KECHENG 16 - BAIBEL KANGTHIR (BSI)

Hagar Lapen Ishmael

¹ Abram apiso Sarai inutbak ta alangliphan osomar amahang pathek pi thekthe det-lo. Bonta bangpi inut Ijip abanpi amen Hagar,

² lasi bangpi Abram aphan pulo, “Hemphu nephan oso kedoji pen khang-lo. Kopisi nang nebanpi pen i-rap-re det-lo? Bangpi nephan inut a-oso nepi un tahai mene.” Sarai kepu alam Abram ta chedondunlo.

³ Lasi alangliphan kepa en jisi bangpi Hagar pilo. (Lake Abram Kanaan adet kedo ningkan kep ahut si la plang-lo.)

⁴ Hagar pen Abram irap-rap-lo, lapen bangpi aso chopathelo. Bangpi aso kedolo pu kechini pen bangpi cheparokalo lapen Sarai aphan pinremlo.

⁵ Anke Abram aphan Sarai pulo, “Hagar nephan nekepinrem ke nang si adai, ne methangsi bangpi nangphan nangpilo, lapen bangpi aso kedolo pu chechini pen bangpi nephan nepinremlo. Hemphu le etum angbong komatsi kechokma nang pangsai lonang!”

⁶ Abram thak-lo, “Mesenlo, bangpi ke nangbanlo, nangber si dolo; bangpi pen nang kopima nangning-kehang alingle klemnon.” Anke Hagar aphan Sarai lapu-an chenek-lo, bangpi katjuilo.

⁷ Shur atovar anat kejejangtang ajo lang-amek along Hemphu apherangke Hagar aphan chetongdunlo,

⁸ lapen pulo, “Sarai abanpi Hagar, nang konat pensi kevang-lo lapen konat-lo kedampo?” Bangpi thak-lo, “Neli nelihemphi pen nangkekat-lo.”

⁹ Alangli pulo, “Bangpi along chedamthunon, lapen bangpi abanpi plangnon.”

¹⁰ Ako la puthulo, “Nangphan baduta kelakha un-e pin ke-ongdung nangso-nangsu Ne nangpipo.

¹¹ Nang inut sopo chopathepo, lapen nang la Ishmael pusi amen irpo, pima nang keningri ase Hemphu arjulongtang-lo.

¹² Bonta nangsopo ke nampi agadha asonsi donangpo; lake abangphutin abe thurpo, lapen abangphutin la abe thurpo. La ke adon-arap kedo-an pen hempreksi dopo.”

¹³ Hagar amethang charjulo, “Ne Arnam aphan ahokpet pen thek-long-loma lapen la kethan nangji aphantong kereng nang-lo ma?” Lasi bangpi aphan keningje a-Hemphu aphan “Kethek-long Arnam” pusi hang-lo.

¹⁴ La apotsi Kadesh lapen Bered angbong alangtuk aphan “Nephan nekethek-long kereng-et alangtuk pusi irlo.”

¹⁵ Abram aphan Hagar inut sopo amahang pathekpilo, lapen alangli laphan Ishmael pusi amen irlo.

¹⁶ Halaso ahut Abram arta ningkan 86.