KEBAR 3 - BAIBEL KANGTHIR (BSI)

Moses Aphan Arnam Kehang

¹ Arnisi Moses ahupo, Jethro, alangli ke Midian akurusar abi lapen abiresak kelangbom ahut alangli kejejangtang ajo soding japonbomsi Sinai, kangthir Anglongpi along nanglelo.

² Hadak Hemphu apherangke alangliphan isi bap angbong pen me akar kevang ason cheklang-lo. Bap angplum ajo me ade Moses thek-long-lo bonta la sek-hak-he det-lo.

³ “Lake manghumemelo,” alangli aning mathalo. “Kopi apotsi bap me kechoche-det-loma? Ne adung an damsi lang-damjilang.”

⁴ Moses aphan Hemphu adung kevangbom thek-longsi, bap angbong pen laphan alangli hang-lo lapen pulo, “Moses, Moses!” Alangli thak-lo, “Kopilo, ne ladaksi do.”

⁵ Arnam pulo, “Adung nangpatebok-bom rinon. Nang keng-op chephloknon, pima nang kangthir-et adimsi karjap-lo.

⁶ Ne ke nangphusar atum a-Arnamlo, atheke Abraham, Isaak, lapen Jakob a-Arnam.” Lasi Moses amahang chedipthip-lo, pima alangli Arnam aphan kelangji pherelo.

⁷ Anke Hemphu pulo, “Ijip along Nerat aso aphan kechenek-ot Ne thek-long-lo; halatum aphan kam kelang atum pen kejokji aphan latum kehang ase Ne arjulong-lo. Latum kesung kechechaknang ko-an loma Ne chinilo,

⁸ lapen latum aphan Ijip aso atum pen kepajokjisi Ne nanghirlo, lapen latum aphan Ijip pen vansi ha ajam kethe adim, kedorphlup lapen aho-or kedo adim, atheke Kanaan atum, Hitti atum, Amor atum, Perizi atum, Hivi atum, lapen non Jebusi atum kedo adim vanpo.

⁹ Nerat aso atum kehangvek ase Ne arjulong-lo, lapen Ijip atum kosonsi latum aphan kechenekma Ne thek-long-lo.

¹⁰ Non Ne nangphan Ijip arecho along nangtoilo anke la adet pen Nerat aso atum aphan nang ja ponpo.”

¹¹ Bonta Arnam aphan Moses pulo, “Ne ke thangnat ta kali. Kopusonsi ne recho along kedampo, lapen Ijip pen Israel atum aphan kevan thekpoma?”

¹² Arnam thak-lo, “Ne nanglong nangdodunpo, lapen rat atum aphan nang Ijip pen kevan ahut, nangtum laso anglongpi alongsi Nephan archopo. Lahelo Ne nangphan nangketoilo pu apormanlo.”

¹³ Bonta Moses thak-lo, “Ne Israel aso atum along damsi kepu dam ahut, ‘Nangphusar atum a-Arnam si nephan nangtum along nang ketoilo,’ latum neliphan arjupo, ‘Alangli men kopilo?’ La pu lote ne kopisi latum aphan kethakpoma?”

¹⁴ Arnam pulo, “Ne helo Ne lo. Lasonsi nang latum aphan thannangji: Ne helo pu kepu abangsi nephan nangtum along nangketoilo.”

¹⁵ Israel atum aphan thannon, Ne, Hemphu, halatum aphusar atum a-Arnam, Abraham, Isaak lapen Jakob a-Arnam si nangphan halatum along nangketoilo. La helo kaike aphan Nemenlo; lasonsi Nephan aphi a-ove ove anta Nehangpo.

¹⁶ Damra Israel ajalin kedo-an aphan pangrumnon, Ne, Hemphu, nangphusar atum a-Arnam atheke Abraham, Isaak lapen Jakob atum a-Arnam si nangphan nangcheklangpo pu latum aphan thannon. Ne latum along vang-lo, latum aphan Ijip aso atum keklem thek long-lo pule thannon.

¹⁷ Ne latum aphan Ijip adet pen kepondetji aphan chesik-et-lo, hadak latum aphan chenek-o-lo lapen latum aphan isi kedorphlup lapen aho-or kedo alongle, atheke Kanaan atum, Hitti atum, Amor atum, Perizi atum, Hivi atum lapen Jebusi atum alongle.

¹⁸ “Ne rat aso atum nang halatum aphan kopisi kepujima arjupo. Anke nang Israel ajalin atum penpen Ijip arecho along damnon lapen alangliphan punon, ‘Hemphu, Ibri atum a-Arnam, neliphan nangcheklang-lo. Non lasi nelitum aphan Hemphu nelitum a-Arnam aphan kethok kepajirjile nithom kejejangtang ajo neli padam longnon.’

¹⁹ Ne chini, Ijip arecho aphan paklem bor-i pulote la nangtum aphan padam longle detji.

²⁰ Bonta Ne Nejakong chepaklangpo lapen hadak pherememe akam keklem pen ajok Ijip aphan adukpipo. Laso aphi la nangtum aphan padam longpo.”

²¹ “Ijip aso atum nangtum aphan Ne men nang papitoiji, athema Ne rat atum ke-o ahut, latum ari angse pen damdedetpo.

²² Abangphutin Israel a-arloso atum adung kedo Ijip ahem lapen badu a-Ijip a-arloso kedo ahem along dampo lapen pe-ri, ser-rup adorson hangpo. Israel aso atum lahei asopomar lapen asopimar atum aphan pachingthangpo lapen Ijip aso atum akhi ponrapdetpo.”