KEBAR 36 - BAIBEL KANGTHIR (BSI)1 Bezalel, Oholiab lapen akaprek ahemai atum an aphan Hemphu si keklemthek asai lapen akechini nangpitang-lo, nangtum pehem kangthir kekim nangji akam an lapen Hemphu hukum nangkepi ateng pen kam keklemji chinilo. Rat Atum Ongdung Adan-heihei Kevan 2 Bezalel, Oholiab lapen kedo-an ahemai Hemphu kam keklem ajakong kepi an atum lapen kam kerapdunji aning kehang atum an aphan Moses hang-lo, lapen latum aphan kam kepangchengji aphan Moses thanlo. 3 Pehem kangthir kekimji aphan Israel aso atum kevan adan-heihei an alangli pen latum enlo. Bonta adapvang Israel atum Moses along dan-heihei vanbomlang. 4 Anke kam keklem asai kethek kam keklembom amonit atum damsi Moses aphan thanpachinilo, 5 “Hemphu hukum kepi keklem nangji akam aphan akehang an sose rat atum vanbomlang.” 6 Lasi Moses mukam soding isi ahukum pilo, Pehem kangthir aphan baduta chirung-cherek van nangnelo; anke rat atum vanvedet-lo. 7 Kadokave akam kepaplengdetji aphan kevantang anta dorphlup-lo. Hemphu Kedo A-pehem Kekim ( Keba 26.1-37 ) 8 Kam keklembom atum angbong pen asai ketheknei amonit atumsi Hemphu kedo a-pehem kimlo. Latum akelu, hepi arong lapen ake-ersip a-ul ape-kanglit pak-kep pen patangdet-lo, lapen arveng kedo api arjan-heihei roidunlo. 9 Apaktinta kethe chingbarchit, keding ingrup ingkoira phli lapen arpan ingrup phli. 10 Latum pakpho roi pacheropsi ebeng selamlo, lapen akaprek pak phota lasonthotsi selamlo. 11 Latum kebeng ape angchun lutu arong ape pen avaikang apaktin alongta selamlo. 12 Kechengsi abeng ape along latum avaikang phokep selamlo lapen hini apak kejutsi aphan akung along halahei chingdenchit avaikang phokep selamlo. 13 Latum ser avek phokep selamlo, lahei pen ajok bengni ape pacherappetsi epak pinchong unlo. 14 Latum bi angmi pen keselam ape pak kre isi pen pehem kedipji aphan selamlo. 15 Latum la kadokaveta apak kethe pachingbarchit, keding ingrup ingkoira throk lapen arpan ingrup phli. 16 Latum pakpho roisi ebeng selamlo, lapen akaprek pak throk roisi ebeng selamlo. 17 Kejutsi apak akung along latum avaikang phokep selamlo lapen avaikang phokep lake abeng kaprek along selamlo. 18 Latum la bengni ape kepacheropji aphan tam avek phokep selamlo, anke lahei epaknat ape kecheplangji aphanlo. 19 Latum hini abeng selamthulo, isi abang ke biresak areng rong ke-er pilo lapen akaprek abang ke ok-reng keme pen lahei athak kebeng aden aphan enlo. 20 Pehem aphan latum mirjove athengpi pen kekengset ahop selamlo. 21 Ahoptinta ajon keding ingrup nerkep lapen arpan kethe ingrup isira echak, 22 Hini apengdang pachingbarchit lote ahop-heihei pachechulongpo. Kadokave ahopta lahei apengdang do. 23 Nitur anat aphan latum hop ingkoi selamlo, 24 lapen lahei aber keden aphan rup aden phlikep selamlo, hini apengdang kepachechuji aphan ahoptin along hini aden enlo. 25 Pehem nirep anat aphan latum hop ingkoi selamlo, 26 lapen rup aden phlikep selamlo, ahoptin along hini aden enpo. 27 Pehem anung anat nichi aphan latum hop throk selamlo, 28 lapen kechetok adim aphan hopni selamlo. 29 Lahei kechechu ahop ke aklong anat aden pen pachechulok lapen angchunta chechulok. Hopni kechechu longnita lasonsi selamlo. 30 Lasonsi hop nerkep lapen rup aden krethrok dolo, ahoptin aphan hini aden bilo. 31 Latum mirjove athengpi pen hongkrepho arpan selamlo, pehem ehin anat ahop aphan pho selamlo, 32 ahin kaprek anat aphan pho selamlo lake nichi anat kejut anung anat-lo. 33 Angbong arpan, angsong ahop ebeng an pehem ehin pen ahin kaprek anat an. 34 Latum ser pen ahop-heihei top-lo, lapen arpan-heihei pen kepacherapjisi ser arnan-heihei pen pacherap-lok-lo, arpan anta ser pensi top-lo. 35 Latum kebeng aphan pe-kanglit akelu, hepi arong lapen ake-ersip a-ul ape selamlo, lapen avengkong kedo api-heihei arjan roidunlo. 36 Kebeng ape kevekji aphan latum mirjove athengpi anujok hongphli selamlo, lapen lahei ser top dunlo, lapen lahei ser avek along pavurlok-lo. Anke nujok-heihei keparchakjisi latum rup aden phli selamlo. 37 Pehem ajakan aphan latum pe-kanglit akelu, hepi arong lapen ake-ersip a-ul ape pen kebeng ape selamlo, lapen roidunsi alon pilo. 38 Laso kebeng ape aphan latum nujok hongpho avek pen pachevek-lo, halahei athak lapen apanpo ta ser pen top-lo, lapen nujok-heihei aphan tam aklong aden pho selamlo. |
Karbi Holy Bible © Bible Society of India, 2010.
Used by permission. All rights reserved worldwide.
Bible Society of India