JOSHUA 6 - BAIBEL KANGTHIR (BSI)

Jeriko Kevir

¹ Jeriko anghap-heihei ingkir-pet-lo, lapen Israel atum kelut longledetjisi tonpet-lo. Baduta lut-longle mate rongsopi olongle.

² Joshua aphan Hemphu pulo, “Ne, Jeriko, la arecho lapen angthin-kethe aron-aso penpen nangrideng nanghodaitang-lo.

³ Nang lapen nangron aso atum rongsopi komchen arnisi ephong adu pachekomra kongvainon, lasonsi nithrok an klemnon.

⁴ Pong-ut ke-ot bang throksi akurusar atum ke Kechejok Aloh Asinduk angnosi dam nangpo. Kurusar atum pong-ut kebut ahut, throksi arni nang lapen nangron-aso atum rongsopi komchen batai throksi adu pachekomsi kongvaira dam nangji.

⁵ Anke halatum isi ajirpading muchot pen pong-ut butpo. La nangtum karjulongpen amat, pinso amonit an hangprak nangpo, lapen rongsopi arpong-heihei ru-etpo. Ansi kedo-an aron-armu rongsopi arlo lutdam pakeng-sonpo.”

⁶ Kurusar atum aphan Joshua hangsi halatum aphan pulo, “Kechejok aloh Asinduk ponnon, lapen pong-ut-heihei ta ponnon, nangtum bang throksi la angno damnon.”

⁷ Anke la amonit atum aphan rongsopi akung soding kepadam pangchengjisi hukum pilo, lapen Hemphu Kechejok Aloh Asinduk angno aphrang kedam kerai atum aphan padamtoilo.

⁸ Lasi Joshua hukum kepi asonthotsi aphrang kedam kerai atum pong-ut kebut akurusar atum aphrang dam pangcheng-lo,

⁹ laso aphi Kechejok Aloh Asinduk keparphang akurusar atum dunlo, laso aphi anung kerai atum dunlo. Pong-ut do-anta laso apor ke arki dorrep-lo.

¹⁰ Bonta Joshua amonit aphan pahangtoite det-lo, lapen la hukum pipetik ke etheta paningje longledet-lo.

¹¹ Lasi laso asong amonit atum aphan Hemphu a-Kechejok Aloh Asinduk rongsopi komchen kongvaira keponji aphan pulo. Anke halatum amukam nangchelelo lapen ajo pangthang-lo.

¹² Puthot arni Joshua thurdap-prang-lo, lapen bataihini aphong kurusar atum lapen ron-aso atum aphrang arni keklem ason rongsopi komchen damlo. Aphrangsi kepaphrang kerai atum, adun bang throksi akurusar, bang throksi apong-ut kebut atum; lapen aphi Hemphu a-Kechejok Aloh Asinduk keparphang atum dunlo lapen kejutsi aphi kerai atum. Pong-ut do-an laso aphongta ase dorrep-lo.

¹³ Karju anu apong-ut kebut bang throksi akurusar atum Hemphu Anghoi aphrang aphrang dambomlo, lapen pong-ut but ponbomlo. Risim kedo amonit atum ke latum aphrang si dambomlo, lapen pong-ut butbom ahut Hemphu Anghoi aphi, aphi keton atum vang-lo. latum aphi phi dun bomlo.

¹⁴ Laso hini arni latum puthot rongsopi komchen ephong kongvai thulo lapen mukam anat chevoilo. Latum lasonsi ni throk klemlo.

¹⁵ Throksi arni latum the-ang prinprele ahut thursi batai throksi rongsopi aphrang asonsi kongvailo lapen laso arni helo batai throksi halatum kekongvai arnilo.

¹⁶ batai throksi kekongvai ahut kurusar atum pong-ut butji dokdok-lo, Joshua amonit atum kehangprakji ahukum pisi la pulo, “Nangtum aphan Hemphu nangpitang-lo!

¹⁷ Rongsopi lapen la along kedo-an amar angton pen Hemphu aphan isi athok ason pavirdet khangjang nangji. Muthe Rahab beisapi lapen bangpi ahem asor an si pajokchot nangji, pima bangpi etum akelangjoi atum aphan patulo.

¹⁸ Bonta kepavir nangji amar an nangtum ponlongle; nangtum jongsi klemlo pulote nang Israel amukam aputhak kesung lapen kevir vanpo.

¹⁹ Rup, ser, tam angchin, mate ingchin pen keselam amar an Hemphu aphansi panongtang-lo. Lahei Hemphu akhipuru alongsi thap nangji.”

²⁰ Lasi kurusar atum pong-ut-heihei but-lo. La monit karjulong pen amat latum hangprak-lo lapen arpong-heihei ruvang-lo. Anke kedo-an ron-armu atum rongsopi along kelutdam pakengsonsi damlo lapen la cheraidet-lo.

²¹ Latum anokjir pen rongsopi kedo abangphutin aphan latum pinso-arlo, oso lapen akesar anta pathilo. Latum chainong, biresak lapen gadha anta pathilo.

²² Ansi Joshua kelangjoi akam keklem banghini amonit aphan pulo, “Beisapi ahem damra bangpi lapen bangpi ahem asor kedo-an van-etnon, nangtum bangpi aphan kechechak ateng.”

²³ Lasi latum damsi Rahab lapen apo-apei, lapen amumar atum lapen ahem asor kedo-an aphan vandet-lo. Israel amukam adung halatum kedo-an ahem asor lapen aban atum aphan pajokvansi ponlo.

²⁴ Ansi latum rongsopi me keilo lapen longle anta lapen la along kedo amar asontin ser, rup, tam lapen ingchin pen keselam amar pen apar me pacho-et-lo. Lahei ke ponsi Hemphu akhipuru arlo thap-lo.

²⁵ Bonta Rahab beisapi lapen adon-arap kedo-an achethe pajok-lo. Pima Jeriko anat la ketoi banghini kepalangjoitoi atum aphan bangpi patujoilo. (Non pu arnita bangpi aso-asu Israel adetsi dolo.)

²⁶ Halaso ahut Joshua isi aseme pathirlo: “Badutame Jeriko arongsopi kekimthuji kebor-i abang aphan Hemphu ahirjuno papinang. Hemthur kekim abangphan aso akleng pavirnang; anghap-heihei keselam abang aso kejut pavirnang.”

²⁷ Lasi Joshua along Hemphu dolo, lapen la anong det adang anta chethangphlup-lo.