Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

KEBAR 29 - BAIBEL KANGTHIR (BSI)


Aaron Asomar Atum Aphan Kurusar Akam Kebatji Aphan Kepinkhat
( Levi 8.1-36 )

1 Nekam along Aaron lapen asomar atum kurusar keklemjile latum aphan kehodaijile la nang klem nangpo. Chainong aloso ejon lapen kemenei biresak aloso jonni ponnon.

2 Thap kave ahim akemenei, ajehak ahim jit ajangthu pen selamnon lapen ajehak ke jangthu avepin pen selamnon, lapen ajehak ke him aplang jangthu pen pajum pamenon.

3 Lahei ton arlo thap-ra, nang chainong alo ejon lapen biresak alo jonni nephan nekethok ahut lahei ta dan nepinon.

4 Ne kedo a-pehem ajakan along Aaron lapen asomar atum vannon, lapen latum aron alang pachinglu non.

5 Kurusar ape-ari penle Aaron aphan ape-achoi pindeng non, choi ajahep aber keche-um ape, ajahep, aning aden lapen vamkok-hihita.

6 Alangli phu poho phungnon lapen la athak kangthir angthek ketoktang “Hemphu aphan hodaitang-lo pu”, kok-hetnon.

7 Anke kepatip ajangthu ennon, la alangli phuthak dungnon, lapen la aphan patipnon.

8 Asomar atum aphan vannon, lapen latum aphan choi pangchoi non;

9 latum avam soding achephan kok-ra phutup kupnon. Lasonsi nang Aaron lapen asomar atum aphan kam batnon. Latum lapen latum aso-asu atumsi nephan kurusar kaiketa ingduk verpo.

10 Ne kedo a-pehem athengno along chainong alo vannon lapen la aphu along Aaron lapen asomar atum ari bat nangji.

11 Hadak ne kedo a-pehem ajakan along-le chainong alo pathinon.

12 Chainong avi ajehak enra la dovan anu athak nangri pen hinon. Lapen ahin avi anke dovan akeng-ri dung nangji.

13 Adunthu, aphek-angthin an kedip athu, angthin kang-ar akemenei, ahambi lapen la along kechebon athu an enra, lahei nephan isi athok kepijile dovan athak pinon.

14 Bonta chainong a-ok kangthim, la arengta, lapen la aphek-heihei ta mukam angtanle phidetnon. Laso athok ke kurusar atum apap-heihei kechamji aphanlo.

15 Ejon abiresak alo enra lapen la aphu along Aaron lapen la asomar atum ari kebatjile thannon.

16 La pathinon, lapen la avi enra dovan aleptin anat dung phaknon.

17 Biresak a-ok ingthan-i non; la aphek-angthin-heihei cham-et non, aphi akengta chamnon, lapen lahei aphu athak lapen akaprek a-ok athan athak batnon.

18 Biresak kangthim dovan athak phrinnon, la isi kecho adanlo. La kedokjin angnim nephan ning pangsamlo.

19 ‘Ajon kaprek abiresak alo en-non kehodaiji aphan ke-en abiresak lapen la aphu along Aaron lapen asomar atum ari kebatjile thannon.

20 La pathinon, lapen la ajehak avi ennon, lapen la Aaron lapen asomar atum ano lapen anokan ar-e athak, halatum ari ar-e achimunpo athak, lapen ar-e akengmunpo athak hi nangji. Ahin avi anke dovan akung soding dungnon.

21 Dovan along kedo ajehak avi lapen ajehak kepatip ajangthu enra Aaron lapen achoi athak lapen asomar atum achoi athak la arsinon. Alangli lapen alangli somar atum, lapen halatum ape-ari anke Nephan Nehodaidetnon.’

22 Biresak athu an lir-etnon, athu kedo arme, athu kedo aphek-angthin, angthin kang-ar akemenei, athu kedo ahambi hini, lapen ar-e akengtham thakdaknon.

23 “Nephan nekepi ahim aton pen ajattin ahim ennon; jit ajangthu pen keselam ahim eplang, lapen jangthu kavepin ahim eplang, lapen kangtang ahim eplang.

24 Lahei ahim an Aaron lapen la asomar atum arideng pinon, lapen kepanong adan ason Nephan Nekehodaijile thannon.

25 Anke halahei angbong pen la ponra dovan athak phinon, kephrin athok athak la Nephan isi kechome athok-lo. Laso athok angnim kedok Nephan ningpangsamlo.”

26 Laso abiresak alo aningthang ponra Nephan isi kepanong adan ason la Ne hodai non. Laso pi a-ok abahak ke nangtum apharmanlo.

27 Inut akurusar aphan kam kebat ahut, aningthang lapen biresak aloso akengtham kam kebat ke-enjile Nephan kepanong adan asonle nehodainon, lapen kurusar atum aphan bi pivetnon.

28 Lake Ne kelarlepin akephar lo, Ne rat aso atum kejelang athok kepi ahut pi aningthang lapen akengtham ke kurusar atum apharmanlo. Lake rat atum Ne Hemphu aphan Nekepi adanlo.

29 Aaron kurusar ape-ari-heihei ke la thilot aphi asomar atum aphan pinangpo, latum aphan akam bat lote latum kepachingchoiji aphanlo.

30 Aaron asopo la alar kurusar kedengdun abang lapen kangthir adim kangdukjisi Ne kedo a-pehem arlo nangkelut ahut laso ape-heihei ni throksi chingthang nangji.

31 Aaron lapen la asopomar atum aphan kam kebatji a-ok en ponra kangthir adim updetnon.

32 Ne kedo a-pehem ajakan along la ton along kedo ahin ahim penpen chonangji.

33 Kopi-si halatum kam kebat ahut lapen kediya aron kerim ahut latum cho nangji, laso anam kurusarsi chochot nangji, pima la ingthir-et.

34 Jongsi ajehak a-ok mate ahim adap angbong cho-et-e pulote la me phrin-et nangji; la cho nangnelo, pima la ingthir-et.

35 Aaron lapen asomar atum aphan ni throksi kam kebat aron akam klemnon ne nangphan hukum nangkepi ateng.

36 Arnivang ta athok aphan nang chainong alo ejon pivek nangji, ansi halaso apap diyalongpo. La pen ajok dovan ingthirpo. Anke la kangthirji aphan jit ajangthu la patipnon.

37 La arnivang ni throksi an klemnon. Anke dovan ingthir pamepo, lapen badutame mate la kepapho abang aling la kangthir-et ajakong pen ajok phangnopo.


Arnivang Athok Heihei
( Kela 28.1-8 )

38 Arni vangta lapen kevangji arni anta, dovan athak karkli ningkan isi arta abiresak aso jonni pinangji.

39 Adap ejon abiresak aso arklinon, lapen ajon kaprek arni kangsam apor arklinon.

40 Aphrangsi ajon along elin ahim aduk kemenei pen elin aju-kavepin jit ajangthu pen pangvuinon. Isi athok ason elin adrakha horlang dungnon.

41 Arni kangsam apor ajon kaprek abiresak arklinon, lapen isinat ateng ahim aduk, ajit ajangthu, lapen adrakha ahorlang adap ason dan pinon. Lake Ne, Hemphu aphan an athok-lo, lapen la angnim nephan ningpadok-lo.

42 Kevangji arni anta, laso kephrin athok Ne kedo a-pehem ajakan along Ne kedo alongsi pajir nangji. Hadaksi Ne rat atum aphan chetongji lapen nangphan ningjepo.

43 Hadaksi Ne Israel arat aphan Ne chetongji lapen keturbong Ne kedo akethe-angsi dim pangthirpo.

44 Pehem lapen dovan Ne pangthirpo, Aaron lapen la asomar atum nephan kurusar kangdukjisi paprekdakpo.

45 Ne Israel arat angbong dopo lapen neke halatum a-Arnam plangpo.

46 Ne helo Hemphu, halatum a-Arnam, latum aphan Ijip pen kevan abang-lo pu latum chinipo, anke Ne latum angbong dodun-unpo. Ne helo Hemphu, halatum a-Arnamlo.

Karbi Holy Bible © Bible Society of India, 2010.

Used by permission. All rights reserved worldwide.

Bible Society of India
ကြှနျုပျတို့နောကျလိုကျပါ:



ကြော်ငြာတွေ