KEBAR 5 - BAIBEL KANGTHIR (BSI)

Moses Lapen Aaron Ijip Arecho Angno

¹ Anke Moses lapen Aaron latum Ijip arecho angno damsi pulo, “Hemphu, Israel a-Arnam si pulo, Nerat aphan padam longnon, anke Nephan man kepijisi latum kejejangtang ajo rong-aje padopo.”

² “Hemphu komat-lo?” Recho arjulo. “Ne kopisi alangli lam karjunangpo, lapen Israel atum aphan padam-longpo?” “Ne Hemphu aphan chinine; lapen ne Israel atum aphan padam-long-le.”

³ Moses lapen Aaron atum thak-lo, “Netum aphan Ibri atum a-Arnam si amethang nangcheklang-lo. Netum a-Arnam Hemphu aphan kejejangtang ajo kethok kepajir damjile nithom nelitum aphan nelipadam longnon. Jongsi nelitum la klemkle pulote Alang nithom elitum aphan keso pen ajok mate ron pen ajok epathi-et-po.”

⁴ Moses lapen Aaron aphan recho pulo, “Rat atum aphan kam keklem kepangkreve-toiji putong nanglitum kemathama? Lahei aban atum aphan kam paklemtoinon.

⁵ Nang rat atum Ijip aso apar aphai ongmu tang-lo. Lapen non nanglitum kam keklem kepangtonjisi nanglining hang-lo.”

⁶ Anke halabangso arni amat kam ahemphu lapen kelang abangphu atum aphan hukum pisi pulo.

⁷ “Ita keselamji aphan sokpun rat atum aphan pirinon. Latum amethangle pachedam pen pacheridam lonang.

⁸ Bonta aphrang ateng aphaithot a-ita paselam nangji, isi ta pakon longri. Latum aphan dorphlup akam paklemtoitelang, laso apotsi latum a-Arnam aphan athok kepiji pusi kedamji aphan chohangkong-lo.

⁹ Lahei amonit atum aphan kam paklem-otnon lapen keklem patong-parnon, anke latum bang kechongthuitap alam karjuji apor chelongle detpo.”

¹⁰ Kam ahemphu lapen Israel atum aphuthak kam kelang atum damsi Israel atum aphan pulo, “Recho pulo nangtum aphan sokpun nangthonthelo,

¹¹ alangli pulo, nangtum methang damsi la sokpun kodakma kedo choridam nangji, bonta nangtum aphrang atengthot aphai ita selam nangji.”

¹² Lasi rat atum Ijip adang bithe damsi sokpun ridamlo.

¹³ Latum aphan sokpun kepi ahut ita kepaselamtoi atengthot aphai kepaselamjisi kam ahemphu atum latum aphan arnivang paklem bor-i-lo.

¹⁴ Kam ahemphu atum Israel aphuthak kam kelang atum aphan chok-lo. Latum hang-lo, “Kopi apotsi nangtum aphrang aphai atengthot a-ita selamle det-lo?”

¹⁵ Anke kam kelang atum recho along damsi khindelo, “Nangli kopi athesi nelitum aphuthak la keklem loma, recho?

¹⁶ Nelitum aphan sokpunta nepipe, bonta nelitum aphan ita paselamtoibom! Non nelitum aphan reng pasolo. La ke nangli rat atumsi kechokche.”

¹⁷ Recho thak-lo, “Nangtum selet-ong, lapen kam keklemji aphan ninghanghe, laso apotsi nangtum a-Hemphu aphan karkli damjisi nephan hukum chohang-lo.

¹⁸ Non kam cheklem damnon! Nangtum aphan sokpun nangthonthelo, bonta nangtum aphrang atengthot a-ita aphai selam nangji.”

¹⁹ Latum aphan aphrang atengthot a-ita aphai arnivang selam nangji pu kepu pen kam kelang atum kesung-lo pu chechinilo.

²⁰ Latum kedam ahut Moses lapen Aaron aphan chetong-lo, latum aphan inghongding-lo.

²¹ Latum Moses lapen Aaron aphan pulo, “Nangtum kopisi keklem loma Hemphu thek-long-lo, lapen la achakri atum netum aphan kepahijimtoi nangtum klemlo.”

Hemphu Aphan Moses Kepasimu

²² Puthot Hemphu anat Moses pangnosi pulo, “Hemphu, Nang kopisi Nangrat aso aphan chenek-loma? Nang kopi athesi nelitum ladak neketoi loma?

²³ Nang men aphongtin recho along keningje dam ahut, alangli latum aphan un an pasung-lo. Lapen latum aphan kerapji Nang thangnat ta klemkledet-lo!”