet aphi, la hangserlo lapen aning hodaksi pulo, “Nephan ta nanghirjume nepinon, po!”

³⁵ Isaak thak-lo, “Nangmu vang-lo, lapen nechobeidet-lo. Halasi nangkelongji ahirjume pondet-lo.”

³⁶ Iso pulo, “La bataihini aphong-lo nephan la nekechobei. La amen Jakob pu jonghe chepu seta. La sonu-sokleng nejakong pondet-lo, lapen non la ne kelongji ahirjume ta ponthudet-lang. Nang nephan isibak ahirjume nebipipema?”

³⁷ Isaak thak-lo, “Ne laphan nang phuthak chepahemphuji pitang lo, lapen la adon-arap an ne la aban paplangtang-lo. Laphan ne soksang lapen drakha ahorlang pitang-lo. Non ne nangphan nangkeklem piji thangnat ta avelo, po!”

³⁸ Apo aphan Iso choningri-bomlang: “Nanglong isinat ahirjume tong kedochotma, po? Nephan ta pahirmetha, po!” La kechiru pangcheng-lo.

³⁹ Anke laphan Isaak pulo “Nangphan sining pen ar-e avelo, Aho-or kedo ahidi nangphan avelo.

⁴⁰ Nang ke nokjir pensi rengji, Bonta nangmu aban plangpo. Seta nang kethurkrap ahut, La akekhang pen nang phri-unji.”

⁴¹ Jakob aphan Iso langselet-lo, pima Jakob aphan la apo ahirjume pitang-lo. La mathalo, “Nepo kethi ningke-oi apor tebok-het-lo; anke ne Jakob aphan pathilot-po.”

⁴² Bonta Iso akemang alam Rebeka arjulongtang-lo, bangpi Jakob aphan hangsi pulo, “Arjutha, nang ik Iso ke nangphan nangnepsi nang kepathiji aphan mang-lo.

⁴³ Non, po, ne kopima nangkethan aling le klem non. Haran ne ik Laban along nang non amat damnon,

⁴⁴ lapen nang-ik aning kethi hamhetik an alanglilong malomso an dodunnon,

⁴⁵ lapen nang laphan kopima keklemtang alam tangnedetdetik an. Anke ne anut keprek nangphan nangpa-enjisi nangtoipo. Kopisi ne arnisivet angbong banghini nesomar kevirnangpo?”

Laban Anat Jakob Aphan Isaak Ketoi

⁴⁶ Isaak aphan Rebeka pulo. “Iso bang adet apiso atum pen apot Ne kesolo lapen lak-huitang-lo. Jakob ta jongsi lahei Hitti asopimar atum angbong inut aphan enlo pulote, ne thilot tahai.”