KECHENG 2 - BAIBEL KANGTHIR (BSI)

¹ Lasonsi sining-heihei lapen pirthe kethip papleng-lo, lapen hadak kedo api an aphan kethip papleng-lo.

² Lapen throksi arni Arnam Alangli keklemtang akam an patang-lo, lapen alangli keklemtang an akam pen throksi arni alangli sang-lo.

³ Lasi Arnam throksi arni hirjume pilo, lapen la pangthirlo, pima laso arni si Arnam Alangli kam keklemtang kepinchong an pen sang-lo.

⁴ Lahei helo sining-heihei lapen pirthe kepinchong ahut a-ove-heihei. Hemphu Arnam Pirthe lapen sining-heihei kepinchong ahut,

Iden Aberi

⁵ ingnam ajo athengpi pirthe athak avelang, lapen nampi abap-heihei chingjokjelang-athema pirthe athak Hemphu Arnam arve pajangjelang, lapen longle ketikiji amonit avelang;

⁶ bonta pirthe pen hunmelan pathursi longle adang-bithe pacham lo

⁷ anke longle enlo lapen Hemphu Arnam monit thip-lo, lapen kereng-i achethe atomon pen anokan angkok vutphulo; anke monit reng-et-lo.

⁸ Lapen Hemphu Arnam nihang anat Iden along beri selamlo; lapen hadak Alangli kethiptang amonit bilo.

⁹ Lapen Hemphu Arnam longle athak kelangmesen athengpi an arong pavang-lo lapen kecho aphan mesen, chethe athengpi arong ta beri arlo angbongchitsi dolo, lapen me-hingno gian athengpi arong ta dolo.

¹⁰ Beri lang kepapiji aphan Iden pen langroi eroi lilo, lapen hadak la chethak si roiphli dolo.

¹¹ Kechengsi abang ke Pishon; la ke Havilah alongle adang-bithe lilo, hadak ser dolo;

¹² lapen halaso adet aser mepik; Dellium lapen Onyx pu bor a-arlong ta hadak do.

¹³ Hini aroi amen ke Gihon; la ke Kush pu adet adang-bithe si lilo.

¹⁴ Lapen kethom aroi amen ke Taigris, lake Assiria anihang si lilo. Lapen phli aroi ke Euphratis.

¹⁵ Iden aberi kepatikiji lapen kepalangjisi monit aphan Hemphu Arnam pondet-lo, lapen la arlo laphan bilo.

¹⁶ Lapen Hemphu Arnam, monit aphan hukum pisi pulo, “Beri arlo arongtin athengpi nang chotame,

¹⁷ bonta me-hingno agian athengpi athe nang chori, athema nang la kecho arni amat nang thivekpo.”

¹⁸ Anke Hemphu Arnam pulo, “Monit inutpet kedo ke meme, Ne la aphan la asonthakthak la aphan kerap abang pinchongpo.”

¹⁹ Lasi longle pen Hemphu Arnam hidi api an lapen kangjar avo an pinchong-lo, lapen lahei kepalangji lapen amen kepa-irjisi Adam along vanpet-lo; lapen kereng-et kepinchong api an la ke-ir amen an lahei plang-lo.

²⁰ Chainong ajat an aphan, lapen kangjar avo an aphan, lapen nampi api an aphan monitsi amen-heihei irlo; bonta monit aphan keparapdun abang longle det-lo.

²¹ Lasi Hemphu Arnam Adam aphan amek pajanghet-lo, lapen la amek kejang-un ahut la areptak arrepi-heihei angbong pen ehong ensi la adim a-ok pen pachinghip-lo;

²² lapen monit pen Hemphu Arnam ke-en areptak pen Alangli inut arloso pinchong-lo, lapen bangpi aphan monit angno vanlo.

²³ Anke Adam pulo: “La ke non nerrepi-heihei pen arrepi-lo lapen ne-ok pen a-ok-lo; bangpi aphan ‘Arloso’ pusi hangpo, pima bangpi ke Pinso pensi enlo.”

²⁴ La apotsi inut amonit apo lapen apei che-osi apiso pen dorappet po, lapen latum a-ok isinatpo.

²⁵ Lapen monit lapen la apiso latum banghinita areng-angse lapen therak-re det-lo.