JOSHUA 5 - BAIBEL KANGTHIR (BSI)

¹ Jordan anichi anat Amor arecho kedo-an lapen Mediterran atalo anat kedo Kanaan arecho kedo-an Israel arat kehat tangtetik Jordan alang pakrengphunlo pu alam latum arjulong-lo. Halatum pherelo lapen halatum Israel pen ajok aning ajakong avedet-lo.

Gilgal Along Achelek Areng Kerot

² Anke Joshua aphan Hemphu pulo, “Akangtang a-arlong pen ajehak nokso selamnon lapen Israel atum aphan achelek areng rot non.”

³ Lasi Hemphu hukum kepitang atengsi Joshua klemlo, lapen la achelek areng kerot anglong adim Israel aso aphan areng rot-lo.

⁴ Israel arat Ijip adet pen kevang aphi pinso atum anke areng cherot et-lo.

⁵ Tebonta ningkan 40 rat atum kejejangtang ajo kehat-loksi apor padamlo, lapen pinsomar atum areng rot longledet-lo, lapen halaso kejut apor Ijip ke-o ahut ron kechedanthek arta pinso amonit atum an thi-et-lo, pima latum Hemphu aphan kroikrelo.

⁶ La semeketang ason si halatum aphusar atum aphan kechak kedorphlup lapen aho-or kedo alongle lang longledet-lo.

⁷ Lahei amonit asomar atum areng cherot longle pinlang, lapen la ovekemi atum aphansi Joshua areng rot-lo.

⁸ Arengkerot jutdet aphi khei kangthim kedo-an amek memetik mukam along dokok-lo.

⁹ Joshua aphan Hemphu pulo, “Pini arni Ne nangtum aphan Ijip along ban kechenek pen pakaktang-lo.” La apotsi laso adim Gilgal pu amen irlo, lasonsi la amen dobomlo.

¹⁰ Israel atum Jeriko adung athoi Gilgal along mukam kedo un ahut, halatum Kejok amei arnikang-sam chiklo angbong 14 arni si padolo.

¹¹ Puthot arni Kanaan adet kepathe athe halatum kecho cheng-lo. Sangkarnu lapen thapkave ahim selamlo.

¹² Manna a-an ke nangklokledet-lo, lapen Israel aso atum cholongle pinlo. Halaso arni pen latum Kanaan adet kepathe athesi chobomlo.

Joshua Lapen Inut Nokjir Kedo Amonit

¹³ Joshua Jeriko adung kedo ahut, men men la angno inut amonit aphan thek-long-lo, nokjir isi otdong. Joshua la along damsi arjulo, “Nangli nelitum aron-aso ma mate inut ahotur ma?”

¹⁴ Bangso amonit thak-lo, “Pu pu ta kali, ne ladak kedo ke Hemphu aron-armu hukum kepi abang.” Joshua longle athak ardomkhrupsi pulo, “Neli nangbanlo akehai, nangli neliphan kopisi paklemtoipoma?”

¹⁵ Ansi Hemphu aron-armu hukum kepi abang la aphan pulo, “Nangkeng-op chephloktha; nangli kangthir adimsi karjap-lo,” lapen la kepu atengsi Joshua klemlo.