KEBAR 1 - BAIBEL KANGTHIR (BSI)

Ijip Along Israel Aso Aphan Kechenek

¹ Jakob asomar atum, lapen alanglilong ha Ijip adet kedun atum,

² Ahemtuntin lahelo, Reuben, Simeon, Levi, Judah,

³ Issakar, Zebulun, Benjamin,

⁴ Dan, Naphtali, Gad, lapen Asher.

⁵ Lahei arat Jakob apok-et aso-asu atumlo, pangrumpet aphai bang throksi kep. Alangli sopo Joseph ke Ijip alongsi dobomlang.

⁶ Ahut nanglesi Joseph lapen alangli korte atum, lapen halabangso a-ove kedo-an atum thi-et-lo,

⁷ bonta halatum apoton atum, lake Israel aso atum ongdung asomar dolo, lapen lapu-an ke-ong-lo, lapen ingtang-lo, Ijip ke latum pensi plengset-lo.

⁸ Anke inut akemi arecho, Joseph aphan kechinine abang Ijip along jakong nang long-lo.

⁹ La arat aso aphan pulo, “Lahei Israel aso atum lapu-an ke-ong-lo lapen ingtang-lo, latum etum aphan isi akepherememe nang plangtang-lo.

¹⁰ Etum pen kechedanjisi latum ron ahut hotur atum pen chelangpet tahai, lapen det pen latum chepajokphlot tahai. Latum ke-ongdung pen kekhangji aphan eli pine atovar ri-masilo.”

¹¹ Latum halatum aphan kam kepaklempik pen ajok aning keparunhup aphan latum aphuthak Ijip asor kam kelang atum bat-lo. Israel aso atum recho aphan hormu kebi arongsopi kim pilo.

¹² Bonta Israel aso aphan Ijip atum chenek-ong latum aphai nang kam-ong, lapen latum det adang bithe dothip-ong. Israel aso aphan Ijip aso atum pherelo,

¹³ lapen latum aphan sedengkot akam kepaklem bor-i aban pinchongsi latum akai ningpadonojinlo.

¹⁴ Halatum ahemthepi akam-heihei along lapen ahidi along latum aphan kam paklem toilo, lapen latum aphuthak latum akangjinso ave.

¹⁵ Ibri arlosopimar atum aphan osomahang kepathek ahut Shiphrah lapen Puah aphan Ijip arecho pulo.

¹⁶ “Ibri asarpimar atum oso amahang-pathek aphan nangtum kerapdun ahut,” latum aphan alangli pulo, “La jongsi pinso a-oso pulote pathilotnon; bonta la jongsi arloso a-oso pulote parengnon.”

¹⁷ Bonta oso mahang-kethek kerap asarpimar atum Arnam aphan pherelo lapen recho alam kroikredet-lo; bonta latum pinso a-oso aphan pareng-long-lo.

¹⁸ Lasi recho abang oso mahang-kethek kerapdun asarpimar atum aphan hang-lo lapen arjulo, “Nangtum la kopisi keklemloma? Kopisi nangtum pinso a-oso aphan pareng-long-toiloma?” kedo-an aphan isi ahukum pilo, “Ibri asopinso mahang kethekmi an ponra Nil Aroi varchuinon, bonta so-arlo an parengnang.”

¹⁹ Latum thak-lo, “Ibri a-arloso atum ke Ijip a-arloso atum ason kali; latum aso mahang kepathek pajoipik, lapen latum a-osomar atum hadak netum lele aphrang mahang thekphlot titi.”

²⁰ Pima oso mahang-kethek kerapdun a-arloso atum Arnam aphan pherelo,

²¹ latum aphan alangli mesen, lapen halatum amethang ahemtun-heihei pilo. Lapen Israel atum chanbomlo, lapen ingtangrak bomlo.

²² Kepadusi, arat aso kedo-an aphan recho isi ahukum pilo, “Ibri aso pinso mahang kethekmi an ponra Nil aroi varchuinon, bonta so arlo an pareng-long-nang.”