JOSHUA 22 - BAIBEL KANGTHIR (BSI)

Nihang Akhei Atum Aphan Joshua Hem Ketoi

¹ Ansi Reuben, Gad lapen Nihang a-Manasseh akhei atum aphan Joshua hangpetsi

² halatum aphan la pulo, “Hemphu aban Moses hukum nangkepi atengsi nangtum klempet-lo, lapen nangtum nehukum anta kroipet-lo.

³ Non ahut anta nangkorte Israel atum aphan turchorchedet-lo. Nang Arnam Hemphu ahukum nangtum cherepamesi kroilo.

⁴ Non alangli kechechak atengsi nangkorte Israel atum aphan nang Arnam Hemphu papangsamlo. Lasi nangtum methang kechepu alongle anat nanghem chedamnon ha Jordan parai nihang alongle Hemphu aban Moses nangtum aphan nangkepi alongle along.

⁵ Moses nangkepi nangpaklemtoi Aron an kroipamepo pura pachinidaknon. Nang Arnam Hemphu aphan chinghonnon, la aning kehang alingle klemnon, la ahukum-heihei kroinon, La aphan kroithipnon lapen nangning lapen nangkarjong ajakong kedo-an penle La aphan ingduknon.”

⁶ Joshua halatum aphan ahirjume pisi lapen lahei alam pusi hem toilo: “kepangreng api, ser, rup, tam, ingchin ongdung pen lapen pe-ri ongdung pen nangtum kechevoipen paplang-o nang.

⁷ Nangtum ahotur pen keponlong amar khei isi nangkorte atum pen pen chethaknon.” Ansi halatum ahem chedamlo.

⁸ Jordan anihang alongle Manasseh akhei achitim aphan Moses longle pilo lapen achitim ke Joshua si Jordan anichi alongle akaprek akhei atum aphan longle pilo.

⁹ Lasi Reuben, Gad, lapen Nihang a-Manasseh arat atum hem chedamlo. Halatum Kanaan adet Shiloh along kedo-an Israel arat atum aphan otekangsi amethang alongle Gilead alongle Moses pen ajok Hemphu kepapitoi halatum ke-entang alongle along chedamthulo.

Jordan Akung Adovan

¹⁰ Reuben, Gad lapen Nihang a-Manasseh atum Geliloth along nanglesi, Jordan anichi parai arjapding un ahut halatum thedung langmeme adovan hadak langroi akung kimlo.

¹¹ Ahin a-Israel arat aphan pulo, “Arjutha! Reuben, Gad, lapen Nihang a-Manasseh akhei arat atum Giloth along Jordan parai akung isi adovan kimlo.

¹² Israel arat atum la arjulongsi nihang akhei atum pen ron kechedan damjisi Shiloh along vangpet-lo.”

¹³ Lasi Gilead adet Reuben, Gad lapen Nihang a-Manasseh akhei arat along kepadamjisi Eleazar kurusar asopo Phinehas aphan Israel arat toilo.

¹⁴ Bangkep ajalin atum Phinehas along dunlo, nichi akheitin pen inut nut lapen abangphutinta ahemtun aro angbong akethelo.

¹⁵ Halatum Gilead adet Reuben, Gad lapen Nihang a-Manasseh along vang-lo,

¹⁶ lapen kedo-an Hemphu arat amen apharman halatum aphan ningjesi pulo, “Nangtum kopisi la kehingno akam Israel Arnam abe thurloma? Laso adovan nangtum methang aphan kechikim pen ajok nangtum Hemphu abethurtang-lo! Alanglilam nangtum arjujepinlo! Peor along etum apap chematha tha Hemphu amethang arat aphan avur pen ajok aduk kepi? Hala pen ajok etum non anta sungbomlang. Halaso apap dordelangma?

¹⁷ ‘Chemathatha, Peor along etum apap, Hemphu aningkethi ahut mavur pen arat aso aphan aduk kepi? Halaso apot etum eduk pho-o-lo, Hala anta etum apap aphan dorphlup kalilangma?

¹⁸ Non nangtum alongle aphan kekroimo loma? Pini jongsi nangtum Hemphu abethur lote la Israel abangphutin aphan penap aningthihakpo.

¹⁹ Lasi non, jongsi nangtum alongle along karchoji apun kali pulote Hemphu ape ahem kedo alongle along vangnon. Netum pen longle nanghang non. Bonta Hemphu abethurrinon mate e-Arnam Hemphu adovan kedo apara isi adovan pen ajok netum abeta thur-rinon.

²⁰ Chemathatha kopusonsi Zerah asopo Achan kepavirji kethoktang amar pen hukum kroimolo; laso pen ajok Israel amei kangthim aduk phonang-lo. Achan amethang apap pen ajok la inutvet le kethinang-lo lapu kali.’ ”

²¹ Nichi akhei ajalin atum aphan Reuben, Gad lapen Nihang a-Manasseh atum thak-lo, “Ajakongkethe Abang ke Arnamlo. Alangli ke Hemphu-lo! Ajakongkethe abang ke Arnamlo! Alangli ke Hemphu-lo! Netum la kopi klemloma Alangli chini, lapen netum nangtum aphanta pachini ingtung-lo. Netum jongsi abethurlo lapen Hemphu aphan kroithipthedet-lo pulote netum aphan pareng-long-rinon!

²² ‘Jakong-kethenei Abang ke Arnam! Alangli ke Hemphu-lo! Etum la kopi athesi keklem loma Alangli la chini, lapen nanglitumta la kechiniji aphan nelitum ninghang-lo. Ilitum jongsi thurkrap-ra lapen Hemphu aphuthak kroithipthe pulote, nelitum aphan pareng-longrinon!

²³ Netum jongsi Hemphu aphan kroikrelo lapen kephrin athok kepijisi mate sok-sang adan mate kejelang athok-heihei kepijisi netum methang aphan dovan chekimlo pulote, Hemphu amethang netum aphan aduk ne papinang.

²⁴ Kali! Pima mo aphi nangtum aso-asu atum “Hemphu” Israel a-Arnam pen nangtum kopi kechepho kedolo?’

²⁵ Nangtum Reuben lapen Gad arat atum pen netum angbong alangli Jordan Aroi ahoi pinchongtang-lo ke. Nangtum Hemphu pen keklem nangji thangnat ta ave pu nangpu detna pu kepheresi la keklem. Anke nangso nangsu atum, neso-nesu atum aphan Hemphu aphan karchoji khamkhedetpo tahai.

²⁶ Lasi netum isi adovan kimdet-lo, kephrin athok-heihei kepiji aphan kali mate dan-heihei kepiji aphan kali,

²⁷ bonta netum lapen nangtum arat aphan isi angthek-lo lapen netum aphi a-ove atum ke netum athok-heihei pen pen, kejelang athok-heihei pen pen Hemphu angno Alangli pehem kangthir along ahokpet pen archolo pu chinipo. Lake nangtum aso-asu atum netum aso-asu aphan nangtum netum a-Hemphu pen keklemji thangnat akam ta ave pu papudetji aphanlo.

²⁸ Lake netum akepharlo jongsi la nangplang-lote, netum aso-asu atum ta pu-unpo, ‘Langtha! Netum aphusar atum Hemphu adovan asonthot isi adovan selamlo. Lake kephrin athok-heihei mate athok-heihei kepiji aphan kali, bonta nerat atum lapen nangtum angbong isi angthek-lo.’

²⁹ Netum Hemphu abele kethur kali mate athok-heihei kephrinjisi mate soksang an-heihei mate athok-heihei kepiji aphanle dovan kekimra Alangliphan kroikredet-lo laputa kali. Netum a-Arnam Hemphu adovan, amethang kedo apehem angno karjap pen apar kaprek adovan netum kim-un-e.”

³⁰ Phinehas kurusar lapen bangkep mei ajalin atum, nichi akhei ahemtun akesar atum Reuben, Gad, lapen Nihang a-Manasseh akhei atum kopima kepu alam arjulong-lo lapen halatum aning ingsamlo.

³¹ Eleazar kurusar asopo Phinehas halatum aphan pulo, “Non netum chinilo, Hemphu etum along dolo. Nangtum Alangli abekethur kali, lasi nangtum Israel arat aphan Hemphu aduk kepiji pen pajoktang-lo.”

³² Ansi Phinehas lapen jalin atum Reuben, Gad arat aphan Gilead along otekangsi ha Kanaan Israel arat anat chedamlo, lapen halatum aphan kelong alam an thanjirlo.

³³ Israel arat atum aning ingsam-o-lo lapen Arnam aphan rolo. Halatum Reuben lapen Gad arat atum kedo alongle ron kechedan kedamji lapen longle kephangnoji alam chethanthe pinlo.

³⁴ Reuben lapen Gad arat atum pulo, “Laso adovan ke isi etum kedo-an aphan Hemphu helo Arnamlo pu ahakilo.” Lasi halatum la amen “Haki” pusi irlo.