KEBAR 22 - BAIBEL KANGTHIR (BSI)

Adai Ketu Aron-heihei

¹ Inut abangpo jongsi chainong mate biresak ejon chonghudet lapen la kejorji aphan pathilot-lote, ejon achainong alar jonpho achainong lapen ejon abiresak alar jonphli abiresak pinangji.

² Kechonghubom ahut thek dunlong lok-lo, lapen la aphan thengbop-lote la alar avi bu nangnelo.

³ Bonta anerlo ahut si pathirong pulote pran karmut adaido. Alangli kenangji an adai tu nangji. Alangli jongsi thangnatta avedet pulote, kanghu apot ban donangkokpo.

⁴ Kanghu abangphu ahem jongsi chainong alo mate gadha mate biresak akereng long-lok-lo pulote la phanni chetu nangji.

⁵ Jongsi mane amonit api hidi mate drakha aberi arlo pachopanlo, lapen lahei damsi anut kaprek aberi asok chopi et-lote, alangli methang ahidi mate adrakha aberi pen sok kekon an chetu nangji.

⁶ Inut amonit ahidi me keilo, lapen la bap choteran si akaprek ahidi me rap-loksi sok me cholap-lo mate kerot tang anta, me kekeicheng abang si kekon anta chetu nangpo.

⁷ Inut abang jongsi anut kaprek atangka kepiji aphan chechak lote, mate ador keso amar chechak-lo, bonta alangli hem pen bang inghudet lo, alangli jongsi halaso akanghu abangphan nep-longchek lote la kanghu abang phanni chepi nangji.

⁸ Bonta jongsi kanghu abangphan nep-longledet-lo pulote, ador keso amar kebi abangphan karcho adim vandet nangji, lapen hadak alangli bang kaprek amar chonghu pu semetang nangji.

⁹ Khi aputhak chekurmar alam an, la chainong tame, gadha, abiresak, ape-ri mate ajat kekon an amar alam tame, nekhilo pu kechekrong banghini amonit aphan karcho adim vandet nangji. Banghini angbong komat aphansi Arnam adai dolo pu kepu abangphan, la anut kaprek aphan phanni chetu nangji.

¹⁰ Inut amonit jongsi anut kaprek agadha, achainong api, abiresak mate amethang aphan akaprek api kebiji aninghang-lo, lapen api thilot-lo, mate arengsodak-lo, mate bang kaprek atum ponpidet lo, lapen baduta ahaki chodun abang ave pulote,

¹¹ laso amonit karcho adim dam nangji lapen la anut kaprek api chonghuhe pu semetang nangji, lapen anut kaprek abang alangphan adai tu nangnelo;

¹² bonta jongsi pi inghu pondet-lote, la ahemphu aphan chetu nangji.

¹³ La jongsi nampi api pathilot-lote, aporman bangso abang van nangji; nampi api kepathi apot alangli la adai tu nangnelo.

¹⁴ Inut amonit jongsi anut kaprek pen pi chorong-lo lapen ahemphu abang kave ahut la arengsodak mate thilot-lote, bangso amonit la chetu nangji.

¹⁵ Bonta la ahemphu angnosi cheplang-lo pulote, bangso amonit la anam pi nangnelo. La jongsi kerong amar pulote, kekon an apot kerong anam pi nangpo.

Kedo-Kethak Lapen Dhorom Aron Heihei

¹⁶ Inut amonit jongsi kerairelang inut a-okarjang aphan langremlo pulote kepangri anam la tu nangpo lapen bangpi aphan en-nangpo.

¹⁷ Bonta la aphan bangpi apo pa-en longle pulote, inut okarjang kepangri anam ateng osopi apo aphan tangka pinangji.

¹⁸ Mekbin akam keklem badu a-arloso aphan setame pathilot nangji.

¹⁹ Marat api pen kehingno akam kechoklem abangpo aphan pathilot nangji.

²⁰ Ne, Hemphu pen apar akaprek a-arnam aphan karkli abangphu aphan pathitoi nangji.

²¹ Bang adet aso aphan langrop mate chenek-ri; chematha non nangtum Ijip adet along bang-adet aso plang-lo.

²² Hemepi lapen jangreng atum aphan langrem-ri.

²³ Jongsi nangtum klemlote, Ne, Hemphu-si latum Nephan kerap kechohang ahut Ne latum aphan thakji,

²⁴ lapen Nening thisi nangtum aphan ron along pathipo. Nangpiso atum pahemepo, lapen nangsomar atum pajangrepo.

²⁵ Ne rat atum angbong keduk atum aphan jongsi nangtum tangka paramlo pulote abat ke-enra tangka keparam atum ason cheplangri lapen abat enri.

²⁶ Nangtum jongsi mane abang ape-ri bondok ason endunlote la nang arni chelut-le ako voivek nangji,

²⁷ pima la kechepar-om aphan pe la-anchot-lo. La kopi pensi amek kejang-i-po? La Ne pen kerap kelongji aphan Nehang lote, Ne la bangso aphan thakji, pima Ne ingjinsolo.

²⁸ Arnam aphan kehingno ningjeri lapen nangtum arat kejalin abangphan hirjuno hangri.

²⁹ Nangtum asok, adrakha ahorlang lapen jit ajangthu pathelote Nephan athok-heihei Nepinon. Nang-sokleng pinso Nephan Nepinon.

³⁰ Nang chainong lapen biresak kephicheng aso Nephan Nepinon. Sopinso akleng ni throksi apei along padonang lapen nerkep arni la Nephan Nehodai nangpo.

³¹ Nangtum ke Ne rat asolo, la apotsi nampi api kepathi api an ke nangtum cho nangnelo; la methan atum aphanle pidetnon.