JOSHUA 7 - BAIBEL KANGTHIR (BSI)

Achan Apap

¹ Israel atum aphan Hemphu hukum kepi kepavir nangji amar an Jeriko pen thangnatta ponpedet nangji ason kroipet thekthedet-lo. Inut amonit Achan pu amen laso ahukum kroikredet-lo, lapen Israel atum aphuthak Hemphu aning thipik-lo. (Achan ke Karmi asopo lapen Zabdi asupo, lapen Zerah aro, isi Judah akhei angbong-lo.)

² Joshua ajehak amonit Jeriko pen Ai, Bethel anihang arongsopi, la Bethaven adung, anat hukum pisi longle palangtoilo. Halatum langdetsi

³ Joshua aphan kelong alam thanlo, “Anut tin Ai ketengkheng along kedunpetji akam ave. Muthe bang surihini mate bang suri kethom amonit toichot non. Kechedanji aphan kedo-an ron-armu toi-et nangne; la thedung arongsopi kali.”

⁴ Lasi bang suri kethom a-Israel atum tengkheng-lo, bonta latum aphi nangchirui nangkok-lo.

⁵ Ai amonit atum rongsopi anghap pen latum aphan ajehak a-arlong ajo an kehelo nangphlung dunlo lapen bang 36 anbak latum aphan pathilo ha inglong kehir ahut. Anke Israel atum latum aning ajakong ingbodet-lo, lapen pherelo.

⁶ Aningduksi Joshua lapen Israel ajalin atum ape chingsek-lo lapen Hemphu Kechejok Aloh Asinduk angno latum domkhrup-lo, lapen hadak arnikangsam apor an tilailo, latum aning ke-oi angthek chepaklangjisi latum aphu athak longle aduk chetailo.

⁷ Lapen Joshua pulo, “Ningkehang aling Keklem a-Hemphu! Kopi athesi Nang netum aphan Jordan parai nekevanloma? Netum aphan kehodaiji puma? Netum aphan kepavirji puma? Kopisi netum ha Jordan parai kaprek donangnedet loma?

⁸ Ne kopisi kepupo, O Hemphu, non Israel atum hotur pen aphi chirui nang-lo?

⁹ Kanaan atum lapen det along kedo abangphutin laso alam arjulongpo. Halatum netum aphan komchensi abangphutin aphan pathi-etpo! Lapen Nangman kechekhangji aphan Nang kopi klempo?”

¹⁰ Joshua aphan Hemphu pulo, “Thurnon! Non nang kopisi longle athak ketilai nangji?

¹¹ Israel atum pap klemtang-lo! Ne kepi ahukum kekroithekjisi halatum pen Ne kechedon alam ingditang-lo. Kepavir nangji amar latum ajehak entang-lo. Latum lahei chonghutang-lo, la pachobeisi latum amar along birappet-lo. Halatum pen latum aphi chiruinang-lo, pima non latum amethangsi chepavirtoilo! Nangphan hukum nangkepitang pon nangne pu amar pavirvetik ke Ne nanglong nangdodunde!

¹² La apotsi Israel atum ahotur angno arjap un-edet-lo, lapen latum ahotur aphan panungkuk-lo, pima latum isi nangmethang aphan kar-i-pik amar ason plang-lo. Jongsi nangtum angbong pen kar-i amar pavirvetik ke Ne nangtum along nangdundelo,

¹³ thurnon! Rat aphan pangthirra Ne ingno kevangji aphan pachesiknon. Penap kechesikjile latum aphan thannon, pima, Ne Hemphu, Israel a-Arnam la nangkethan nangji dolang: ‘Israel, Ne pavirnangji pu hukum nangkepi amar ajehak nangtum chebilo! Lahei amar nangtum varvetik-ke nangtum nang hotur atum angno arjap un-elo!

¹⁴ Lasi latum aphan thannon, adap latum lahei kevan thekji aphan. Isi akhei pen isi akhei. Ne kejong akhei atum aro pen aro vang nangpo. Ne kejong aro edon pen edon vang nangpo. Ne kejong adon inut pen inut vang nangpo.

¹⁵ Lapen Ne kejong abangphu aphan kepavir nangji amar penpen lapen la hem isi, la kechepahemphu amar an penpen me phrindutpo, pima la Israel aphuthak pherememe aketherak vantang-lo lapen Ne kechejok aloh phritang-lo.’”

¹⁶ Puthot adap Joshua Israel atum aphan isi akhei pen isi akhei vanlo lapen Judah akhei jong-lo.

¹⁷ La, Judah akhei vansi aro pen aro vanlo lapen Zerah si jong-lo. Anke la Zerah aro pen edon edon vanlo, lapen Zabdi adon ahem jong-lo.

¹⁸ La anke Zabdi ahem isi inut pen inut vanlo, lapen Achan, la Karmi asopo lapen Zabdi asupo aphan jong-lo.

¹⁹ La aphan Joshua pulo, “Sopo, Israel a-Arnam Hemphu angno ahok alam chethantha lapen chekobirtha. Nang nephan nethan tha, nang kopisi klemtang-loma, ne pen la kepatuji bor-i nangne.”

²⁰ Achan thak-lo, “La ahok-lo, neli Hemphu, Israel a-Arnam aphan langplotsi pap klemtang-lo, lapen la helo neli keklem.

²¹ Elitum kevan amar angbong Bebilon ape mesen neli thek-long-lo, lin 2 anbak arup, lapen powa hini anbak ser angkleng ke-enji ar-i-duk amat neli lahei vandet-lo. La neli pe ahem arlo kepip thek-longji, rup ke angbong chit si do.”

²² Lasi Joshua ajehak amonit pehem anat pakattoilo, lapen latum ke-enmo amar-heihei hadak kepip thek-long-lo, rup ke angbong chitsi kebi.

²³ Lahei latum pehem angtan vansi lahei Joshua along ponlo lapen Israel kedo-an lapen Hemphu angno lahei bilo.

²⁴ Joshua lapen Israel arat kedo-an Achan aphan phlung-lo lapen rup, pe, lapen ser angkleng, asopo atum, lapen asopi atum, la achainong, agadha-heihei lapen biresak, la apehem lapen la kechepahemphu amar ason an, lahei latum “Kesung Arlok” pu anatsi ponlo.

²⁵ Lapen Joshua pulo, “Kopisi nang netum aphan lason akesung kevanlo? Non Hemphu-si nangphuthak kesung vanpo!” Anke do-an arat atum Achan aphan arlong pen varbop-lo, la hem isi lapen amar an halatum arlong pen varbopsi me phrindut-lo.

²⁶ La aphuthak latum arlong buithip-lo, la nonputa hadak dolang. La apotsi laso adim Kesung Arlok pusi irlo. Anke Hemphu aningkethi hamdet-lo.