JOSHUA 9 - BAIBEL KANGTHIR (BSI)

Joshua aphan Gibeon Atum Kepachorei

¹ Israel atum kehai alam nichi a-Jordan anglong, inglong-heihei akeng-ri Mediterran atalo athoi aklam lapen ha Lebanon anirep lahei ke Hitti arecho, Amor arecho, Kanaan arecho, Perizzi arecho. Hivi arecho lapen Jebusi arecho anta chinipet-lo.

² Halatum chingrumpet ajakong pen Joshua lapen Israel aso abe thursi ron kechedanjisi vangpet-lo.

³ Bonta Jeriko lapen Ai aphuthak Joshua keklem alam Gibeon arat lake Hivi atum arjulong-lo,

⁴ ansi latum la aphan pachobeijisi chesik-lo. Halatum damsi ajehak kecho amar lapen halatum agadha-heihei athak thoila-kerak lapen ok-reng aban abong-heihei arthang-lo.

⁵ Halatum pe-kerak lapen kengden kevak-heiheisi chingthang-lo. Halatum akekrengtai lapen abeng-achet ahimsi dochot-lo, halatum Gilgal amukam along damsi Joshua lapen Israel aso aphan pulo, “Nelitum heloving adet pensi kevang. Nelitum nelining kehangke nelitum pen kechejok aloh chetok asonte meparji.”

⁶ Latum Joshua along Gilgal amukam an damsi, alangliphan lapen Israel arat aphan pulo, “Nelitum heloving adet pensi vang-lo, la apotsi non nelitum pen kechepameji aphan klemtha.”

⁷ Bonta Israel atum pulo, “Nanglitum kopisi nelitum pen kechejok aloh keche-tok nangpo, nanglitum adunghetsi kedo atum mene ke.”

⁸ Halatum thak-lo, “Nelitum ke nanglitum akamsi klempo.” Joshua halatum aphan pulo, “Nanglitum komat-lo? Nanglitum konat pensi kevang-lo?”

⁹ Anke latum laso atomo thanlo: “Akehai, nelitum heloving adim pensi kevang-lo, pima nelitum Hemphu, nang-litum a-Arnam keklem alam arjulong-lo. Alangli Ijip adet along keklem asontin arjulong-lo.

¹⁰ Lapen Jordan anihang anat Amor arecho banghini Heshbon arecho Shihon lapen Bashan arecho Og Ashtaroth along kedo atum aphan kopusonsi Alangli klemloma lata arjulong-lo.

¹¹ Nelitum ajalin lapen kedo-an nelitum adet arat atum aphan ajehak kecho ahormu pon pen latum isi arsikkrung aseme chechaktang-lo. Laso aphuthak kedo-an arat atum, keja atum aphan khindelo.

¹² Netum ahim nanglangtha. Nanglitum aphan nangkechetongjisi tovar nangkebar ahut ke lahei ar-omluk-lang. Bonta langtha! Non krenghek-lo lapen amusi vang-et-lo.

¹³ Lahei ahorlang abong nelitum kethai ahut ke mirak-lang, bonta langtha! Lahei nonke ingrak-i-lo. Nelitum ape-ari lapen kengdenta tovar ajak keding pen ajok rak-i-a-lo.”

¹⁴ Israel amonit atum halatum a-anbor lang-lo, bonta laso alam aputhak Hemphu aphan arjudam de-lo.

¹⁵ Gibeon arat pen Joshua jirpo ason chepame alam deng-lo, lapen halatum aphan padolong-lo. Israel akhei ajalin atum jirpo chepame alamchak chechak pamelo.

¹⁶ Chepame aloh kechetok nithom damdet aphi, Israel aso atum chinilo je lahei amonit atum ke adung-arei atumchot.

¹⁷ Lasi Israel arat aso atum barsi nithom aphi lahei amonit atum kedo arongsopi-heihei lake Gibeon, Chephirah, Beeroth, lapen Kiriath Jerim along nanglelo.

¹⁸ Bonta Israel atum latum aphan pathi un-e-det-lo, athema Israel a-Arnam Hemphu amen pen khei ajalin atum halatum aphan seme tangpidet-lo. Laso alam apot rat atum jalin atum aphan pujolo.

¹⁹ Bonta halatum thak-lo, “Israel a-arnam Hemphu amen pen netum halatum aphan isi arsikkrung aseme tangdet-lo. Non etum latum aphan phangno un-elo.

²⁰ Netum chechakdet-lo apotsi latum padolonang; kalite Arnamsi ephan aduk epipo.

²¹ Halatum padolongnang bonta etum aphan latum theng lapen lang eparipilonang.” Lasonsi keja atum parelo.

²² Gibeon arat la Joshua along kepavangjisi la hukum pilo, lapen halatum aphan arjulo, “Kopi athesi nangtum netum aphan nepachobeiloma, nangtum dak adunghetsi kedota heloving pensi kevang pu kepu athe kopi?

²³ Nangtum la keklem apotsi Arnam nangtum aphan khindelo. Nangtum arat aso an ban kaike padovernang. Theng ke-en lapen lang Arnam kangthir ahem aphan kaike paroiver lonang.”

²⁴ Halatum thak-lo, “Nelitum la klemlo, akehai, nanglitum dambomsi kedo-an det kangthim nangkepiji lapen la kedo-an arat aphan kepathi-etjisi nanglitum a-Arnam Hemphu aban Moses aphan hukum pitang-lo pusi la ahok alam chinilo. Nelitum la klemlo, pima nelitum nanglitum aphan pherelo; nelitum nelimethang achethe aphansi pherelo.

²⁵ Non nelitum nanglitum ajakong abersi dolo; nanglitum nanglining kehang kematha kekeng alingle nelitum aphan klemnon.”

²⁶ Lasi lahei helo Joshua keklem: La halatum aphan railo, lapen latum aphan Israel atum pathitoitedet-lo.

²⁷ Bonta halaso ahut pensi halatum aphan Joshua ban pinchong-lo. Theng ke-en lapen langkeroi-heihei akam Israel arat lapen Hemphu adovan aphan paklemlo. Pini arni anta latum Hemphu keparchoji kangvaitang adim along laso akam latum klemnangbomlo.