KEBAR 35 - BAIBEL KANGTHIR (BSI)

Kesang Arni Aron

¹ Israel arat kedo-an akhei kangthim aphan Moses hangpet-lo lapen latum aphan pulo, Hemphu nangtum aphan kepaklemji akam lahelo:

² “Nangtum kam kecheklemji aphan ni throk long-lo, bonta throksi arni abang ke ingthir-et. Hemphu ephan kepanong pame isi kesang arnilo. Badutame labangso arni kam keklem aling abangphan pathilot nangji.

³ Kesang arni nangtum ahem me anta thor-ri.”

Kangthir A-Pehem Aphan Adan-heihei

⁴ Israel arat kedo-an aphan Moses pulo, “Hemphu hukum ekepi lahelo:

⁵ Hemphu aphan isi adan pinon. Abangphutin kepiji atum an ser, rup, mate tam;

⁶ pe kanglit; akelu, hepi arong lapen ake-ersip a-ul arong; bi angmi pen keselam ape;

⁷ biresak aloso areng kepakrengtang pa-ersip; ok-reng keme; mirjove athengpi;

⁸ melur aphan jangthu; kepatip ajangthu lapen kedokjin angnim amethek aphan mosola-heihei;

⁹ Karneli lapen kaprek abor arlong-heihei kurusar achoi ajahep along kepabonji aphan lapen ning aden along pe kepabonji aphan dan pinangji.”

Hemphu Kedo A-pehem Amar Heihei

¹⁰ Ansi kethek amonit atum an vang pen Hemphu hukum kepitang ateng pen asontin klemnangpo:

¹¹ Pehem, la kedip ape lapen athak kedip ape, la avek-heihei lapen la ahop-heihei, la akaibong, la anujok-heihei, lapen la aden-heihei;

¹² Kechejok a-Sinduk, la abarlon, la adip, lapen la kebengji aphan kebeng ape;

¹³ tebul, la abarlon lapen la ajohton-heihei an; Arnam aphan kepi ahim;

¹⁴ kepathe-ang aphan melur archok, lapen la ajohton; melur-heihei lapen halahei ajangthu;

¹⁵ methek kethorji aphan dovan lapen la abarlon-heihei; kepatip ajangthu; kedokjok angnim amethek; pehem kelut anghap akebeng ape;

¹⁶ dan-heihei kephrin adovan lapen la tam apaivokak, la abarlon-heihei lapen la kedo-an ajohton-heihei; kecharsam aphumang lapen la aklong aden;

¹⁷ tikup kebeng ape, la anujok-heihei lapen aden-heihei; tikup amangho kebeng ape;

¹⁸ kurdang lapen pehem aphan arri lapen tikup aphanta;

¹⁹ lapen kelangmeme kurusar ape-ari latum kangthir adim kurusar akam kangduk ahut kechingthang nangji kangthir ape kurusar Aaron aphan lapen asopo atum aphan.

Rat Atum Dan-heihei Kevan

²⁰ Israel aso an o-et-lo,

²¹ lapen keklemji aning kehang abangphutin Hemphu kedo a-pehem keselamji aphan Hemphu along adan-heihei chevanlo. Karchoji aphan ke-en amar an lapen kurusar atum ape-ari aphan dorphlup asontin latum vanlo.

²² Kadokave aningkehang aling, pinso arlo alon kedo ingprim-heihei, jangsai-heihei, arnan-heihei, lek-heihei lapen ason ason ser adorson lahei Hemphu aphansi hodailo.

²³ Kedo abang aling abangphutin pe kanglit pelu, hepi arong ake-ersip, a-ul; bi angmi ape; biresak aso areng arong kepi pa-ersip; mate ok-reng keme la kedo-an an vanlo.

²⁴ Rup mate tam amar kepi-un atum an Hemphu aphan halatum adan-heihei chevanlo, lapen mirjove athengpi kedo atum ajat jat akam aphan enme apotsi lata vanlo.

²⁵ Asai kethek asarpimar atum an honkanglit lapen akelu, hepi arong lapen ke-ersip a-ul ahon vanlo, lahei latumsi selamlo.

²⁶ Latum bi angmi ahonta selamlo.

²⁷ Jalin atum karnelia lapen akaprek abor arlong choi ajehep along kebidunji aphan lapen ning aden aphan vanlo,

²⁸ Mosola-heihei lapen melur aphan jangthu, kepatip aphan ajangthu, lapen kedokjin angnim amethek aphan vanpilo.

²⁹ Israel arat kedo-an atum Moses aphan Hemphu hukum pisi kepaklemtoi an akam aphan dan Hemphu aphan kepiji pu aning kehang an atum dan-heihei vanlo.

Hemphu Kedo A-pehem Aphan Asai Kethek Ahemai

³⁰ Israel atum aphan Moses pulo, “Uri asopo lapen Hur asupo, Bezalel aphan Hemphu ingvaitang-lo, la Judah akhei penlo.

³¹ La aphan Arnam ajakong paplengset-lo, alon kepi pen keklem thekji aphan asai, abidi kechini ajakong alangliphan pilo,

³² Keklemji akam asai arjan-heihei lapen lahei ser akam, rup lapen tam akam;

³³ bor arlong kesoi pen kethon; thengpi kehong; lapen ajat ajat akaprek asai akam an keklemji aphan.

³⁴ La along kam pacherapdunji aphan Dan akhei pen Ahisamakh asopo Oholiab aphanta Hemphu si akaprek aphan ri-asai akam kethanji ajakong pilo.

³⁵ Alang latum aphan kedo-an akam asai, kehong atum, arjan keselam atum, lapen pe-kanglit akelu, hepi arong, lapen ake-ersip a-ul kethak atum; lapen akaprek ape akam keklem atum pen kepaplang nangji asai an Alang pilo. Latum ajat akamta klemthek-lo, lapen asai kethek a-arjan ketok atumlo.”