KEBAR 11 - BAIBEL KANGTHIR (BSI)

Sokleng Kethiji Alam Moses Kepachethang

¹ Anke Moses aphan Hemphu pulo, “Ijip arecho lapen arat aso aphuthak Ne puthot isi aduk pijilang. Laso aphisi alangli nangtum aphan nang padamlongpo. Chenamsi alangli nangtum kadokave aphan ladak pen nang phlung-etpo.

² Non Israel atum aphan ningjenon, lapen kadokaveta adung-arei atum pen kechingthang adorson ser lapen rup kepachehangjile thannon.”

³ Israel aphuthak Hemphu si Ijip asor man papilo. Chenamsi chakri atum lapen rat atum anta Moses ke inut arleng kethe amonit-lo pu si mathalo.

⁴ Anke Moses abang recho aphan pulo, “Hemphu pulo, ‘Ajo jirlo apor Ijip adang soding Ne damji,

⁵ lapen adontin sokleng thipo, recho kechoji abang, recho asopo pen cheng-lok, banpi sang aduk kekoi abangpi asopo an. Pi kechingthokcheng asota thipo.

⁶ Ijip adang bithe kechiru-charnap doji, lason aphrang penta ave pinlang mate mononphi seta avedetji.

⁷ Bonta Israel atum aphan mate api atum aphan methan ejonnatta ing-uk-edetji. Anke nangtum Ne, Hemphu si Ijip asor pen Israel aso angbong paprek-lo pu chinipo.’ ”

⁸ Moses ethe alam pusi pajut-lo, “Alangli achakri atum an nelilong vangsi ne-ardompo lapen ne rat atum aphan kepapondetjisi ne choningripo. Laso aphi, neli ta opo.” Anke Moses aning thihaksi recho aphan obub-lo.

⁹ Moses aphan Hemphu putang-lo, “Recho abang nangphan nang arjuje bompo, lake Ijip along manghumeme akam ne keklem-oji aphanlo.”

¹⁰ Recho angno Moses lapen Aaron lahei manghumeme akam klemlo, bonta Hemphu la aphan aning pangtangrak-lo, lapen Israel atum aphan alang det pa-o longle det-lo.